អន្តរជាតិ
ហ្វីលីពីន ក្លាយជាសមាជិកពេញសិទ្ធិរបស់«ធនាគារវិនិយោគហេដ្ឋារចនាសម្ព័ន្ធអាស៊ី AIIB» ដែលដឹកនាំដោយចិន ប្រធានាធិបតីហ្វីលីពីន (ខាងឆ្វេង) ចាប់ដៃប្រធានាធិបតីចិន នាពេលបំពេញទស្សនកិច្ចនៅខែតុលាកន្លងទៅ
× ព្រឹទ្ធិសភាហ្វីលីពីន នៅថ្ងៃទី០៥ ខែធ្នូ បានអនុម័តទទួលយកលក្ខន្តិកៈនៃកិច្ចព្រមព្រៀងរបស់ធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដែលជាគំនិតផ្តួចផ្តើម និងក្រោមការដឹកនាំរបស់រដ្ឋាភិបាលក្រុងប៉េកាំង។ នេះបើយោងតាមភ្នាក់ងារព័ត៌មានចិន Xinhua ដែលបានដកស្រង់សម្តីសមាជិកព្រឹទ្ធសភាហ្វីលីពីនលោក Loren Legarda ។
លោកស្រី Loren Legarda សមាជិកព្រឹទ្ធសភាដែលជាគណៈកម្មាធិការស្តីពីសន្ធិសញ្ញានៃធនាគារវិនិយោគហេដ្ឋារចនាសម្ព័ន្ធអាស៊ី(AIIB) បានបង្ហាញពីទស្សនវិជ្ជមានចំពោះការអនុម័តលើកិច្ចព្រមព្រៀងនេះ ដោយលោកស្រី លើកឡើងថា សមាជិកភាពហ្វីលីពីននៅក្នុង AIIB នឹងជួយហ្វីលីពីនក្នុងការសម្រេចទិសដៅនៃកំណើនសេដ្ឋកិច្ចតាមរយៈវិស័យហេដ្ឋារចនាសម្ព័ន្ធ។ នេះបើយោងតាមប្រភពព័ត៌មានដដែលនោះ។
ការផ្តល់សច្ចាប័នរបស់ព្រឹទ្ធសភាហ្វីលីពីន ត្រូវបានធ្វើឡើងក្រោយពីរដ្ឋាភិបាលហ្វីលីពីន បានចុះហត្ថលេខាលើលក្ខិន្តិកៈនៃកិច្ចព្រមព្រៀងរបស់ AIIB នៅថ្ងៃទី៣១ ខែធ្នូ ឆ្នាំ២០១៥ និងផ្តល់ការអនុម័តដោយលោកប្រធានាធិបតីហ្វីលីពីនថ្មី រ៉ូឌ្រីហ្គូ ឌើទើតេ នៅថ្ងៃទី១៩ ខែតុលា មុនពេលដែលលោកប្រធានាធិបតី ត្រូវបំពេញទស្សនកិច្ចនៅប្រទេសចិនកាលពីខែតុលាកន្លងទៅនោះ។
សូមជម្រាបផងដែរថា ធនាគារវិនិយោគហេដ្ឋារចនាសម្ព័ន្ធអាស៊ីរបស់ចិន ដែលមានទីស្នាក់កណ្តាលនៅក្រុងប៉េកាំង និងមានសមាជិកសរុប៥៧ប្រទេសនោះ ត្រូវបានបង្កើតឡើងក្នុងគោលបំណងផ្តល់ការផ្គត់ផ្គង់ហិរញ្ញវត្ថុដល់គម្រោងហេដ្ឋារចនាសម្ព័ន្ធនៅអាស៊ី។ ធនាគារនេះ ក៏ត្រូវបានមើលឃើញថា បង្កើតឡើងដើម្បីប្រកួតប្រជែងជាមួយស្ថាប័នហិរញ្ញវត្ថុគ្រប់គ្រងដោយលោកខាងលិចមានធនាគារពិភពលោក និងមូលនិធិរូបីយវត្ថុអន្តរជាតិផងដែរ។ ក្នុងចំណោមសមាជិកអាស៊ាន មានតែម៉ាឡេស៊ីនោះទេ ដែលមិនទាន់ផ្តល់សច្ចាប័ន ដោយគ្រាន់តែចុះហត្ថលេខាប៉ុណ្ណោះ៕
Tag:
ហ្វីលីពីន
អាស៊ាន
AIIB
© រក្សាសិទ្ធិដោយ thmeythmey.com