អន្តរជាតិ
រដ្ឋមន្ត្រីការពារជាតិអាមេរិកថា រុស្ស៊ីគ្មានជួយវាយ ISIS អ្វីឡើយ និងទុកឲ្យអាមេរិកប្រយុទ្ធម្នាក់ឯង
× ខណៈដែលរុស្ស៊ីហាក់បន្ធូរដៃក្នុងយុទ្ធនាការនៅស៊ីរី ប្រមុខការពារជាតិអាមេរិក លោក Ashton Carter បាននិយាយរិះគន់ក្រុងមូស្គូថា មិនបានជួយអ្វីឡើយក្នុងការប្រយុទ្ធប្រឆាំងក្រុមជ្រុលនិយមរដ្ឋឥស្លាម នៅស៊ីរី។ លោក Carter អះអាងថា អាមេរិក និងសម្ព័ន្ធមិត្តរបស់ខ្លួនទៅវិញទេ ដែលជាអ្នកទទួលបន្ទុករឿងនេះ និងបានចេញមុខវាយប្រយុទ្ធក្រុមជ្រុលនិយមរដ្ឋឥស្លាម ដែលអុកឡុកនៅលើទឹកដីស៊ីរី។
«ពួកគេ មិនបានជួយអ្វីឡើយ។ ពួកគេ ចូលមកស៊ីរី និងនិយាយថា ពួកគេនឹងប្រយុទ្ធក្រុមរដ្ឋឥស្លាម និងជួយដោះស្រាយជម្លោះនៅស៊ីរី។ ប៉ុន្តែពួកគេមិនបានធ្វើអ្វីទេ ហើយជាលទ្ធផល យើងត្រូវប្រយុទ្ធនឹងក្រុមរដ្ឋឥស្លាមតែម្នាក់ឯង»។ នេះជាការលើកឡើងរបស់រដ្ឋមន្ត្រីការពារជាតិអាមេរិក Ashton Carter ទាក់ទងនឹងប្រតិបត្តិការយោធារបស់រុស្ស៊ីនៅស៊ីរី ដែលលោកអះអាងថា ស្ទើរតែមិនបានទទួលបានលទ្ធផលអ្វីសោះ។
តាំងតែពីដើមមក ប្រតិបត្តិការយោធារបស់រុស្ស៊ី និងអាមេរិកនៅស៊ីរី មិនដែលត្រូវគ្នាឡើយ។ ក្រៅតែពីការមានគំនិតផ្ទុយគ្នាលើអនាគតរបស់ប្រធានាធិបតីអាសាដ ទាំងអាមេរិក និងរុស្ស៊ី ក៏មិនត្រូវគ្នាលើការកម្ទេចក្រុមរដ្ឋឥស្លាមដែរ។ អាមេរិក បានចោទប្រតិបត្តិការដែនអាកាសរបស់រុស្ស៊ីថា វាយប្រហារតែគោលដៅក្រុមឧទ្ទាមប្រឆាំងមួយចំនួន ដែលរុស្ស៊ីចាត់ទុកជាក្រុមរដ្ឋឥស្លាម ឬជាប់ពាក់ព័ន្ធក្រុមនេះ និងមិនបានវាយប្រហារគោលដៅក្រុមរដ្ឋឥស្លាមពិតប្រាកដឡើយ។
ចំណែកឯក្រុងមូស្គូវិញ ក៏បានប្រកាន់ក្រុងវ៉ាស៊ីនតោនវិញថា មិនជួយវាយប្រយុទ្ធកម្ទេចក្រុមរដ្ឋឥស្លាមឡើយ និងគិតតែជួយក្រុមឧទ្ទាម ដើម្បីផ្ដួលរំលំរបបប្រធានាធិបតី អាសាដ ប៉ុណ្ណោះ។ កន្លងមក ក្រុងមូស្គូ ចង់ឲ្យអាមេរិបញ្ជាក់ឲ្យច្បាស់ពីក្រុមឧទ្ទាមប្រឆាំង ដើម្បីចៀសវាងវាយប្រហារខុសគោលដៅ។ មួយវិញទៀត រុស្ស៊ី ក៏ចោទប្រតិបត្តិការយោធាអាមេរិកថា បានសម្លាប់ប្រជាជនស៊ីវិលជាច្រើន និងព្យាយាមបំផ្លាញហេដ្ឋារចនាសម្ព័ន្ធសេដ្ឋកិច្ចរបស់ស៊ីរីទៀតផង។
ក្នុងបទសម្ភាសន៍ជាមួយទូរទស្សន៍ NBC នៅថ្ងៃទី៨ ខែមករា ក្រៅពីនិយាយវាយប្រហាររុស្ស៊ី លោក Carter ក៏បានសរសើរប្រតិបត្តិការរំដោះក្រុង Mosul ដែលលោកបញ្ជាក់ថា ធ្វើឡើងតាមផែនការ បើទោះជាអាមេរិកធ្លាប់សន្យាជួយរំដោះទីក្រុងនេះ នៅត្រឹមការបោះឆ្នោតខែវិច្ឆិកា ឆ្នាំ២០១៦ ក៏ដោយ។ ខណៈដែលយុទ្ធនាការរំដោះ Mosul នៅមិនទាន់ជោគជ័យ រុស្ស៊ី បានជួយរំដោះក្រុងជាច្រើនរបស់ស៊ីរី ពីដៃក្រុមរដ្ឋឥស្លាមផងដែរ។
ស្ថានការណ៍នៅស៊ីរី បានប្រែប្រួលយ៉ាងខ្លាំង បន្ទាប់ពីកងទ័ពរុស្ស៊ី ជួយរំដោះទីក្រុង Aleppo ពីដៃក្រុមឧទ្ទាម ដែលជួយគាំទ្រពីក្រោយដោយអាមេរិក។ ប្រធានាធិបតីអាសាដ ចាត់ទុកជ័យជម្នះលើកនេះ ជាផ្លូវទៅកាន់ជោគជ័យ ដែលនេះក៏មានន័យថា លោក ទំនងជាអាចរក្សាកៅអីប្រធានាធិបតីបានដដែល បន្ថែមពីលើគោលនយោបាយថ្មីរបស់ប្រធានាធិបតីជាប់ឆ្នោត ដូណាល់ ត្រាំ ដែលចង់ដកខ្លួនឈប់គាំទ្រក្រុមឧទ្ទាមនោះ៕
Tag:
អាមេរិក
រុស្ស៊ី
ក្រុមរដ្ឋឥស្លាម
ស៊ីរី
© រក្សាសិទ្ធិដោយ thmeythmey.com