កីឡាជាតិ
×![]()
អ្នកគ្រប់គ្រងកម្មវិធីព័ត៌មានកីឡាទូរទស្សន៍ភីអិនអិនលោក ស្រឺ ស្រេង(ហៅសំណព្វ)បានប្តេជ្ញាមិនឲ្យមានវត្តមានកីឡាករ និងមន្ត្រីបច្ចេកទេសនៅលើសង្វៀនរបស់ភីអិនអិននោះឡើយ ប្រសិនបើមានករណីលក់ខ្លួន។ ការបញ្ជាក់បែបនេះ ធ្វើឡើងក្នុងសន្និសីទសារព័ត៌មាន បើកការប្រកួតជើងឯកគោជល់ទម្ងន់៥៧គីឡូក្រាម រដូវកាលទី៥ កាលពីថ្ងៃទី៨ ខែមករា ឆ្នាំ២០១៧។
វាមិនមែនជាលើកទី១នោះទេ សម្រាប់ថ្នាក់ដឹកនាំព័ត៌មានកីឡា និងការប្រកួតជើងឯកគោជល់ លោក សំណព្វ ដែលតែងតែនិយាយមិនឲ្យមានវត្តមានកីឡាករ និងមន្ត្រីបច្ចេកទេសលក់ខ្លួននៅភីអិនអិន(PNN)។ យ៉ាងណាមិញ សម្រាប់ការបើកជើងឯកគោជល់រដូវកាលថ្មីទម្ងន់៥៧គីឡូក្រាម លោក នៅតែបន្តបេ្តជ្ញាមិនឲ្យមានវត្តមានកីឡាករ និងមន្ត្រីបច្ចេកទេសនៅលើសង្វៀនភីអិនអិនប្រសិនបើមានករណីលក់ខ្លួនកើតឡើង។
ក្នុងសន្និសីទសារព័ត៌មានបើករដូវកាលថ្មី កាលពីថ្ងៃទី៨ ខែមករា ម្សិលមិញ លោក សំណព្វ បានបញ្ជាក់យ៉ាងដូច្នេះថា៖«ចង់ជម្រាបជូនថា ចិត្តអ្នករៀបចំកម្មវិធីក៏ដូចជាតំណាងឲ្យទូរទស្សន៍ផ្ទាល់ សន្យានៅតែសន្យាដដែលថា ប្រសិនបើមានករណីមិនប្រក្រតី(លក់ខ្លួន)កើតឡើង យើងនៅតែចិញ្ចឹមចិត្ត នឹងចាត់តាមវិធានការដែលកើតឡើងកាលពីមុនអ៊ីចឹង។ គឺយើងមិនទុកឱកាស ឲ្យជនដែលបំផ្លាញកីឡា មកចូលទូរទស្សន៍ភីអិនអិននោះទេ»។
នេះជាលើកទី១ហើយ ដែលសម្រាប់សង្វៀនភីអិនអិន ដែលដាក់ឲ្យមានការប្រកួតជើងឯកទម្ងន់ស្រាលបែបនេះ។ ប្រធានគ្រប់គ្រងកម្មវិធីប្រដាល់រូបនេះអះអាងថា រដូវកាលថ្មីនេះនឹងក្លាយជាការប្រកួតមួយដ៏ជក់ចិត្ត ព្រោះកីឡាករដែលចូលរួមសុទ្ធសឹងជាកីឡាករជើងខ្លាំង ដែលបានឆ្លងកាត់ការសម្រិតសម្រាំង និងវាស់ស្ទង់មតិពីអ្នកទស្សនា។
គួរបញ្ជាក់ថា សម្រាប់ជើងឯកគោជល់ទម្ងន់៥៧គីឡូក្រាមរដូវកាលនេះ មានកីឡាករកម្ពុជា៤ និងថៃ៤រូប។ កីឡាករកម្ពុជាទាំងនោះរួមមានកីឡាករ ពេជ្រ ម្ទេសខ្មាំង, ព្រឿង សុជាតិ, ម៉ន សាម៉េត និងកីឡាករ យុគ យក្សផ្លែ រីឯកីឡាករថៃរួមមាន ផេត សិលា, ភូន សាវ៉ាត, កាំឡៃយោគ និង ផេត ងិនថង។
ដោយឡែក សម្រាប់រូបមន្តនៃការប្រកួត គឺកីឡាករកម្ពុជាមិនជួបជាកីឡាករកម្ពុជានោះឡើយ។ កម្ពុជាម្នាក់ៗត្រូវជួបជាមួយកីឡាករថៃទាំង៤នាក់ ទៅវិញទៅមក ដើម្បីចម្រាញ់ជ្រើសរើសកីឡាករកម្ពុជាម្នាក់ ដែលមានពិន្ទុខ្ពស់ជាងគេ ឡើងទៅជួបកីឡាថៃដែលមានពិន្ទុជាងគេ នៅវគ្គផ្តាច់ព្រ័ត្រ។ សម្រាប់ពេលវេលាប្រកួត ត្រូវបានផ្លាស់ប្តូរ គឺប្រកួតចាប់ពីម៉ោង៥រសៀលរហូតដល់ម៉ោង៧យប់ រៀងរាល់ថ្ងៃអាទិត្យ៕
Tag:
ប្រដាល់
សំណព្វ
PNN
ជើងឯកគោជល់
© រក្សាសិទ្ធិដោយ thmeythmey.com
