កីឡាជាតិ
លោក ប៉ុល សារឿន ជំរុញឲ្យអង្គភាពកងទ័ពនិងស៊ីវិលបណ្តុះធនធានថ្នាល និងរចនាសម្ព័ន្ធកីឡា
× ដើម្បីរួមចំណែកលើកស្ទួយវិស័យកីឡាជាតិឲ្យកាន់តែរីកចម្រើន និងដើម្បីត្រៀមការប្រកួតស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ។ នាយឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទបានជំរុញឲ្យអង្គភាពកងទ័ព និងស៊ីវិលទាំងអស់យកចិត្តទុកដាក់បណ្តុះបណ្តាលធនធានកីឡករថ្នាល និងគ្រូបង្វឹក ជាពិសេសកសាងហេដ្ឋារចនាសម្ព័ន្ធកីឡា។
អគ្គមេបញ្ជាការកងយោធពលខេមរភូមិន្ទលោក ប៉ុល សារឿន ជំរុញឲ្យបណ្តាអង្គភាពកងយោធពលខេមរភូមិន្ទ និងស៊ីវិលទាំងអស់ត្រូវយកចិត្តទុកដាក់លើកីឡាករ និងគ្រូបង្វឹក។ លើសពីនេះត្រូវបណ្តុះបណ្តាលធនធានកីឡាករថ្នាលប្រចាំអង្គភាពនីមួយៗឲ្យបានច្រើន និងកសាងហេដ្ឋារចនាសម្ព័ន្ធដែលបម្រើឲ្យការហ្វឹកហាត់និងប្រកួតកីឡា។ ទន្ទឹមនឹងនេះលោកក៏ជំរុញឲ្យគ្រូបង្វឹក និងកីឡាករយកចិត្តទុកដាក់ក្នុងការបង្វឹក និងហ្វឹកហាត់ផងដែរ។
ការជំរុញនេះធ្វើឡើងក្នុងគោលបំណងដើម្បីចូលរួមចំណែកលើកស្ទួយវិស័យកីឡាជាតិឲ្យកាន់តែរីកចម្រើន ព្រោះកីឡាមិនត្រឹមតែជួយឲ្យមានសុខភាពល្អ និងបង្កើនស្មារតីចងចាំឲ្យរឹងមាំប៉ុណ្ណោះទេ។ លើសពីនេះ វាជួយឲ្យមានរបៀបរៀបរយ សាមគ្គីភាព មិត្តភាព កិត្យានុភាព និងមោទនភាពប្រទេសទៀតផង។ ម្យ៉ាងវិញទៀត ដើម្បីត្រៀមចូលរួមប្រកួតប្រជែងដណ្តើមជើងឯកព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ។
នាពិធីបិទការប្រកួតកីឡាកងយោធពលខេមរភូមិន្ទដើម្បីអបអរទិវាជ័យជម្នះ៧មករានៅសាលកោះពេជ្រកាលពីថ្ងៃទី៨ ខែមករា នាយឧត្តមសេនីយ៍ ប៉ុល សារឿន បានបញ្ជាក់យ៉ាងដូច្នេះថា៖«បណ្តាកងឯកភាពនៃខេមរភូមិន្ទត្រូវតែខិតខំក្នុងការបណ្តុះបណ្តាលថ្នាលកីឡា រៀបចំកាលវិភាគមួយឲ្យបានច្បាស់លាស់ យកចិត្តទុកដាក់ចំពោះគ្រូបង្វឹក ថែទាំកីឡាករឲ្យបានល្អ និងកសាងហេដ្ឋារចនាសម្ព័ន្ធពាក់ព័ន្ធនឹងកីឡា និងកីឡដ្ឋានប្រកួតកីឡាឲ្យបានសមស្របសំដៅជួយលើកស្ទួយជីវភាពកីឡាជាតិរបស់យើង»។
មិនត្រឹមតែប៉ុណ្ណោះ នាយឧត្តមសេនីយ៍រូបនេះ ជំរុញឲ្យកីឡាករនៃកងយោធពលខេមរភូមិន្ទ និងស៊ីវិលទាំងអស់ត្រូវខិតខំហ្វឹកហាត់ពង្រឹងសមត្ថភាព និងបច្ចេកទេសរបស់ខ្លួន និងចូលរួមលេងកីឡាឲ្យបានច្រើន។ ហើយលោកជំរុញឲ្យកីឡាករដែលទទួលបានជ័យជម្នះពីការប្រកួតកីឡាកងទ័ពត្រូវបន្តការខិតខំហ្វឹកហាត់បន្ថែមទៀតដើម្បីរក្សាភាពខ្លាំងក្នុងការប្រកួតលើកក្រោយៗទៀត។ ចំណែកកីឡាករដែលមិនទទួលបានជ័យជម្នះត្រូវបង្កើនការហ្វឹកហាត់បន្ថែម ដើម្បីត្រៀមប្រជែងយកជើងឯកប្រចាំព្រឹត្តិការណ៍ផ្សេងៗទៀត៕
© រក្សាសិទ្ធិដោយ thmeythmey.com