ពានរង្វាន់សម្តេច ហ៊ុន សែន ឆ្នាំនេះក្រុមចូលរួមតិចជាងឆ្នាំមុន៥ក្រុម

កីឡាជាតិ

ពានរង្វាន់សម្តេច ហ៊ុន សែន ឆ្នាំនេះក្រុមចូលរួមតិចជាងឆ្នាំមុន៥ក្រុម

15, Jan 2017 , 4:00 pm

រូបភាព

ដោយ:

ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ប្រចាំឆ្នាំ២០១៧ ក្នុងវគ្គជម្រុះបឋម គឺមានតែ១២ក្រុមប៉ុណ្ណោះបានចូលរួម គឺតិចជាងកាលពីឆ្នាំ២០១៦រហូតដល់៥ក្រុម។ ប៉ុន្តែរូបមន្តនិងពេលវេលានៃការប្រកួតដូចនឹងឆ្នាំមុនដដែលគឺប្រកួតក្នុងទឹកដី និងក្រៅទឹកដីរៀងរាល់ថ្ងៃពុធ។ ការប្រកួតនឹងចាប់ផ្តើមពីថ្ងៃទី១៨ ខែមករា ដល់ថ្ងៃទី១៨ ខែមីនា។

តាមរបាយការណ៍របស់សហព័ន្ធកីឡាបាល់ទាត់កម្ពុជាការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ប្រចាំឆ្នាំ២០១៧ មានតែ១២ប៉ុណ្ណោះចូលរួម ខណៈឆ្នាំមុនមានចំនួន១៧ក្រុម ពោលគឺតិចជាងឆ្នាំមុនរហូតដល់ទៅ៥ក្រុម។ ខណៈការប្រកួតជម្រុះបឋមដែលធ្វើឡើងរៀងរាល់ថ្ងៃពុធ នៅតាមទីលានផ្សេងៗគ្នា ចែកជា៥ពូល។

ក្នុងនោះពូលAមានខេត្តកំពង់ស្ពឺ និងក្រុមខេត្តតាកែវ, ពូលB មានខេត្តព្រៃវែង ខេត្តកណ្តាល និងក្រុមខេត្តត្បូងឃ្មុំ,។ ពូលC មានខេត្តកំពង់ធំ ខេត្តឧត្តរមានជ័យ ខេត្តសៀមរាប និងខេត្តព្រះវិហារ, ពូលD មានខេត្តប៉ៃលិន ខេត្តកំពង់ឆ្នាំង និងខេត្តបាត់ដំបង និងពូលF មានខេត្តស្ទឹងត្រែង និងខេត្តមណ្ឌលគិរី(ចំណូលថ្មី)។

ដោយឡែក ក្រុមដែលធ្លាប់ចូលរួមកាលពីឆ្នាំ២០១៦ដូចជា អ.ហខេត្តកំពង់ធំ, ខេត្តកំពត, កំពង់ផែស្វ័យយ័តខេត្តព្រះសីហនុ, ខេត្តក្រចេះ, ក្រុមយុវជនបឹងកេត និងខេត្តស្វាយរៀង គឺសុទ្ធតែមិនបានចូលរួមដូចគ្នានៅឆ្នាំនេះ។ ពានរង្វាន់សម្តេច ហ៊ុន សែន ឆ្នាំនេះនឹងចាប់ផ្តើមពីថ្ងៃទី១៨ ខែមករា ដល់ថ្ងៃទី១៨ ខែមីនា៕