កម្ពុជាទទួលបានចំណាត់ថ្នាក់លេខ២នាព្រឹត្តិការណ៍ជើងឯកអាស៊ីអាគ្នេយ៍

កីឡាជាតិ

ជាតិ

កម្ពុជាទទួលបានចំណាត់ថ្នាក់លេខ២នាព្រឹត្តិការណ៍ជើងឯកអាស៊ីអាគ្នេយ៍

16, Jan 2017 , 5:25 pm

រូបភាព

ដោយ:

ក្រោយប្រកួតប្រជែងអស់រយៈពេល២ថ្ងៃនៅលើទឹកដីខេត្តសៀមរាបក្រុមអត្តពលិកកីឡាវ៉ូវីណាមកម្ពុជាបានឈរចំណាត់ថ្នាក់លេខ២ក្នុងព្រឹត្តិការណ៍ជើងឯកអាស៊ីអាគ្នេយ៍ឆ្នាំ២០១៧ ក្រោយដណ្តើមបានមេដាយមាស៨ ប្រាក់៧ និងសំរឹទ្ធ១១។ កម្ពុជាបានឈរលើ៥ប្រទេសក្នុងចំណោម៧ប្រទេសដែលចូលរួមប្រកួតក្នុងព្រឹត្តិការណ៍នេះ។

ក្រុមអត្តពលិកកីឡាវ៉ូវីណាមកម្ពុជាក្រោយដណ្តើមបានមេដាយមាស៨ ប្រាក់៧ និងសំរឹទ្ធ១១ បានធ្វើឲ្យក្រុមម្ចាស់ផ្ទះកម្ពុជាមួយនេះឈរចំណាត់ថ្នាក់លេខ២ក្នុងព្រឹត្តិការណ៍ប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍ប្រចាំឆ្នាំ២០១៧។ ចំណែកវៀតណាមឈរចំណាត់ថ្នាក់លេខ១ក្រោយដណ្តើមបានមេដាយមាស១២ ប្រាក់១៣ និងសំរឹទ្ធ១ និងឡាវឈរចំណាត់ថ្នាក់លេខ៣ក្រោយដណ្តើមបានមាស៣ និងសំរឹទ្ធ១៥។

ដោយឡែក ប្រទេសមីយ៉ាន់ម៉ា ដណ្តើមបានមេដាយមាស២ និងសំរឹទ្ធ៣ រីឯសឥណ្ឌូនេស៊ី ឈ្នះមេដាយមាស១ និងសំរឹទ្ធ៤ ខណៈប្រទេសថៃ ទទួលបានមេដាយប្រាក់តែ១ប៉ុណ្ណោះ ចំណែកហ្វីលីពីន មិនដណ្តើមបានមេដាយពីការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៤នេះទេ។

ទោះបីជាយ៉ាងនេះក្តី លោក ទេព ជីវសុខុម អគ្គលេខាធិការសហព័ន្ធកីឡាវ៉ូវីណាមកម្ពុជាបានចាត់ទុកលទ្ធផលនេះជាលទ្ធផលមួយដ៏ល្អគួរឲ្យកត់សម្គាល់ក្នុងឆ្នាំ២០១៧ បើប្រៀបធៀបទៅនឹងការធ្វើម្ចាស់ផ្ទះកាលពីឆ្នាំ២០១១ ឆ្នាំ២០១៣ និងការចូលរួមនៅប្រទេសសិង្ហបុរីកាលពីឆ្នាំ២០១៥កន្លងទៅ។ ពោលគឺទាំង៣លើកនោះកម្ពុជាទទួលបានមេដាយមិនលើសពី៤នោះឡើយ។

ក្រោយឈរចំណាត់ថ្នាក់លេខ២ អគ្គលេខាធិការសហព័ន្ធកីឡាវ៉ូវីណាមកម្ពុជារូបនេះទទួលថា ទោះបីសមត្ថភាពរបស់កីឡាកម្ពុជាមានការរីកចម្រើនក៏ដោយ ប៉ុន្តែបើប្រៀបធៀបទៅនឹងកីឡាករវៀតណាមដែលជាម្ចាស់ក្បាច់គុន គឺនៅមានកម្រិតទាបនៅឡើយ។ ចំណែកឡាវ និងមីយ៉ាន់ម៉ា គឺមានកម្រិតប្រហាក់ប្រហែលគ្នា។

គួរបញ្ជាក់ថា ការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍ប្រចាំឆ្នាំ២០១៧ ធ្វើឡើងរយៈពេល២ថ្ងៃចាប់ពីថ្ងៃទី១៣ ដល់ថ្ងៃទី១៤ នៅសណ្ឋាគារសុខាល័យអង្គរលើទឹកដីខេត្តសៀមរាប ដោយមាន៧ប្រទេសចូលរួម។ អត្តពលិកទាំងនេះត្រូវប្រកួតប្រជែងគ្នាលើ២៦វិញ្ញាសា៕