ជាតិ
នយោបាយជាតិ
អភិបាលខេត្តកំពង់ធំ៤ជំនាន់ ថតរូបរួមគ្នាលើកដំបូង ពីឆ្វេងទៅស្តាំ៖ លោក ណាំ ទុំ លោក ឈុន ឈន់ លោក អ៊ុត សំអន និងលោក សុខ លូ
× «ថ្វីត្បិតតែ រូបរាង អាយុ មិនដូចគ្នា តែមនសិការដូចគ្នា គឺចង់ឲ្យខេត្តកំពង់ធំរីកចម្រើន ប្រជាជនមានសេចក្តីសុខ»។ នេះជាសំណេរនៅលើហ្វេសប៊ុករបស់លោក សុខ លូ ដែលទើបតែឡើងកាន់តំណែងជាអភិបាលខេត្តកំពង់ធំ ដោយភ្ជាប់រូបថតដែលលោកបានថតជាមួយអតីតអភិបាលខេត្តបីរូបផ្សេងទៀត។
តាមរយៈព្រះរាជក្រឹត្យចុះកាលពីថ្ងៃទី២៧ ខែធ្នូ ឆ្នាំ២០១៦ លោក សុខ លូ ត្រូវបានតែងតាំងជាអភិបាលនៃគណៈអភិបាលខេត្តកំពង់ធំ ជំនួសលោក អ៊ុត សំអន ដែលត្រូវបានផ្ទេរឲ្យទៅបម្រើការនៅទីស្តីការក្រសួងមហាផ្ទៃ។ នាពិធីពិសារសាមគ្គីដើម្បីអបអរសាទរការឡើងកាន់តំណែង កាលពីថ្ងៃទី៦ ខែមករា លោក សុខ លូ មានឱកាសថតរូបជាមួយអតីតអភិបាលខេត្តមួយនេះ បីរូបផ្សេងទៀត គឺលោក ណាំ ទុំ (២០០៣-២០០៩) លោក ឈុន ឈន់ (២០០៩-២០១៣) និងលោក អ៊ុត សំអន (២០១៣-២០១៦) ។
លោក សុខ លូ បានថ្លែងប្រាប់សារព័ត៌មានថ្មីៗ តាមទូរសព្ទថា លោកពិតជារីករាយក្នុងការទទួលយកយោបល់នានាពីអតីតអភិបាលខេត្តដើម្បីអភិវឌ្ឍន៍ខេត្តកំពង់ធំ។ លោកបានបញ្ជាក់ថា៖ «ខ្ញុំធ្លាប់ធ្វើជាមន្ត្រី ជានាយខុទ្ទកាល័យ និងជាអភិបាលខេត្តរង ក្រោមការដឹកនាំរបស់អតីតអភិបាលខេត្តទាំងនេះ ខ្ញុំបានរៀនសូត្រ និងដឹងពីការដឹកនាំរបស់ពួកគាត់»។
លោក សុខ លូ បានអះអាងថា លោកនឹងអនុវត្តតាមចំណុចល្អៗដែលអភិបាលខេត្តមុនៗបានបន្សល់ទុក ដើម្បីការរីកចម្រើនរបស់ខេត្តកំពង់ធំ។ រូបថតនេះ អាចជាគំរូនៃសាមគ្គីភាពរបស់ថ្នាក់ដឹកនាំចាស់-ថ្មី....៕
© រក្សាសិទ្ធិដោយ thmeythmey.com