អន្តរជាតិ
កូរ៉េខាងជើង ប្រាប់ អូបាម៉ា ឲ្យគិតតែរៀបបង្វេចចេញពីសេតវិមានទៅ កុំខ្វល់រឿងសិទ្ធិមនុស្សពេក
× កូរ៉េខាងជើង បានរិះគន់រដ្ឋបាលប្រធានាធិបតីចប់អាណត្តិ បារ៉ាក់ អូបាម៉ា ដែលសម្រេចដាក់ជនជាតិកូរ៉េខាងជើង៦នាក់ រួមទាំងប្អូនស្រីប្រមុខដឹកនាំកូរ៉េខាងជើង គីម ជុងអ៊ុន ក្នុងបញ្ជីខ្មៅ។ តាមរយៈសារព័ត៌មានរដ្ឋ KCNA កូរ៉េខាងជើង ក៏បានប្រាប់ប្រធានាធិបតីចប់អាណត្តិរូបនេះ ឲ្យគិតតែរឿងរៀបចំអីវ៉ាន់របស់ខ្លួន និងមិនចាំបាច់ខ្វល់ខ្វាយច្រើនពីរឿងកំណត់ត្រាសិទ្ធិមនុស្សរបស់ខ្លួនឡើយ ដ្បិតអាមេរិកក៏រំលោភសិទ្ធិមនុស្សដែរ។
«អូបាម៉ា មិនគួរចំណាយពេលយកបញ្ហាមួយទៅភ្ជាប់នឹងបញ្ហាសិទ្ធិមនុស្សឡើយ ប៉ុន្តែគួររៀបបង្វេចឲ្យល្អចេញពីសេតវិមានទៅ»។ នេះជាការណែនាំរបស់កូរ៉េខាងជើងទៅកាន់ប្រធានាធិបតីចប់អាណត្តិ បារ៉ាក់ អូបាម៉ា តាមរយៈសេចក្ដីប្រកាសរបស់សារព័ត៌មានរដ្ឋ KCNA នៅយប់ថ្ងៃទី១៦ ខែមករា ដែលចេញផ្សាយដោយសារព័ត៌មាន CNN ។ កូរ៉េខាងជើង ក៏ថែមទាំងរិះគន់រដ្ឋបាលលោក អូបាម៉ា ដោយហៅអាមេរិកថា ជាកន្លែងរំលោភសិទ្ធិមនុស្សដ៏ធំទៀតផង។
កាលពីសប្ដាហ៍មុន ក្រសួងរតនាគារអាមេរិក បានបន្ថែមបុគ្គលសំខាន់ៗរបស់កូរ៉េខាងចំនួន៦នាក់ ទៅក្នុងបញ្ជីខ្មៅរបស់ខ្លួនដោយសារការរំលោភសិទ្ធិមនុស្សធ្ងន់ធ្ងរ។ កូរ៉េខាងជើង ទំនងជាខឹងខ្លាំងលើរឿងនេះ ព្រោះសូម្បីលោកស្រី Yo-jong ជាប្អូនស្រីលោក គីម ជុងអ៊ុន និងជាមន្ត្រីជាន់ខ្ពស់គណបក្សពលករកូរ៉េ ក៏ជាប់ឈ្មោះដែរ។ ក្រៅពីនេះ មន្ត្រីជាន់ខ្ពស់មកពីក្រសួងសន្តិសុខរដ្ឋ និងក្រសួងសន្តិសុខប្រជាជន ក៏ត្រូវដាក់ក្នុងបញ្ជីខ្មៅលើកនេះផងដែរ។
ការបញ្ចូលឈ្មោះឥស្សរជនកូរ៉េខាងជើងក្នុងបញ្ជីខ្មៅនេះ ធ្វើឡើងបន្ទាប់ពីក្រសួងការបរទេសអាមេរិក បញ្ចេញរបាយការណ៍សិទ្ធិមនុស្សមួយ ដែលចាត់ទុកស្ថានភាពសិទ្ធិមនុស្សនៅកូរ៉េខាងជើងថា អាក្រក់ជាងគេលើពិភពលោក។ អ្នកនាំពាក្យក្រសួងការបរទេស Mark Tone និយាយថា ក្រុងព្យុងយ៉ាង បានបន្តការទុក្ខបុកម្នេញប្រជាជនដូចជា ការធ្វើទារុណកម្ម បង្ខំឲ្យធ្វើការធ្ងន់ធ្ងរ ចាប់ឃុំខ្លួនដោយបង្ខំ និងការសម្លាប់ក្រៅច្បាប់ជាដើម។
ជាការឆ្លើយតបនឹងរបាយការណ៍ខាងលើ ក្រុងព្យុងយ៉ាង អះអាងថា អាមេរិក មិនស័ក្តិសមនឹងនិយាយរឿងសិទ្ធិមនុស្សឡើយ ដ្បិតអាមេរិក គឺជាអ្នករំលោភសិទ្ធិមនុស្សធំជាងគេលើពិភពលោក និងជាកន្លែងបំពានសិទ្ធិមនុស្សធំជាងគេដែរ។ សេចក្ដីប្រកាសរបស់ KCNA បន្ថែមថា លោកអូបាម៉ា គួរតែទទួលស្គាល់កំហុសរបស់ខ្លួន ដែលនាំការឈឺចាប់ និងគ្រោះអាក្រក់មកឲ្យប្រជាជនអាមេរិក ក៏ដូចជាប្រជាជននៅទូទាំងពិភពលោក។
កូរ៉េខាងជើង បន្តបន្ទោសប្រធានាធិបតីចប់អាណត្តិរូបនេះទៀតថា បានបង្កើតស្ថានភាពសិទ្ធិមនុស្សយ៉ាងអាក្រក់នៅអាមេរិក អំឡុងពេល៨ឆ្នាំនៃការកាន់តំណែងប្រធានាធិបតីរបស់ខ្លួន។ ទំនាក់ទំនងរវាងអាមេរិក និងកូរ៉េខាងជើង មិនល្អឡើយក្រោមអាណត្តិដឹកនាំរបស់លោក អូបាម៉ា។ ប៉ុន្តែក្រុងព្យុងយ៉ាង ប្រហែលជាធូរទ្រូងបន្តិច ក្រោយការឡើងកាន់តំណែងរបស់លោក ដូណាល់ ត្រាំ ព្រោះលោកអះអាងថា គោលនយោបាយរបស់លោក អូបាម៉ា និងលោក ប៊ូស នឹងមិនបន្តទៀតទេ៕
Tag:
កូរ៉េខាងជើង
បារ៉ាក់ អូបាម៉ា
សិទ្ធិមនុស្ស
© រក្សាសិទ្ធិដោយ thmeythmey.com