អន្តរជាតិ
ខួប៥០ឆ្នាំអាស៊ាន នាយករដ្ឋមន្ត្រីសិង្ហបុរី ឲ្យគ្រួសារអាស៊ានជួយលើកកម្ពស់យុទ្ធនាការទេសចរណ៍ «VisitASEAN@50»
× ការឈានមកដល់អាយុកាល៥០ឆ្នាំនៃការបង្កើតនិម្មាបនកម្មតំបន់«អាស៊ាន» បានក្លាយជាឱកាសពិសេសមួយសម្រាប់ប្រជាជាតិអាស៊ីអាគ្នេយ៍។ ដោយយល់ឃើញពីឱកាសវិសេសវិសាលមួយនេះ នាយករដ្ឋមន្ត្រីសិង្ហបុរី លោក លី សៀនឡុង បានឆ្លៀតឱកាសដើម្បីលើកកម្ពស់ពីស្ថាប័ន និងដំណើរទៅមុខដើម្បីផលប្រយោជន៍ឈ្នះទាំងអស់គ្នា ដោយលោក បានស្នើឲ្យគ្រួសារអាស៊ានផ្តោតលើវិស័យទេសចរណ៍ជាសំខាន់។
សក្តានុពលរបស់ប្រទេសអាស៊ាន រួមជាមួយនឹងការបន្តសហការគ្នាអភិវឌ្ឍ លោក ជឿជាក់ថា នឹងធ្វើឲ្យប្រទេសទាំងអស់ទទួលផលប្រយោជន៍។
លោកនាយករដ្ឋមន្ត្រី លី សៀងឡុង នៅថ្ងៃ១៨ មករា បានថ្លែងនៅក្នុងវេទិកាទេសចរណ៍អាស៊ាននៅសិង្ហបុរី ថា សមាគមប្រជាជាតិអាស៊ីអាគ្នេយ៍ រពឹងថា នឹងទទួលបានភ្ញៀវទេសចរបរទេសរហូតដល់១២១លាននាក់នៅក្នុងឆ្នាំ២០១៧នេះ។ ដោយមិនត្រឹមតែបញ្ជាក់ការរំពឹងប៉ុណ្ណោះនោះទេ លោកនាយករដ្ឋមន្ត្រី ក៏បានលើកឡើងនូវមធ្យោបាយបីសំខាន់ដើម្បីជំរុញ និងលើកកម្ពស់វិស័យនេះ រួមមាន ការពង្រឹងប្រព័ន្ធហោះហើរ បង្កើតកម្មវិធីដំណើរកម្សាន្ត្ និងការអភិវឌ្ឍប្រកបភាពទាក់ទាញ។
លោក លី បានយល់ឃើញថា វិស័យទេសចរណ៍ គឺជាវិស័យមួយដែលអាស៊ានអាចធ្វើរួមគ្នា ទទួលបានផលប្រយោជន៍«ឈ្នះ-ឈ្នះ» តាមរយៈការជួយស្រោចស្រង់សេដ្ឋកិច្ច បង្កើតការងារកាន់តែច្រើន និងជំរុញឲ្យប្រជាជនឲ្យចូលរួមទាំងអស់គ្នាផងដែរ។
លោក បន្តទៀតថា៖« ក៏ព្រោះតែអាស៊ាន មានក្រុមកណ្តាល(សេដ្ឋកិច្ច)ដែលមានការលូតលាស់ឆាប់រហ័ស ហើយប្រជាជន ក៏កាន់តែធូរធារទៅ ហើយ មួយចំនួននៃពួកគេ ក៏ចង់ធ្វើដំណើរកម្សាន្តជុំវិញពិភពលោកផងដែរ។ ទន្ទឹមនឹងនេះ អាស៊ាន ខ្លួនឯងផ្ទាល់ ក៏អាចផ្តល់នូវការទាក់ទាញជាច្រើនសម្រាប់ភ្ញៀវទេសចរដែលចង់មកទស្សនានៅក្នុងតំបន់អាស៊ីអាគេ្នយ៍»។
អ្វីគួរកត់សម្គាល់នោះ ស្របខួបនៃ៥០ឆ្នាំនៃការបង្កើតអាស៊ាននោះ លោកនាយករដ្ឋមន្ត្រីនៃប្រទេសអាស៊ានដែលមានជាងគេរូបនេះ ក៏បានលើកយុទ្ធនាការទីផ្សារ និងផ្សព្វផ្សាយពីទេសចរណ៍អាស៊ាន ដូចជា «VisitASEAN@50» ជាដើម។ យុទ្ធនាការVisitASEAN@50 គឺជាយុទ្ធការលើកកម្ពស់វិស័យទេសចរណ៍របស់អាស៊ាន ដោយក្នុងនោះ មានកម្មវិធីពិសេស៥០ និងកន្លែងបទពិសោធន៍កម្សាន្ត៥០ របស់ប្រទេសទាំងដប់របស់អាស៊ាន ដែលទិសដៅសម្រាប់ភ្ញៀវទេសចរណ៍។
សូមជម្រាបផងដែរថា សមាគមប្រជាជាតិអាស៊ីអាគ្នេយ៍ បានបង្កើតឡើងជាផ្លូវការនៅថ្ងៃទី០៨ សីហា ឆ្នាំ១៩៦៧៕
© រក្សាសិទ្ធិដោយ thmeythmey.com