បក្សកុម្មុយនីស្តចិន ប្រាប់ប៉ូលិសនិងមន្ត្រីតុលាការឲ្យស្មោះត្រង់បក្សដាច់ខាត

អន្តរជាតិ

បក្សកុម្មុយនីស្តចិន ប្រាប់ប៉ូលិសនិងមន្ត្រីតុលាការឲ្យស្មោះត្រង់បក្សដាច់ខាត

19, Jan 2017 , 2:43 pm

រូបភាព

ដោយ: តន ចាន់រិទ្ធារ៉ា

បក្សកុម្មុយនីស្តចិន បានចេញសេចក្ដីណែនាំព្រមានមួយទៅកាន់សមត្ថកិច្ចអនុវត្តច្បាប់ និងក្រុមមន្ត្រីតុលាការ ដោយប្រាប់ឲ្យពួកគេស្មោះត្រង់នឹងបក្សឲ្យបានដាច់ខាត។ ការចេញសេចក្ដីណែនាំនេះ ធ្វើឡើងទន្ទឹមនឹងការបោសសម្អាតមន្ត្រីពុករលួយតាំងពីថ្នាក់ទាប ដល់មន្ត្រីថ្នាក់ខ្ពស់ ជាពិសេសក្រោយការកាត់ទោសអតីតរដ្ឋមន្ត្រីសន្តិសុខ Zhou Yong Kang ដែលទទួលបន្ទុកគ្រប់គ្រងលើអង្គភាពប៉ូលិសរបស់ប្រទេសរួចមក។

ការកាត់ទោសលោក Zhou Yong Kang អតីតសមាជិកការិយាល័យនយោបាយដ៏មានអំណាច និងជាអតីតមេសន្តិសុខជាតិនៃបក្សកុម្មុយនីស្តចិន បង្កការជាការព្រួយបារម្ភជាខ្លាំងក្នុងចំណោមមន្ត្រីប៉ូលិស ដែលធ្លាប់ស្ថិតក្រោមការគ្រប់គ្រងរបស់លោក។ បក្សកុម្មុយនីស្តចិនផ្ទាល់ ក៏ទំនងជាបារម្ភមិនតិចដែរលើរឿងនេះ។ បក្សកុម្មុយនីស្តបារម្ភថា មន្ត្រីប៉ូលិសដែលធ្លាប់ធ្វើការឲ្យលោក Zhou ឈប់ស្មោះត្រង់នឹងបក្សទៀតមិនខាន។

យ៉ាងណាក្ដី ក្នុងសេចក្ដីប្រកាសចេញផ្សាយដោយទីភ្នាក់ងារព័ត៌មានរដ្ឋ Xinhua នៅថ្ងៃទី១៨ ខែមករាបក្សកុម្មុយនីស្តចិននិយាយថា មន្ត្រីអនុវត្តច្បាប់ និងមន្ត្រីតុលាការទាំងអស់ ត្រូវមានជំនឿនយោបាយឲ្យច្បាស់លាស់, ធ្វើការដោយវិជ្ជាជីវៈខ្ពស់ ក៏ដូចជាធ្វើការដោយមានការតាំងចិត្ត និងមានវិន័យ។ សេចក្ដីប្រកាសដដែលបន្តថា៖ «មន្ត្រីតុលាការ និងមន្ត្រីអនុវត្តច្បាប់ទាំងអស់ ត្រូវគោរពតាមនីតិរដ្ឋក្នុងប្រទេស, គោរពតាមការណែនាំរបស់បក្ស ហើយស្មោះត្រង់នឹងបក្សមិនវៀចវេរឡើយ»។

បន្ថែមពីលើការណែនាំនេះ បក្សកុម្មុយនីស្តចិន ក៏នឹងរៀបចំប្រព័ន្ធថ្មីមួយដើម្បីបណ្ដុះបណ្ដាល និងគ្រប់មន្ត្រីទាំងនោះ សំដៅធ្វើយ៉ាងណាធានាថា ពួកគេនៅតែមានភាពស្មោះត្រង់ចំពោះបក្សដដែល។ បក្សកុម្មុយនីស្តដ៏ធំមួយនេះ ក៏នឹងរឹតបន្តឹងការគ្រប់គ្រងរបស់ខ្លួន ក្នុងគោលដៅដាក់ពិន័យមន្ត្រីទាំងឡាយដែលរំលោភបំពានអំណាច និងប្រព្រឹត្តពុករលួយទៀតផង។ សេចក្ដីប្រកាសនេះ មិនបាននិយាយចំឈ្មោះលោក Zhou ឡើយ តែបក្សកុម្មុយនីស្តធ្លាប់ប្រាប់ឲ្យបោសសម្អាតឥទ្ធិពលលោកឲ្យអស់។

លោក Zhou Yong Kang ជាអតីតរដ្ឋមន្ត្រីសន្តិសុខសម័យប្រធានាធិបតី ហ៊ូ ជីនតាវ ត្រូវបានកាត់ទោសពីបទលួចស៊ីសំណូក, ធ្វើឲ្យលេចធ្លាយព័ត៌មានសម្ងាត់ និងបំពានអំណាច។ លោក Zhou គឺជាមន្ត្រីជាន់ខ្ពស់បំផុតដែលជាប់ទោសក្នុងសំណុំរឿងពុករលួយ ចាប់តាំងពីបក្សកុម្មុយនីស្តឡើងកាន់
អំណាចក្នុងឆ្នាំ១៩៤៩ មក។

ក្រោយការឡើងកាន់អំណាចក្នុងឆ្នាំ២០១៣ មក លោក ស៊ី ជិនភីង ដែលជាប្រធានាធិបតី និងជាអគ្គលេខាបក្សកុម្មុយនីស្តផងនោះ បានប្រមូលចាត់វិធានការក្ដោបអំណាចយ៉ាងពេញដៃ និងបានបើកយុទ្ធនាការបោសសម្អាតនៅទូទាំងប្រទេសដោយមិនលើកលែងឡើយ។ លោកធ្លាប់អះអាងថា មិនថារុយ ឬខ្លាឡើយ ត្រូវតែសម្អាតឲ្យល្អ។ នេះ គឺលោកចង់សំដៅថា មិនថាមន្ត្រីទាប ឬមន្ត្រីខ្ពស់ប៉ុណ្ណាឡើយ ត្រូវតែកាត់ទោសជាដាច់ខាត បើធ្វើខុសមែន៕