លោក នុត សាវនា៖មន្ត្រីជំនាញរកឃើញអ្នកទោស៨នាក់មានផ្ទុកសារធាតុញៀន

ជាតិ

សង្គមជាតិ

លោក នុត សាវនា៖មន្ត្រីជំនាញរកឃើញអ្នកទោស៨នាក់មានផ្ទុកសារធាតុញៀន

19, Jan 2017 , 4:37 pm

រូបភាព

លោក នុត សាវនា អ្នកនាំពាក្យអគ្គនាយកដ្ឋានពន្ធនាគារ។ រូបភាពពីហ្វេសប៊ុកអគ្គនាយកដ្ឋានពន្ធនាគារក្រសួងមហាផ្ទៃ

ដោយ: ខន ចំប៉ា

ក្រោយការធ្វើតេស្ត រកសារធាតុញៀនលើអ្នកជាប់ឃុំជាង២ពាន់នាក់រួចមក មន្ត្រីជំនាញបានរកឃើញអ្នកជាប់ឃុំចំនួន៨នាក់ មានផ្ទុកសារធាតុញៀន។ ប៉ុន្តែមន្ត្រីជំនាញមិនទាន់អាចបញ្ជាក់បានទេថាអ្នកទោសទាំងនោះជាអ្នកញៀនថ្មី ឬជាអ្នកដែលធ្លាប់ប្រើប្រាស់សារធាតុញៀនមុនជាប់ឃុំនោះទេ ដោយត្រូវរង់ចាំការសិក្សាជាមុនសិន។

ការធ្វើតេស្តរកសារធាតុញៀនបានចាប់ផ្តើមហើយ លើជនជាប់ឃុំក្នុងពន្ធនាគារ ដោយមានការសហការពីមន្ត្រីអគ្គស្នងការនគរបាលជាតិ និងមន្ត្រីជំនាញពីអាជ្ញាធរជាតិប្រយុទ្ធប្រឆាំងគ្រឿងញៀន។ យុទ្ធនាការនេះបានចាប់ផ្តើមនៅថ្ងៃអង្គារ ក្នុងសប្តាហ៍នេះ នៅមណ្ឌលកែប្រែទី១ ឬហៅថាពន្ធនាគារព្រៃស មុនគេ។

លោក នុត សាវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ បានបញ្ជាក់ប្រាប់សារព័ត៌មានថ្មីៗ នៅថ្ងៃព្រហស្បតិ៍នេះថា ចាប់តាំងពីថ្ងៃអង្គារមក មន្ត្រីជំនាញបានធ្វើតេស្តរកសារធាតុញៀនលើអ្នកទោសបានចំនួន២០៥២នាក់ ក្នុងនោះរកឃើញអ្នកទោសចំនួន៨នាក់ ដែលមានផ្ទុកសារធាតុញៀន។ ប៉ុន្តែយ៉ាងណាក៏ដោយមន្ត្រីជំនាញមិនទាន់អាចសន្និដ្ឋានបានទេថាតើអ្នកទោសដែលរកឃើញផ្ទុកសារធាតុញៀនទាំងនោះ ជាអ្នកទោសដែលទើបជាប់ឃុំថ្មី ឬអ្នកទោសដែលជាប់ឃុំយូរ ហើយមានផ្ទុកសារធាតុញៀនស្រាប់។

អ្នកនាំពាក្យអគ្គនាយកដ្ឋានពន្ធនាគារ ក៏មិនអាចនិយាយដល់ការលើកឡើងរបស់សាធារណជនកន្លងមកដែលថាមានការជួញដូរគ្រឿងញៀនក្នុងពន្ធនាគារដែរ ផ្ទុយទៅវិញលោក នុត សាវនា បានចេញមុខការពារជុំវិញករណីនេះ ដោយសំអាងលើចំនួនអ្នកទោសដែលមានផ្ទុកសារធាតុញៀនមានតិចតួច។ លោកពន្យល់ដូច្នេះថា៖ «កន្លងមកយើងតែងតែឮហើយ មានការចរាចរណ៍គ្រឿងញៀនក្នុងពន្ធនាគារ ប៉ុន្តែយើងមើល២ពាន់នាក់ ឃើញអ្នកមានសារធាតុញៀនតែ៨នាក់ បើប្រៀបធៀបតួលេខ ដែលបានធ្វើតេស្ត គឺតិចតួចណាស់»។

បច្ចុប្បន្នអ្នកកំពុងជាប់ឃុំនៅក្នុងមណ្ឌលកែប្រែទី១ មានជាង៤,៨០០នាក់ ហើយការធ្វើតេស្តរកសារធាតុញៀនក្នុងមណ្ឌលកែប្រែទី១នេះ នឹងត្រូវចំណាយពេលពី១ ទៅ២ សប្តាហ៍។ នេះបើតាមអ្នកនាំពាក្យអគ្គនាយកដ្ឋានពន្ធនាគារខាងលើ ដែលបន្តឲ្យដឹងថាយុទ្ធនាការនេះ នឹងត្រូវធ្វើជាបន្តបន្ទាប់ទៀតនៅពន្ធនាគារទូទាំងប្រទេស។

ឆ្នាំ ២០១៧ ជាឆ្នាំដែលអាជ្ញាធរជាតិប្រយុទ្ធប្រឆាំងគ្រឿងញៀន ដាក់គោលដៅប្រឆាំងគ្រឿងញៀនទ្រង់ទ្រាយធំនៅទូទាំងប្រទេស។ លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងក្នុងពេលកន្លងមកថា ក្រៅពីសិស្សសាលាដែលជាគោលដៅចម្បងដើម្បីធ្វើតេស្តទឹកនោមរកសារធាតុញៀននោះ មន្ត្រីរាជការ កងកម្លាំងប្រដាប់អាវុធ ក៏ជាមុខសញ្ញា ដែលក្រុមការងាររបស់លោក ត្រូវធ្វើតេស្តទឹកនោមរកសារធាតុញៀនដែរ នៅក្នុងករណីចាំបាច់។

រហូតមដល់ពេលនេះ មានមានមន្ត្រីកងរាជអាវុធហត្ថចំនួន៦នាក់ និងមន្ត្រីអគ្គស្នងការនគរបាលជាតិ ១នាក់ ត្រូវបានបណ្តេញពីក្របខណ្ឌ ពាក់ព័ន្ធនឹងគ្រឿងញៀននេះ។

សូមបញ្ជាក់ថា ឆ្នាំ២០១៦ កន្លងទៅ សមត្ថកិច្ច បានបង្ក្រាបបទល្មើសគ្រឿងញៀនបានចំនួន ៤,១៩១ ករណី ក្នុងនោះបទល្មើសប្រើប្រាស់គ្រឿងញៀនជាង១ពាន់ករណី។ ចាប់ខ្លួនជនសង្ស័យសរុប៩,៨០២ នាក់ ក្នុងនោះអ្នកប្រើប្រាស់មានគ្រឿងញៀន ៣,៦១១នាក់ និងរឹបអូសគ្រឿងញៀនជាង១៧៥គីឡូក្រាម។ បើតាមអាជ្ញាធរជាតិប្រយុទ្ធប្រឆាំងគ្រឿងញៀន តួលេខនៃការសម្រង់អ្នកប្រើប្រាស់គ្រឿងញៀន មានចំនួន១៨,៥៥៤នាក់ កើនឡើង៤,២៤២នាក់ ស្មើនឹង២៩,៦៣ភាគរយ ធៀបនឹងពេលមុន៕