ជាតិ
សេដ្ឋកិច្ច
ប្រមុខរដ្ឋាភិបាលកម្ពុជា ជួបថ្នាក់ដឹកនាំគណៈកម្មការអឺរ៉ុប កន្លងមក
×![]()
ដោយ: ភួង វ៉ាន់ថា
រដ្ឋាភិបាលកម្ពុជា តាមរយៈក្រសួងការបរទេស បានដាក់របាយការណ៍មួយ ទៅកាន់គណៈកម្មការអឺរ៉ុប នៅពាក់កណ្តាលខែសីហា ឆ្នាំ២០១៩នេះ ដើម្បីឆ្លើយតបរាល់ចំណុចនានា ដែលត្រូវបានចោទសួរដោយគណៈកម្មការអឺរ៉ុប។ លោកកេត សោផាន់ អ្នកនាំពាក្យក្រសួងការបរទេសបានឲ្យដឹងថា របាយការណ៍នោះ និយាយយ៉ាងលម្អិតពីការគោរពលិទ្ធិប្រជាធិបតេយ្យ និងសិទ្ធិមនុស្សរបស់រដ្ឋាភិបាលកម្ពុជា។ 
លោកកេត សោផាន់ ថ្លែងប្រាប់អ្នកកាសែត ក្រោយជំនួបរវាងលោក ប្រាក់ សុខុន រដ្ឋមន្រ្តីការបរទេស និង លោក Hidehisa Hornouchi កាលពីថ្ងៃទី១៤ ខែសីហាថា របាយការណ៍ដែលកម្ពុជាដាក់ជូនទៅគណៈកម្មការអឺរ៉ុប ជាការឆ្លើយរាល់ចំណុចនានា ដែលគណៈកម្មការអឺរ៉ុបបានចោទសួរមករដ្ឋាភិបាលកម្ពុជា តាមរយៈរបាយការណ៍មួយដែលមានឈ្មោះថា «Note to the file» ដែលមានកម្រាស់៣០ទំព័រ។ លោកបន្តថា របាយកាណ៍ដែលកម្ពុជាដាក់ទៅនោះគឺបញ្ជាក់ពីលទ្ធផលដែលរដ្ឋាភិបាលបានអនុវត្តនៃការបើកលម្ហនៃលិទ្ធិប្រជាធិបតេយ្យ ការគោរពសិទ្ធិមនុស្ស និងសង្គមស៊ីវិលជាដើម។
លោកបាននិយាយថា៖«របាយការណ៍ដែលកម្ពុជាដាក់ទៅនោះ គឺឆ្លើយរាល់ចំណុចលម្អិតទាំងអស់នៅក្នុងឯកសារដែលមានឈ្មោះថា Note to the file» ។
ការដាក់របាយកាណ៍នេះ ស្របពេលដែលគណៈកម្មការអឺរ៉ុបបានបិទបញ្ចាប់ដំណើរការនិតិវិធីត្រួតពិនិត្យលើកដំបូងរបស់ខ្លួន ដែលមារយៈពេល ៦ខែ មុននឹងឈានទៅដល់ការព្យួរប្រព័ន្ធអនុគ្រោះពន្ធ EBA។
ជានីតិវិធី បន្ទាប់ពីរយៈពេល៦ខែនេះ កម្ពុជានិងអឺរ៉ុប មានពេល៣ខែពីរដងទៀត ដែលត្រូវធ្វើការជាមួយគ្នាក្នុងរឿង EBA ។ ៣ខែដំបូង គឺកម្ពុជានិងអឺរ៉ុប នៅតែបន្តពិភក្សាគ្នា ហើយ៣ខែលើកទីពីរ អឺរ៉ុប នឹងដាក់សំណើមួយទៅសមាជិករបស់ខ្លួន ដើម្បីសម្រេចថា ដក EBA ពីកម្ពុជា ឬមិនដក។
លោក កេត សោផាន់ ប្រាប់សារព័ត៌មានថ្មីៗបន្ថែមតាមទូរសព្ទថា ក្នុងឯកសារ Note to the file គណៈកម្មការអឺរ៉ុប ក៏បានបន្តទាមទារនូវអ្វីដែលខ្លួន «ចង់បាន» ផងដែរ។ ប៉ុន្តែ លោក មិនបញ្ជាក់ថា ពាក្យ «ចង់បាន» របស់គណៈកម្មការអឺរ៉ុប គឺជាអ្វីនោះទេ។ ប៉ុន្តែ លោក បង្ហើបថា អ្វីដែលគណៈកម្មការអឺរ៉ុបចង់បាននិងទាមទារ គឺដូចលើកមុនដដែល។
កន្លងមក គណៈកម្មការអឺរ៉ុប បានទាមទារលក្ខខណ្ឌមួយចំនួនពីរដ្ឋាភិបាលកម្ពុជា ដូចជា ទម្លាក់បទចោទចេញពីលោក សម រង្ស៊ី លោក កឹម សុខា និង អ្នកនយោបាយដទៃទៀតនៃគណបក្សប្រឆាំង។ លើសពីនេះ គណៈកម្មការអឺរ៉ុប នៅទាមទារឲ្យរដ្ឋាភិបាលកម្ពុជា អនុញ្ញាតឲ្យអតីតគណបក្ស ធ្វើសកម្មភាពដូចមុន និងផ្តល់តំណែងដល់មន្ត្រីនៃគណបក្សនេះឡើងវិញ៕
Tag:
EU
EBA
កេត សោផាន់
© រក្សាសិទ្ធិដោយ thmeythmey.com
