ជាតិ
សេដ្ឋកិច្ច
លោក ហេង សួរ៖ ខេត្តព្រះសីហនុ មានការងារជិត២ម៉ឺនកន្លែង សម្រាប់អ្នកបាត់បង់ការងារពីកាស៊ីណូ
លោក ហេង សួរ អ្នកនាំពាក្យក្រសួងការងារ (រូបភាពក្រសួងការងារ និងបណ្ដុះបណ្ដាលវិជ្ជាជីវៈ)
×![]()
ដោយ: ឡាយ សុភាវតី
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា ការបញ្ឈប់ល្បែងអនឡាញ បណ្តាលឲ្យកាស៊ីណូជាង៦០ ត្រូវបិទទ្វារនៅខេត្តព្រះសីហនុ ហើយធ្វើឲ្យបុគ្គលិកជាង៨ពាន់នាក់ បាត់បង់ការងារ។ លោក អះអាងថា ខេត្តព្រះសីហនុ មានតំបន់សេដ្ឋកិច្ច២ ដែលមានការងារជាង២ម៉ឺនកន្លែងសម្រាប់អ្នកបាត់បង់ការងារពីកាស៊ីណូ។ 
ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទនៅថ្ងៃទី៩ ខែមករា ឆ្នាំ២០២០ លោក ហេង សួរ លើកឡើងថា មានតែនៅខេត្តព្រះសីហនុប៉ុណ្ណោះ ដែលមានបុគ្គលិកបាត់បង់ការងារ ពីការបិទកាស៊ីណូជាបន្តបន្ទាប់មកនេះ។ លោក បញ្ជាក់ដូច្នេះថា៖«ជាង៦០កាស៊ីណូប ដែលបិទនៅព្រះសីហនុ ធ្វើឲ្យនិយោជិតជាង៨ពាន់នាក់ បាត់បង់ការ។ រីឯនៅខាងប៉ោយប៉ែត បាវិត នៅដំណើរការធម្មតា មិនមានការកាត់បន្ថយចំនួនបុគ្គលិនោះទេ»។
យ៉ាងណាក៏ដោយ អ្នកនាំពាក្យរូបនេះ អះអាងថា នៅមានការងារជិត២ម៉ឺនកន្លែងនៅតំបន់សេដ្ឋកិច្ចខេត្តព្រះសីហនុ សម្រាប់អ្នកបាត់បង់ការងារពីកាស៊ីណូ។ លោក និយាយបែបនេះថា៖«ឱកាសការងារថ្មីនៅតំបន់សេដ្ឋកិច្ចពិសេស២ នៅខេត្តព្រះសីហនុមានរហូតដល់ជិត២ម៉ឺនកន្លែង ប្រសិនបើបងប្អូនចាប់អារម្មណ៍រកការងារថ្មី គឺមិនមានការខ្វះខាតការងារឡើយ សម្រាប់៨ពាន់នាក់ដែលបាត់បង់ការងារ។ ការងារជាង២ម៉ឺនកន្លែងនេះ គឺជាប្រភេទការងាររដ្ឋបាល និងជាកម្មករក្នុងរោងចក្រជាដើម»។
លោក រស់ ភីរុណ អគ្គនាយករងនៃអគ្គនាយកដ្ឋានឧស្សាហកម្មហិរញ្ញវត្ថុក្រសួងសេដ្ឋកិច្ច ប្រាប់សារព័ត៌មានថ្មីៗថា នៅឆ្នាំ២០១៩ ក្រសួង ទទួលពាក្យស្នើសុំចុះបញ្ជីកាស៊ីណូ២១៨ ហើយក្រសួងបានចុះបញ្ជីឲ្យ១៨៣កាស៊ីណូ ប៉ុន្តែដំណើរការបាន១៣៦កាស៊ីណូ។ លោក បន្តថា ក្រសួង ប្រមូលពន្ធបាន៨០លានដុល្លារពីកាស៊ីណូ ក្នុងឆ្នាំ២០១៩។
បើតាមការបញ្ជាក់របស់លោក រស់ ភីរុណ កាស៊ីណូនៅកម្ពុជាមានការថយចុះគ្រប់តំបន់ លើកលែងតែរាជធានីភ្នំពេញ។ លោក បង្ហាញតួលេខថា ឆ្នាំ២០១៩ ដល់ឆ្នាំ២០២០ កាស៊ីណូនៅខេត្តព្រះសីហនុ១០៨កន្លែង នៅសល់៥៦កន្លែង, ព្រំដែនវៀតណាម៣៧កន្លែង នៅសល់២៤កន្លែង, បាវិត១៧កន្លែង នៅសល់១២កន្លែង, ព្រំដែនថៃ២២កន្លែង នៅសល់១២កន្លែង ហើយនៅតំបន់ប៉ោយប៉ែត២៥កន្លែង នៅសល់១៤កន្លែង។ លោក អះអាងថា នៅមានចំនួនកាស៊ីណូថយចុះជាបន្តបន្ទាប់ទៀត៕
Tag:
កាស៊ីណូ
© រក្សាសិទ្ធិដោយ thmeythmey.com
