សង្គមជាតិ
នគរបាលភ្នំពេញ ឲ្យម្ចាស់ម៉ូតូច្នៃស៊ីមាំង ដែលបង្កការរំខានមកធ្វើកិច្ចសន្យានិងយកម៉ូតូវិញ
×
ភ្នំពេញ៖ ស្នងការដ្ឋាននគរបាលរាជធានីភ្នំពេញ បានចេញសេចក្ដីប្រកាសដល់ម្ចាស់ម៉ូតូដែលកែច្នៃស៊ីមាំងបង្កសំឡេងរំខាន មកធ្វើកិច្ចសន្យា និងយកម៉ូតូត្រឡប់ទៅវិញ ដែលស្នងការបានឃាត់ម៉ូតូចាប់ពីថ្ងៃទី១០ ខែធ្នូ ឆ្នាំ២០២០ រហូតដល់ថ្ងៃទី២៥ ខែមករា ឆ្នាំ២០២១។ នេះបើតាមសេចក្ដីជូនដំណឹងរបស់ស្នងការដ្ឋាននគរបាលរាជធានីភ្នំពេញនៅថ្ងៃទី២៥ ខែមករា ឆ្នាំ២០២១។
បើតាមស្នងការដ្ឋាននគរបាលរាជធានីភ្នំពេញ ម៉ូតូដែលសមត្ថកិច្ចឃាត់និងយកមករក្សាទុកមានចំនួន១០គ្រឿង និងគ្មានស្លាកលេខមួយគ្រឿងដែលម្ចាស់មិនទាន់យកស៊ីមាំងដើមមកដូរ និងមកធ្វើកិច្ចសន្យាដើម្បីយកម៉ូតូទៅវិញ។ បច្ចុប្បន្នម៉ូតូទាំងនោះ កំពុងតែរក្សាទុកនៅអធិការដ្ឋាននគរបាលខណ្ឌដូនពេញ ព្រោះម្ចាស់យានយន្តមួយចំនួនមិនទាន់ចូលខ្លួនដោះស្រាយជាមួយសមត្ថកិច្ចនៅឡើយ។
ក្រោយឃាត់ម៉ូតូកែច្នៃទាំងនោះសមត្ថកិច្ចបានទុករយៈពេល៣ថ្ងៃ ដើម្បីឲ្យម្ចាស់ម៉ូតូចូលខ្លួនដោះស្រាយ តែរហូតពេលនេះមិនទាន់ឃើញម្ចាស់ម៉ូតូចូលខ្លួនដោះស្រាយ ទើបស្នងការដ្ឋាននគរបាលរាជធានីភ្នំពេញចេញសេចក្ដីជូនដំណឹងដល់ម្ចាស់ម៉ូតូទាំងនោះ៕
© រក្សាសិទ្ធិដោយ thmeythmey.com