កីឡាករ វណ្ណា ង៉ា ជនជាតិភាគតិចទំពួនចូលហ្វឹកហាត់គុនល្បុក្កតោ ព្រោះតែចង់ចូលរួមចំណែកអភិរក្ស និងអភិវឌ្ឍន៍ ក៏ដូចជាបង្ហាញពិភពលោកឲ្យស្គាល់ពីក្បាច់គុន ដែលជាកេរតំណែលរបស់បុព្វបុរសខ្មែរ ។ កាលពីសប្តាហ៍មុន កីឡាករមកពីខេត្តរតនគិរីរូបនេះ បានបង្ហាញខ្លួនលើកដំបូងក្នុងការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិប្រចាំឆ្នាំ២០២០ ក្រោយហ្វឹកហាត់បានប្រមាណកន្លះឆ្នាំ។
កីឡាករជនជាតិដើមភាគតិចទំពួន វណ្ណា ង៉ា បានដាក់ពាក្យសុំច្បាប់ក្រុមហ៊ុនឈប់សម្រាកចំនួន៣ថ្ងៃ ដើម្បីធ្វើដំណើរពីខេត្តរតនគិរី មកចូលរួមប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិនៅរាជធានីភ្នំពេញ។ លទ្ធផលចាញ់ ឬឈ្នះមិនសំខាន់នោះទេសម្រាប់កីឡាកររូបនេះ ពោលគឺធ្វើយ៉ាងណាឲ្យតែបានបង្ហាញសមត្ថភាពនៅលើទីលានប្រកួត។
កីឡាករ វណ្ណា ង៉ា ជនជាតិដើមភាគតិចទំពួន ពេលផ្តល់បទសម្ភាសដល់អ្នកសារព័ត៌មានក្រោយចប់ការប្រកួត
សិស្សគុនមកសាលាគុនរតនឦសានរូបនេះ ដាក់ក្តីរំពឹងតិចតួចប៉ុណ្ណោះក្នុងការប្រជែងដណ្តើមមេដាយពីការប្រកួតជើងឯកថ្នាក់ជាតិប្រចាំឆ្នាំ២០២០ ដ្បិតរូបគេគ្មានពេលហ្វឹកហាត់គ្រប់គ្រាន់ ដោយសាររវល់ជាមួយការងារ។ វណ្ណា ង៉ា មិនត្រឹមតែជាកីឡាករគុនល្បុក្កតោនោះទេ រូបគេជាអនុប្រធានផ្នែកខាសាធនាគារ Phillip Bank ប្រចាំខេត្តរតនគិរី។
«ល្បុក្កតោនេះខ្ញុំចូលហ្វឹកហាត់បានប្រមាណជាកន្លះឆ្នាំ តែដោយសារយើងរវល់ធ្វើការផង ដូច្នេះយើងហាត់បានតិចបំផុត ដោយសារយើងឆ្លៀតតិចៗនៅពេលទំនេរ។ ដោយសាររវល់ជាមួយការងារខ្ញុំបានឆ្លៀតសុំច្បាប់គេមកចូលរួមប្រកួត ព្រោះការស្រឡាញ់ និងចង់ឲ្យគេស្គាល់»។ នេះជាការលើកឡើងរបស់កីឡាករ វណ្ណា ង៉ា។
កីឡាករជនជាតិដើមភាគតិចរូបនេះ បានបញ្ជាក់ពីគោលបំណងនៃការចូលហ្វឹកហាត់គុនល្បុក្កតោថា ដោយសាររូបគេស្រឡាញ់ និងចង់ចូលរួមអភិរក្ស និងអភិវឌ្ឍន៍វិស័យកីឡាវប្បធម៌ ប្រពៃណីមួយនេះ។ ម្យ៉ាងទៀត រូបគេ ចង់ក្លាយជាផ្នែកមួយក្នុងការជួយផ្សព្វផ្សាយពីវិស័យកីឡា ដែលជាកេរតំណែលរបស់បុព្វបុរសមួយនេះ ឲ្យកាន់តែមានភាពល្បីល្បាញនៅលើឆាកអន្តរជាតិ។
កូនសិស្សរបស់លោក វី តារ៉ា រូបនេះ មិនបានប្រាប់ឪពុកម្តាយ ឬបងប្អូនពីការចូលរួមប្រកួតរបស់ខ្លួននោះទេ ដ្បិតរូបគេមិនចង់ឲ្យឪពុកម្តាយព្រួយបារម្ភ។ ឪពុកម្តាយ និងសាច់ញាតិបានដឹងពីដំណឹងចូលរួមប្រកួតរបស់ ង៉ា ពេល រូបគេ ខលប្រាប់ក្រោយទទួលបានជ័យជម្នះលើគូប្រកួតក្នុងជំនួបបើកឆាករបស់ខ្លួន។
បន្ទាប់ពីបានដឹងដំណឹងពីការចូលរួមប្រកួត និងឃើញរបួសនៅលើផ្ទៃមុខរបស់កូន ឪពុកម្តាយរបស់គេ មានការភ្ញាក់ផ្អើលយ៉ាងខ្លាំង ហើយបាននិយាយរារាំងដោយមិនចង់ឲ្យរូបគេបន្តការប្រកួតនោះទេ។ ប៉ុន្តែអ្នកគុនល្បុក្កតោមកពីខេត្តរតនគិរីរូបនេះ ឆ្លើយតបវិញថា រូបគេមិនអីនោះទេ គ្រាន់តែត្រូវរបួសតិចតួចប៉ុណ្ណោះ។
សម្រាប់កីឡាករ វណ្ណា ង៉ា ការហាត់ក្បាច់គុនមិនត្រឹមតែជួយឲ្យមានកាយរឺងមាំ និងស្មារតីរហ័សរហួននោះទេ តែវាជាវិធីសាស្ត្រមួយក្នុងការការពារ និងបង្ការជំងឺផ្សេងៗ។ រូបគេ អះអាងថា៖«អ្វីក៏ដោយ លុយ ឡានក៏ដោយ ប្រសិនបើយើងមានហើយ តែអត់មានសុខភាពល្អ ក៏យើងរស់នៅគ្មានសេចក្តីសុខដែរ។ ចុះបើយើងហាត់ប្រាណ ហាត់ក្បាច់គុន ហើយមានសុខភាពរឹងមាំ ទោះបីអត់លុយចាយ ឲ្យមានបាយហូប គឺអាចរស់នៅបាន។ តែបើសុខភាពមិនល្អរស់នៅមិនបានស្រួលនោះទេ»។
កីឡាករ វណ្ណា ង៉ា ពេលឡើងទទួលបំពាក់មេដាយប្រាក់ពីព្រឹទ្ធាចារ្យ សាន គីមស៊ាន អនុប្រធានសហព័ន្ធកីឡាគុនល្បុក្កតោកម្ពុជា
សម្រាប់ការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិប្រចាំឆ្នាំ២០២០ កីឡាករ វណ្ណា ង៉ា ទទួលបានមេដាយប្រាក់លើវិញ្ញាសាប្រយុទ្ធទម្ងន់៥៤-៥៦គីឡូក្រាម ក្រោយចាញ់កីឡាករ សុខ ប៊ុនយ៉ុង ដែលជាកីឡាករជម្រើសជាតិនៅវគ្គផ្តាច់ព្រ័ត្រ។ ទោះបីវាជាលទ្ធផលលើសការរំពឹងទុក តែកីឡាកររូបនេះ សុំទោសប្រជាពលរដ្ឋក្នុងខេត្តរតនគិរី ជាពិសេសជនជាតិដើមភាគតិចទំពួន ដែលរូបគេមិនអាចដណ្តើមមេដាយមាសបាន៕