ភ្នំពេញ៖ ក្រសួងសាធារណការ និងដឹកជញ្ជូន គ្រោងចុះសិក្សាលើរថយន្ត សម្រាប់ដឹកកម្មករ ដើម្បីកំណត់ឲ្យមានស្ដង់ដារ និងសុវត្ថិភាព នៅខែកុម្ភៈ ។ មេសហជីព គាំទ្រគម្រោងនេះ ព្រោះវាអាចជួយបញ្ចៀសគ្រោះថ្នាក់ដល់កម្មករ។
លោកស្រី មឹន មាណវី រដ្ឋលេខាធិការក្រសួងសាធារណការ បានសង្កេតឃើញថា ការធ្វើដំណើររបស់កម្មករនៅតែប្រឈមនឹងគ្រោះថ្នាក់ចរាចរណ៍ ដោយសារការបើកមិនគោរពច្បាប់ ដឹកលើសទម្ងន់ និងយានយន្តមិនត្រឹមត្រូវ តាមស្តង់ដារបច្ចេកទេសជាដើម។ ជាពិសេសក្រុមកម្មកររោងចក្រ ដែលងាយប្រឈមមុខជាក្រុម។
ដោយបញ្ហានេះហើយ ទើបក្រសួងសាធារណការ គ្រោងចុះពិនិត្យរថយន្តដឹកកម្មករ ដើម្បីធានាសុវត្ថិភាព ។ បើតាមលោកស្រី មឹន មាណវី ប្រភេទរថយន្តកូរ៉េ ដែលដឹកកម្មករសព្វថ្ងៃ ប្រឈមនឹងគ្រោះថ្នាក់ជាងគេ។
ក្នុងកិច្ចសម្ភាសន៍ជាមួយសារព័ត៌មានថ្មីៗតាមទូរស័ព្ទនៅថ្ងៃទី២៦មករានេះ លោកស្រី មាណវី សង្កត់ធ្ងនថា ៖ «ការផ្លាស់ប្តូររថយន្តដឹកជញ្ជូនកម្មករដែលជាប្រភេទរថយន្តកូរ៉េ នឹងកាត់បន្ថយបាននូវគ្រោះថ្នាក់ចរាចរណ៍ជាក្រុមហើយក៏ការបង្ការកូវីដ-១៩ដល់កម្មករផងដែរ។ ក្រុមបច្ចេកទេសនឹងចុះសិក្សាថាយើងនឹងកំណត់លក្ខខណ្ឌរថយន្តប្រភេទណាខ្លះ ឬកែតម្រូវឲ្យមានកន្លែងអង្គុយត្រឹមត្រូវបែបណា និងកំណត់ចំនួនកម្មករជិះជាដើម»។
គម្រោងផ្លាស់ប្ដូររថយន្តដឹកកម្មករនេះ គឺគាំទ្រពីអង្គការមូលនិធិបង្ការរបួសអាស៊ីប្រចាំកម្ពុជា ដែលត្រូវការប្រើពេលសិក្សាប្រមាណពីរខែ។ យ៉ាងណាក៏ដោយ លោកស្រី មាណវី មិនច្បាស់ថា ក្រសួងអាចដាក់ចេញគោលការណ៍ឱ្យម្ចាស់យានយន្តអនុវត្តនៅឆ្នាំ២០២១ ឬយ៉ាងណាទេ។ នោះក៏ព្រោះតែម្ចាស់រថយន្តដឹកកម្មករ ភាគច្រើនមិនមានលទ្ធភាពផ្លាស់ប្ដូរគ្រប់គ្នាទេ។
ជុំវិញគម្រោងផ្លាស់ប្ដូរមធ្យោបាយដឹកជញ្ជូនកម្មករនេះ លោក អាត ធន់ យល់ថា ជារឿងល្អសម្រាប់កម្មករ។ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជារូបនេះ ជំរុញឲ្យក្រសួងពាក់ព័ន្ធពន្លឿនគម្រោងនេះ ដោយកុំបង្អង់យូរ ព្រោះធ្លាប់មានការជជែកគ្នាច្រើនមកហើយ ប៉ុន្តែមិនទាន់ឃើញមានលទ្ធផលនៅឡើយ។
ថ្លែងប្រាប់សារព័ត៌មានថ្មីៗ លោក អាត់ ធន់ បានបញ្ជាក់ដូច្នេះថា៖ «ខ្ញុំគិតថាគម្រោងនេះល្អ ពេលគេចុះសិក្សា។ ខ្ញុំឃើញគម្រោងនេះ(ការផ្លាស់ប្ដូររថយន្តដឹកកម្មករដើម្បីធានាបានសុវត្ថិភាព)ជជែកគ្នា៤ទៅ៥ឆ្នាំហើយ អត់ឃើញទៅមុខសោះ។ កន្លងមកឃើញមានបញ្ហាគ្រោះថ្នាក់ច្រើនណាស់, អ៊ីចឹងក្រសួងពាក់ព័ន្ធគួរពន្លឿនគម្រោងនេះ ដើម្បីសុវត្ថិភាពកម្មករ»។
លោក បញ្ជាក់បន្ថែមថា រថយន្តដែលសមស្របក្នុងការដឹកកម្មករ គួរតែជាប្រភេទរថយន្តក្រុង និងរថយន្តកែច្នៃ ដែលមានកៅអីអង្គុយត្រឹមត្រូវ។
ប្រាប់សារព័ត៌មានថ្មីៗ តាមតេឡេក្រាម លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ អះអាងថា លោកមិនទាន់បានដឹងអំពីគម្រោងចុះសិក្សាលើរថយន្តដឹកកម្មករនេះ នៅឡើយទេ។
កាលពីឆ្នាំ២០២០កន្លងមក រថយន្តកូរ៉េដឹកកម្មករជួបគ្រោះថ្នាក់ចរាចរណ៍ ចំនួន១៥លើក បណ្ដាលឲ្យមានកម្មករស្លាប់៤នាក់ និងរងរបួសធ្ងន់ស្រាលជាង៣៥០នាក់។ នេះបើតាមលោកស្រី មឹន មាណវី រដ្ឋលេខាធិការក្រសួងសាធារណការ។
ប៉ុន្តែបើតាមរបាយការណ៍គ្រោះថ្នាក់ការងាររបស់បេឡាជាតិសន្តិសុខសង្គមនៅឆ្នាំ២០២០ មានកម្មករជាង១៨០០នាក់ ហើយក្នុងនោះមាន១៨៨នាក់បានស្លាប់ ដែលភាគច្រើនបង្កឡើងដោយសារគ្រោះថ្នាក់ចរាចរណ៍។ នេះបើតាមការបញ្ជាក់របស់លោក អាត ធន់ មេសហជីពនៅកម្ពុជា៕