អន្តរជាតិ
បក្សកាន់អំណាច៖ លោកស្រី ស៊ូជី នឹងបន្តកាន់តំណែងជាទីប្រឹក្សារដ្ឋមីយ៉ាន់ម៉ា
លោកស្រី អ៊ុងសាន ស៊ូជី ទីប្រឹក្សារដ្ឋមីយ៉ាន់ម៉ា។ រូបភាព៖ AFP
×![]()
ដោយ: ធៀន ភារិន្ទ
លោកស្រី អ៊ុងសាន ស៊ូជី នឹងបន្តកាន់តំណែងជាទីប្រឹក្សារដ្ឋមីយ៉ាន់ម៉ា នៅក្នុងអាណត្តិរដ្ឋាភិបាលខាងមុខ។ លោក U Zaw Myint Maung អនុប្រធានបក្សសម្ព័ន្ធជាតិដើម្បីប្រជាធិបតេយ្យ (NLD) បានលើកឡើងបែបនេះ នៅថ្ងៃទី២៤ ខែមករា។ បក្ស NLD ឈ្នះការបោះឆ្នោតសម្រាប់អាណត្តិទីពីរកាលពីការបោះឆ្នោតខែវិច្ឆិកា ឆ្នាំ២០២០។
បក្សសម្ព័ន្ធដើម្បីប្រជាធិបតេយ្យ បានទទួលបានជ័យជម្នះភ្លូកទឹកភ្លូកដីនៅក្នុងការបោះឆ្នោតទូទៅក្នុងខែវិច្ឆិកា ឆ្នាំ២០២០ កន្លងមក។ ជ័យជម្នះនេះ នាំឱ្យមានពាក្យលេចឡើងថា លោកស្រីអ៊ុងសាន ស៊ូជី ទីប្រឹក្សារដ្ឋមីយ៉ាន់ម៉ា នឹងបន្តកាន់តំណែងនេះបន្តទៀត នៅក្នុងអាណត្តិរដ្ឋាភិបាលខាងមុខ។
ទាក់ទិននឹងបញ្ហានេះ អនុប្រធានបក្សសម្ព័ន្ធជាតិដើម្បីប្រជាធិបតេយ្យ លោក U Zaw Myint Maung បានបញ្ជាក់ថា លោកស្រីស៊ូជី នឹងបន្តកាន់តំណែងទីប្រឹក្សារដ្ឋ។ «ដោយវាជារឿងចាំបាច់ យើងនឹងបន្តតំណែងរបស់លោកស្រី អ៊ុងសាន ស៊ូជី ជាទីប្រឹក្សារដ្ឋមួយអាណត្តិទៀត»។ អនុប្រធានបក្សសម្ព័ន្ធជាតិដើម្បីប្រជាធិបតេយ្យ បានបញ្ជាក់បែបនេះនៅថ្ងៃទី២៤ ខែមករាកន្លងទៅ។
នៅក្នុងរដ្ឋធម្មនុញ្ញមីយ៉ាន់ម៉ា លោកស្រី ស៊ូជី មិនអាចកាន់តំណែងជាប្រធានាធិបតីបានឡើយ ព្រោះលោកស្រីស៊ូជី មានកូនកាន់សញ្ជាតិអង់គ្លេស ដែលរដ្ឋធម្មនុញ្ញមីយ៉ាន់ម៉ា ហាមឃាត់លើចំណុចនេះ។ យ៉ាងណាមិញ បន្ទាប់ពីឈ្នះការបោះឆ្នោតនៅក្នុងឆ្នាំ២០១៥ តំណែងទីប្រឹក្សារដ្ឋនេះ ត្រូវបានបង្កើតឡើង ដើម្បីអនុញ្ញាតឱ្យលោកស្រី ស៊ូជី ដឹកនាំប្រទេសបាន។
តាមការចុះផ្សាយរបស់សារព័ត៌មាន The Irrawaddy អាណត្តិទីប្រឹក្សារដ្ឋនេះ មានរយៈពេលស្មើនឹងអាណត្តិប្រធានាធិបតី។ តំណែងទីប្រឹក្សារដ្ឋ និងប្រធានាធិបតី នឹងអស់អាណត្តិនៅក្នុងខែមីនា ខាងមុខ។ ដើម្បីកាន់តំណែងជាទីប្រឹក្សារដ្ឋបាន លោកស្រីស៊ូជី ត្រូវលាលែងពីសមាជិកសភាជាន់ទាបជាមុនសិន។ នៅក្នុងការបោះឆ្នោតខែវិច្ឆិកា លោកស្រី បានជាប់ឆ្នោតជាសមាជិកសភាជាន់ទាបរបស់មីយ៉ាន់ម៉ា។
ក្នុងអាណត្តិមុនដែលនឹងបញ្ចប់ លោកស្រី ស៊ូជី ក៏បានកាន់តំណែងពីរទៀតមានរដ្ឋមន្ត្រីការិយាល័យប្រធានាធិបតី និងរដ្ឋមន្ត្រីបរទេស។ ប៉ុន្តែនៅក្នុងអាណត្តិថ្មីខាងមុខ គេមិនទាន់ច្បាស់នៅឡើយទេ ថាតើទីប្រឹក្សារដ្ឋមីយ៉ាន់ម៉ារូបនេះ នឹងបន្តកាន់តំណែងទាំងពីរនោះ ឬយ៉ាងណា។
បើសិនគ្មានការប្រើប្រួលទេ សភាថ្នាក់ជាតិមីយ៉ាន់ម៉ា នឹងបើកកិច្ចប្រជុំលើកដំបូង នៅថ្ងៃទី១ ខែកុម្ភៈ និងសភាតំបន់ និងរដ្ឋ ត្រូវបើកកិច្ចប្រជុំរបស់ខ្លួន នៅថ្ងៃទី៩ ខែកុម្ភៈ។ នៅក្នុងរដ្ឋធម្មនុញ្ញមីយ៉ាន់ម៉ា សភា ត្រូវបើកកិច្ចប្រជុំជាលើកដំបូង ក្នុងរយៈពេល ៩០ថ្ងៃ ក្រោយថ្ងៃបោះឆ្នោត។
បើទោះបីជា លទ្ធផលចុងក្រោយ បានបង្ហាញថា បក្ស NLD បានកាន់កាប់កៅអីសភា ៣៩៦អាសនៈក៏ពិតមែន ប៉ុន្តែបក្សសាមគ្គី និងអភិវឌ្ឍសហភាព (USDP) និងយោធាមីយ៉ាន់ម៉ា នៅតែបន្តអះអាងថា ការបោះឆ្នោតមានការលួចបន្លំសន្លឹកឆ្នោត និងទាមទារឱ្យមានការស៊ើបអង្កេតនៅក្នុងលទ្ធផលបោះឆ្នោតលើកនេះ៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
