COVID-19
ជាតិ
COVID-19៖ អ្នកជំងឺបារាំង៤៥នាក់ ខណៈចិន១៨នាក់ ក្នុងចំណោមជនបរទេសនៅកម្ពុជា
× ភ្នំពេញ៖ គិតត្រឹមថ្ងៃទី២៧ មករានេះ កម្ពុជា មានអ្នកជំងឺកូវីដ-១៩ ចំនួន៤៦០នាក់។ ក្រៅពីពលរដ្ឋខ្មែរ ក្នុងនោះក៏មានជនបរទេស១៨សញ្ជាតិ មានជំងឺកូវីដ-១៩ ដែរ។ នេះបើតាមរបាយការណ៍ក្រសួងសុខាភិបាល។
ជនបរទេស ដែលមានជំងឺកូវីដ-១៩ នៅកម្ពុជា ច្រើនជាងគេ គឺបារាំង៤៥នាក់ ខណៈចិន១៨នាក់។ ចំណែកឥណ្ឌូណេស៊ី១៤នាក់ ម៉ាឡេស៊ី១៣នាក់ អាមេរិក១១នាក់ អង់គ្លេស៦នាក់ ឥណ្ឌា៣នាក់ វៀតណាម៣នាក់ កាណដា៣នាក់ ជប៉ុន២នាក់ និងហុងគ្រី២នាក់។
រីឯអ្នកជំងឺ៧នាក់ទៀត គឺជនជាតិបែលហ្ស៊ិក កាហ្សាក់ស្ដង់ ប៉ូឡូញ ប៉ាគីស្ថាន នេប៉ាល់ ហ្សក់ដានី និងនីហ្សេរីយ៉ា ។ នេះបើតាមក្រសួងសុខាភិបាល ដែលបានបង្ហាញតួលេខថា អ្នកជំងឺកូវីដ-១៩ ជាជនបរទេសទាំង១៨សញ្ជាតិនេះ មានចំនួន១២៧នាក់ ខណៈពលរដ្ឋខ្មែរ៣៣៣នាក់។
អ្នកជំងឺបរទេសទាំងនេះ សុទ្ធតែជាករណីនាំចូលកម្ពុជា។កាលពីថ្ងៃទី២៨ វិច្ឆិកា ២០២០ ក៏មានករណីផ្ទុះកូវីដ-១៩ នៅកម្ពុជាដែរ ប៉ុន្តែក្រសួងសុខាភិបាល មិនបានអះអាងថា ជាករណីនាំចូល ឬកើតមានក្នុងស្រុកទេ។ ព្រឹត្តិការណ៍២៨ វិច្ឆិកានោះ នាំឱ្យមានមនុស្ស៤០នាក់ ឆ្លងកូវីដ-១៩ ។
កន្លងមករដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានកំណត់ឱ្យជនបរទេសដែលមានបំណងចូលមកកម្ពុជា ត្រូវតម្កល់ថវិកា៣ពាន់ដុល្លារ សម្រាប់ថ្លៃធ្វើតេស្តសុខភាព និងចត្តាឡីស័ក។ជាពិសេសត្រូវមានលិខិតបញ្ជាក់សុខភាព ចេញដោយអាជ្ញាធរមានសមត្ថកិច្ចផ្នែកសុខភាពនៃប្រទេសរបស់សាមីខ្លួន ដែលមានសុពលភាពមិនលើសពី ៧២ម៉ោង មុនពេលធ្វើដំណើរមកកម្ពុជា ដើម្បីបញ្ជាក់ថាខ្លួនពុំមានវីរុសកូរ៉ូណា(COVID-19)ឡើយ។
បន្ថែមពីនេះ ជនបរទេសត្រូវមានឯកសារធានារ៉ាប់រងសុខភាព ក្នុងទំហំទឹកប្រាក់យ៉ាងតិច ៥០,០០០ ដុល្លារ ក្នុងអំឡុងពេលស្នាក់នៅកម្ពុជា។ ប៉ុន្តែតម្រូវការនេះ មិនសម្រាប់មន្ត្រី នៃស្ថានតំណាងបរទេស និងអង្គការអន្តរជាតិ ដែលកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ B របស់កម្ពុជាឡើយ។នេះបើតាមលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ។
កម្ពុជា មានអ្នកជំងឺកូវីដ-១៩ សរុប៤៦០នាក់ ក្នុងនោះជាសះស្បើយ ៤២៣នាក់។ នៅសល់អ្នកជំងឺ ៣៧នាក់ទៀត កំពុងសម្រាកព្យាបាលនៅមន្ទីរពេទ្យ៕
© រក្សាសិទ្ធិដោយ thmeythmey.com