តុលាការភ្នំពេញ បន្តសួរអ្នកប្រឆាំង ពីផែនការ៩វិច្ឆិការបស់លោក សម រង្ស៊ី

ជាតិ

នយោបាយជាតិ

តុលាការភ្នំពេញ បន្តសួរអ្នកប្រឆាំង ពីផែនការ៩វិច្ឆិការបស់លោក សម រង្ស៊ី

29, Jan 2021 , 2:59 pm

រូបភាព

រូបពី AFP

ដោយ: សារព័ត៌មានថ្មីៗ

តុលាការភ្នំពេញ បានបន្តបើកសវនាការលើសំណុំរឿងរបស់ក្រុមអ្នកប្រឆាំង កាលពីព្រឹកថ្ងៃទី២៨ ខែមករា ឆ្នាំ២០២១។ សវនាការលើកនេះ មិនខុសពីលើកមុននោះទេ ដោយចៅក្រម មិនទាន់ធ្វើសេចក្តីសម្រេចអ្វីឡើយ។

ជនជាប់ចោទ ដែលបង្ហាញខ្លួនក្នុងសវនាការលើកនេះ គឺមាន៤នាក់។ តែក្នុងចំណោមអ្នកទាំង៤នោះ ចៅក្រម សួរដេញដោលបានតែ២នាក់ប៉ុណ្ណោះ។

លោក ឡោ ជុនធី មេធាវីការពារក្តីអ្នកប្រឆាំង អះអាងថា អ្វីដែលចៅក្រម សួរកូនក្តីរបស់លោក គឺពាក់ព័ន្ធនឹងការគាំទ្ររបស់ពួកគេ លើផែនការធ្វើមាតុភូមិនិវត្តរបស់លោក សម រង្ស៊ី និងថ្នាក់ដឹកនាំប្រឆាំង នៅថ្ងៃទី៩ ខែវិច្ឆិកា ឆ្នាំ២០១៩ (ផែនការ៩វិច្ឆិកា)។ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នៅព្រឹកថ្ងៃទី២៩ ខែមករា ឆ្នាំ២០២១ លោកមេធាវី បញ្ជាក់ថា៖«ភាគច្រើន [ចៅក្រម] សួរតែអាហ្នឹង»។

លោក សម រង្ស៊ី និយាយថា លោក និងថ្នាក់ដឹកនាំរបស់លោក ខកខានមិនបានចូលកម្ពុជា តាមផែនការ នៅថ្ងៃទី៩ ខែវិច្ឆិកា ឆ្នាំ២០១៩ គឺដោយសារតែរដ្ឋាភិបាលកម្ពុជា ហាមក្រុមហ៊ុនយន្តហោះ មិនឲ្យដឹកក្រុមលោក។ តែរដ្ឋាភិបាលកម្ពុជា តបនាពេលនោះថា លោក សម រង្ស៊ី មិនហ៊ានចូលស្រុកខ្លួនឯង។

តាមពិត ជនជាប់ចោទ ក្នុងសំណុំរឿងខាងលើ មានដល់ទៅជាង១០០នាក់ឯណោះ ហើយភាគច្រើនជាអ្នកគាំទ្រអតីតគណបក្សសង្គ្រោះជាតិ និងមានមួយចំនួនទៀត ជាមន្ត្រីសង្គមស៊ីវិល។ ពួកគេ រងពីបទចោទដូចគ្នា គឺបទរួមគំនិតក្បត់ [ជាតិ] និង បទញុះញង់បង្កឲ្យមានភាពវឹកវរដល់សន្តិសុខសង្គម។

ពួកគេ រងពីបទចោទទាំង២នេះ គឺ ភាគច្រើនបំផុត ដោយសារតែប្រកាសគាំទ្រ និង ប្រកាសចាំទទួលលោក សម រង្ស៊ី ដែលគ្រោងចូលស្រុក នៅថ្ងៃទី៩ ខែវិច្ឆិកា ឆ្នាំ២០១៩។ មានអ្នកខ្លះទៀត បានបំផុសបំផុលបន្តឲ្យអ្នកគាំទ្រអតីតគណបក្សប្រឆាំងដូចគ្នា ចាំទទួលលោក សម រង្ស៊ី ដែរ។ រដ្ឋាភិបាល កម្ពុជា ចាត់ទុក ផែនការវិលចូលស្រុករបស់លោក សម រង្ស៊ី នាពេលនោះ ថាជាផែនការផ្តួលរំលំរដ្ឋាភិបាលកម្ពុជា។

សំណុំរឿងមនុស្សជាង១០០នាក់នោះ ត្រូវបានតុលាការភ្នំពេញ បើកសវនាការលើកដំបូង កាលពីចុងខែវិច្ឆិកា ឆ្នាំ២០២០ ដោយមានជនជាប់ចោទជាង៣០នាក់ ដែលចូលរួម ខណៈជិត១០០នាក់ អវត្តមាន។ ក្នុងសវនាការលើកដំបូងនេះ ចៅក្រម សម្រេចច្របាច់សំណុំរឿងជា២ ដោយសំណុំរឿងទី១ មានមនុស្សជាង៥០នាក់ និង សំណុំរឿងទី២ មានមនុស្សជាង៧០នាក់ ។

ឈានចូលពាក់កណ្តាលខែមករា ឆ្នាំ២០២១ តុលាការភ្នំពេញ បានបន្តបើកសវនាការលើសំណុំរឿងទី១ ដែលមានមនុស្សជាង៥០នាក់ តែអ្នកចូលរួម មានតែ១១នាក់ប៉ុណ្ណោះ។ សំណុំរឿងទី១នេះ ត្រូវបានតុលាការ បន្តយកមកបើកសវនាការម្តងទៀត នៅព្រឹកថ្ងៃទី២៩ ខែមករា ឆ្នាំ២០២១ ដោយមានជនជាប់ចោទតែ៤នាក់ ចូលរួម។ សំណុំរឿងទី១នេះ នឹងត្រូវតុលាការភ្នំពេញ បន្តលើកយកទៅបើកសវនាការ នៅថ្ងៃទី១៨ ខែកុម្ភៈ ឆ្នាំ២០២១។

លោកមេធាវី ឡោ ជុនធី លើកឡើងថា តុលាការ បានដាក់កាលវិភាគនៃការបើកសវនាការ ដោយកំណត់និងបែងចែកចំនួនជនជាប់ចោទ ដែលត្រូវចូលរួមសវនាការនីមួយៗ។ លោកមេធាវី ថ្លែងថា សំណុំរឿងរបស់ក្រុមអ្នកប្រឆាំងខាងលើ តុលាការ គ្រោងកំណត់បើកសវនាការរហូតដល់ខែមេសា ឆ្នាំ២០២១៕