ភូមិអ៊ីមផេកបាត់ដំបង ផ្ដល់ប្រឹក្សាដល់យុវជនឱ្យសម្រេចក្ដីប្រាថ្នារបស់ខ្លួន

ជាតិ

ភូមិអ៊ីមផេកបាត់ដំបង ផ្ដល់ប្រឹក្សាដល់យុវជនឱ្យសម្រេចក្ដីប្រាថ្នារបស់ខ្លួន

30, Jan 2021 , 10:29 pm

រូបភាព

ដោយ: អុីសា រ៉ហានី (Isa Rohany)

បាត់ដំបង៖ ភូមិអ៊ីមផេកបាត់ដំបង (Phum Impact Battambang) ត្រូវបានបង្កើតឡើងដោយយុវជនមួយរូប ដែលមានឆន្ទៈចង់ចែករំលែកចំណេះដឹងដែលខ្លួនមាន ក៏ដូចជាចង់ឱ្យយុវជនដទៃ ដើម្បីឲ្យពួកគេសម្រេចក្ដីស្រមៃដែលខ្លួនចង់ធ្វើ។ កញ្ញា ទស់ ភក្ដី ស្ថាបនិក ភូមិអ៊ីមផេកបាត់ដំបងបានឱ្យដឹងថា ភូមិអ៊ីមផេកបាត់ដំបង នឹងផ្តល់ការប្រឹក្សាយោបល់ត្រឹមត្រូវ ផ្តល់ការគាំទ្រលើបច្ចេកទេស ដើម្បីសម្រេចក្ដីស្រមៃ ទៅដល់យុវជន ក៏ដូចជាសហគ្រិនវ័យក្មេងក្នុងខេត្តបាត់ដំបង ឱ្យអាចជួយអភិវឌ្ឍន៍សហគមន៍របស់ពួកគេ។

ដើម្បីជ្រាបច្បាស់ សូមអញ្ជើញទស្សនាការពន្យល់លម្អិតរបស់កញ្ញា ទស់ ភក្ដី ស្ថាបនិក ភូមិអ៊ីមផេកបាត់ដំបងដូចតទៅ៖

ធ្លាប់ជាយុវជនដែលបានចូលរួមក្នុងកម្មវិធី YSEALI កញ្ញា ទស់ ភក្ដី មានគំនិតចង់ឱ្យមានការផ្លាស់ប្ដូរ ក្រោយគេមើលឃើញថា យុវជនក្នុងខេត្តបាត់ដំបងមិនសូវមានឱកាសសម្រាប់ការអភិវឌ្ឍខ្លួនឯង។ នៅចុងឆ្នាំ២០២០ ក្រោយទទួលបានការគាំទ្រ ក៏ដូចជាការផ្តល់ប្រឹក្សាយោបល់ពីស្ថាប័ន IMPACT HUB Phnom Penh យុវជន ភស់ ភក្ដី ក៏សម្រេចបង្កើតភូមិអ៊ីមផេកបាត់ដំបង ដែលទទួលបានជំនួយពីគម្រោង WE Act នៃទីភ្នាក់ងារជំនួយសហរដ្ឋអាមេរិក (USAID) និងសហគ្រិនខ្មែរ របស់ក្រសួងសេដ្ឋកិច្ច និងហិរញ្ញវត្ថុ។ ភូមិអ៊ីមផេក ជំរុញឱ្យយុវជនមានភាពជឿជាក់លើខ្លួនឯង ដើរលើក្ដីស្រមៃដែលចង់ធ្វើ និងបង្កើតបណ្ដាញយុវជន ដើម្បីចែករំលែកធនធានពីគ្នាទៅវិញទៅមក។ ទៅអនាគត ភក្ដី ចង់ឱ្យយុវជនបង្កើតភូមិអ៊ីមផេកឱ្យរីកសុសសាយក្នុងប្រទេសកម្ពុជា។

ក្នុងដំណើរទៅកាន់ខេត្តបាត់ដំបង នាថ្ងៃទី១៩ ខែមករា ឯកអគ្គរដ្ឋទូតសហរដ្ឋអាមេរិក លោក W. Patrick Murphy បានទៅស្វែងយល់ពីការងារនៅការិយាល័យភូមិអ៊ីមផេក ហើយលោកទូតពេញចិត្តជាខ្លាំងចំពោះទស្សនៈវិស័យដើម្បីពង្រឹងសមត្ថភាពដល់យុវជន៕