រដ្ឋមន្ត្រីសុខាភិបាល ប្រាប់ពលរដ្ឋឲ្យប្រយ័ត្ននឹងជំងឺផ្ដាសាយបក្សី ក្នុងពិធីបុណ្យចូលឆ្នាំចិនខាងមុខ

ជាតិ

សុខភាព

រដ្ឋមន្ត្រីសុខាភិបាល ប្រាប់ពលរដ្ឋឲ្យប្រយ័ត្ននឹងជំងឺផ្ដាសាយបក្សី ក្នុងពិធីបុណ្យចូលឆ្នាំចិនខាងមុខ

30, Jan 2021 , 5:19 pm

រូបភាព

មាន់និងទាងាប់ ដោយសារឆ្លងជំងឺផ្តាសាយ H5N1 ក្នុងកសិដ្ឋានមួយរបស់ពលរដ្ឋ នៅខេត្តបាត់ដំបង កាលពីដើមខែមករា ឆ្នាំ២០២១ (រូពីទំព័រហ្វេសប៊ុករបស់រដ្ឋមន្រ្តីក្រសួងព័ត៌មាន)

ដោយ: ផាត ដាណេ

ភ្នំពេញ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាមពលរដ្ឋ ឲ្យប្រុងប្រយ័ត្ននឹងជំងឺផ្ដាសាយបក្សី H5N1 ពិសេសក្នុងពិធីចូលឆ្នាំចិន ដែលនឹងមកដល់នៅថ្ងៃទី១១ ខែកុម្ភៈ ឆ្នាំ២០២១ ព្រោះថ្មីៗនេះ ជំងឺផ្ដាសាយបក្សី H5N1 បានកើតឡើងរួចមកហើយ។ សេចក្តីណែនាំរបស់លោករដ្ឋមន្ត្រី បានចេញផ្សាយនៅថ្ងៃទី២៩ ខែមករា ឆ្នាំ២០២១។

លោក ម៉ម ប៊ុនហេង ក្រើនរម្លឹកថា ជំងឺផ្ដាសាយបក្សី H5N1 នៅតែបន្តកើតមានលើសត្វបសុបក្សីមួយចំនួន។ លោក បន្តថា ក្រៅពីជំងឺផ្ដាសាយបក្សីប្រភេទ H5N1 ក៏មានវីរុស៥ប្រភេទផ្សេងទៀតដូចជា H5N6, H7N3, H7N7, H7N9, និងH9N2 ដែលអាចចម្លងមេរោគទៅមនុស្ស ហើយធ្វើឲ្យកើតទៅជាជំងឺផ្ដាសាយ។

រដ្ឋមន្ត្រីសុខាភិបាល បន្ថែមថា បច្ចុប្បន្ន វីរុសផ្ដាសាយបក្សីនេះ នៅតែបន្តកើតមានលើសត្វ ដែលជាបញ្ហាប្រឈមក្នុងការចម្លងដល់មនុស្ស បើមិនមានការការពារឲ្យបានត្រឹមត្រូវទេនោះ។ សម្រាប់ឱកាសបុណ្យចូលឆ្នាំចិនខាងមុខ លោក ក៏ក្រើនរម្រឹកដល់ពលរដ្ឋ ឲ្យមានការប្រុងប្រយ័ត្ននិងការពារសុខភាព ពីការឆ្លងវីរុសមួយនេះដែរ។

ដើម្បីបញ្ចៀសការឆ្លងវីរុសមួយនេះពីសត្វ លោក ម៉ម ប៊ុនហេង បានណែនាំវិធានការពារមួយចំនួនដល់ពលរដ្ឋ រួមមាន ត្រូវលាងដៃឲ្យបានញឹកញាប់ជាមួយនឹងសាប៊ូ ក្រោយប៉ះពាល់សត្វ ព្រោះវាប្រភពចម្លងរោគ, ប្រកាន់ខ្ជាប់ការអនុវត្តអនាម័យ និងចំណីអាហារសុវត្ថិភាព និងចម្អិនឲ្យបានឆ្អិនល្អ, គួរជៀសវាងចូលទៅកន្លែងចិញ្ចឹមសត្វ ឬប៉ះពាល់ បើគ្មានមិនចាំបាច់, និង គួរជៀសវាងការរប្រជ្រៀតគ្នានៅពេលទិញម្ហូបអាហារ ឬសាច់សត្វបក្សីរស់ ជាដើម។

ជាមួយគ្នានេះ លោក ជំរុញឲ្យពលរដ្ឋ ហៅទៅកាន់លេខ១១៥ បើសង្ស័យថា ខ្លួនឆ្លងវីរុសផ្ដាសាយបក្សី ដោយចេញរោគសញ្ញាទូទៅ ដូចជា គ្រុនក្តៅលើសពី៣៨អង្សា ក្អក ពិបាកដកដង្ហើម និង មានប្រវត្តិប៉ះពាល់បសុបក្សីឈឺ ឬងាប់ ក្នុងអំឡុងពេល១៤ថ្ងៃ។ បន្ថែមពីនេះ លោក ស្នើឲ្យអាជ្ញាធរគ្រប់តំបន់ ចាត់តាំងកម្លាំងគ្រប់គ្រង និងណែនាំពលរដ្ឋពីវិធានការពារ នៅតាមកសិដ្ឋាន ទីផ្សារ ពិសេសទីផ្សារលក់បសុបក្សីរស់ ដើម្បីជៀសផុតពីការផ្ទុះជំងឺក្នុងសហគមន៍។

គិតចាប់ពីឆ្នាំ២០០៥ រហូតដល់២០១៤ កម្ពុជាធ្លាប់មានករណីជំងឺផ្ដាសាយបក្សីប្រភេទ H5N1 ចំនួន៥៦ករណី ដោយក្នុងនោះមាន៣៧ករណីបានស្លាប់។ សូមបញ្ជាក់ថា កាលពីថ្មីៗនេះ មាន់និងទាជិត២ពាន់ក្បាល បានងាប់ក្នុងកសិដ្ឋានរបស់ប្រជាពលរដ្ឋ នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង ដោយសារជំងឺផ្ដាសាយបក្សី H5N1៕

អត្ថបទទាក់ទង

តំបន់មួយ ក្នុងភូមិព្រែកតាច្រែង ត្រូវដាក់ជាតំបន់ផ្ទុះជំងឺផ្តាសាយបក្សី ក្រោយមាន់ទាជិត២ពាន់ងាប់