សម្ដេច ហ៊ុន សែន បញ្ជាឲ្យអាជ្ញាធរខេត្តជាប់ព្រំដែនវៀតណាម រឹតបន្ដឹងការចេញ-ចូល ខណៈកូវីដ-១៩ បំប្លែងថ្មី

COVID-19

ជាតិ

សង្គមជាតិ

សម្ដេច ហ៊ុន សែន បញ្ជាឲ្យអាជ្ញាធរខេត្តជាប់ព្រំដែនវៀតណាម រឹតបន្ដឹងការចេញ-ចូល ខណៈកូវីដ-១៩ បំប្លែងថ្មី

04, Feb 2021 , 4:21 pm

រូបភាព

ដោយ:

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានបញ្ជាឲ្យអភិបាលខេត្ត ដែលនៅជាប់ព្រំដែនវៀតណាម រឹតបន្តឹងការចេញ-ចូល របស់ពលរដ្ឋ ខណៈកូវីដ-១៩ ដែលបានបំប្លែងភេទថ្មី កំពុងរីករាលដាលនៅក្នុងរដ្ឋជាប់កម្ពុជាមួយនេះ។

តាមរយៈសារសំឡេងជាង១៤នាទី ដែលបានចែកចាយតាមបណ្ដាញតេឡេក្រាម នៅថ្ងៃទី៤ កុម្ភៈ សម្ដេច បញ្ជាឲ្យអាជ្ញាធរខេត្តជាប់ព្រំដែនវៀតណាមទាំងអស់ បង្កើនការប្រុងប្រយ័ត្ន ដោយពង្រឹងការត្រួតពិនិត្យ និងតាមដានពលរដ្ឋដែលវិលត្រឡប់មកកម្ពុជាវិញឲ្យបានតឹងរឹង។ ជាពិសេសត្រូវចត្តាឡីស័កលើពលរដ្ឋទាំងនោះឲ្យបានត្រឹមត្រូវ។

ប្រមុខរដ្ឋាភិបាល បាននិយាយដូច្នេះថា៖«ខ្ញុំសូមប្រកាសឱ្យបណ្តាខេត្តដែលនៅជាប់ប្រទេសវៀតណាមទាំងអស់ ពីខេត្តកំពត រហូតដល់ខេត្តរតនគិរី ចាត់វិធានការបន្ទាន់ទប់ស្កាត់កុំឱ្យមានការឆ្លងទៅឆ្លងមករបស់ប្រជាជនទាំងប្រជាជនកម្ពុជា និងប្រជាជនវៀតណាម។ ប្រជាជនកម្ពុជា ដែលឆ្លងទៅប្រទេសវៀតណាម ក៏ត្រូវតែធ្វើចត្តាឡីស័កដោយអាជ្ញាធរវៀតណាម ដូចដែលធ្វើកន្លងទៅ។ រីឯប្រជាជនវៀតណាម ដែលឆ្លងចូលមកកម្ពុជា ក៏ត្រូវតែធ្វើចត្តាឡីស័កនៅក្នុងប្រទេសកម្ពុជាផងដែរ»។

សម្រាប់សម្ដេច ហ៊ុន សែន ករណីវៀតណាមផ្ទុះជំងឺកូវីដ-១៩ ដែលបំប្លែងភេទថ្មី ឆ្លងពីអង់គ្លេសនេះ គឺជាក្តីព្រួយបារម្ភធំមួយ ដែលអាជ្ញាធរកម្ពុជាត្រូវយកចិត្តទុកដាក់ទប់ស្កាត់ឲ្យបានហ្មត់ចត់ជាទីបំផុត។ «ប្រការនេះពឹងពាក់ទាំងស្រុងទៅលើអាជ្ញាធរ អភិបាលខេត្ត ដឹកនាំការងារនេះ ជាមួយកងកម្លាំងប្រដាប់អាវុធឈរជើងបិទខ្ទប់ឱ្យខានតែបាននូវការឆ្លងតាមច្រករបៀងទាំងនៅតាមព្រំដែន និងត្រួតពិនិត្យនៅខាងក្នុងឱ្យបានហ្មត់ចត់ ហើយតម្រូវឱ្យរៀបចំតំបន់ធ្វើចត្តាឡីស័កឱ្យបានរឹងមាំបំផុត»។ នេះបើតាមសម្ដេច ហ៊ុន សែន។

មិនមែនតែនៅព្រំដែនវៀតណាមទេ សម្ដេច ហ៊ុន សែន ក៏បញ្ជាឲ្យពង្រឹងការទប់ស្កាត់ជំងឺកូវីដ-១៩ នៅតាមព្រំដែនថៃដែរ ខណៈដែលពលករខ្មែរ ដែលធ្វើការនៅទីនោះ កំពុងសម្រុកមកកម្ពុជាវិញជាបន្តបន្ទាប់។ បើតាមប្រមុខរដ្ឋាភិបាល អាជ្ញាធរមិនអាចមើលស្រាល ឬធ្វេសប្រហែសលើកិច្ចការទប់ស្កាត់ជំងឺកូវីដ-១៩ នេះបានឡើយ។ «ប្រសិនបើយើងមានការធ្វេសប្រហែសប្រទេសយើងនឹងមានការខ្ទេចខ្ទាំទៅដោយកូវីដ១៩ ដែលរុញច្រានពីប្រទេសថៃមកផង និងរុញច្រានពីប្រទេសវៀតណាមមកផង»។ នេះជាការបញ្ជាក់របស់នាយករដ្ឋមន្ត្រី ហ៊ុន សែន។

ខេត្តជាប់ព្រំដែនវៀតណាម រួមមាន កំពត តាកែវ កណ្តាល ព្រៃវែង ស្វាយរៀង ត្បូងឃ្មុំ ក្រចេះ មណ្ឌលគិរី និងរតនគិរី ។

ក្រោយទទួលបានសារសំឡេងពីប្រមុខរដ្ឋាភិបាលនេះ ក្រសួងសុខាភិបាលបានបញ្ជូនលិខិតណែនាំអាជ្ញាធរគ្រប់ខេត្ត ដែលនៅជាប់ព្រំដែនវៀតណាមដូច្នេះថា៖«ចុះត្រួតពិនិត្យតាមដាន រុករកប្រជាពលរដ្ឋមកពីក្រៅប្រទេស ជាពិសេសមកពីប្រទេសវៀតណាម ថៃ យកវត្ថុសំណាកសម្រាប់អ្នកដំណើរដែលចូលមកកម្ពុជា។ អាជ្ញាធរត្រូវតាំងកម្លាំងគ្រប់គ្រង ឃ្លាំមើល និងរាយការណ៍មកទូរសព្ទទាន់ហេតុការណ៍ បើសង្ស័យឆ្លងវីរុសកូវីដ-១៩»។

ក្រសួងសុខាភិបាល បានណែនាំដល់សមត្ថកិច្ច ត្រូវត្រួតពិនិត្យតាមបេនឡានអាជីវកម្ម ដែលជាកន្លែងប្រមូលផ្តុំនូវអ្នកដំណើរ។ សមត្ថកិច្ចត្រូវមានតួនាទីតាមដាន និងត្រួតពិនិត្យតាមសណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន រមណីយដ្ឋាន ទីកន្លែងកម្សាន្តនានា និងកន្លែងលក់ដូរ រួមទាំងបន្តអប់រំដល់ពលរដ្ឋអំពីវិធានការបង្ការជំងឺកូវីដ-១៩។

ទន្ទឹមនេះក្រសួងសុខាភិបាលបានណែនាំឲ្យពលរដ្ឋផ្អាក និងពន្យារការធ្វើដំណើរទៅប្រទេសវៀតណាម និងប្រទេសដែលកំពុងរាតត្បាតជំងឺកូវីដ-១៩សិន ដើម្បីទប់ស្កាត់ជំងឺកូវីដ-១៩។

គិតចាប់ពីថ្ងៃទី២០ ខែធ្នូ ឆ្នាំ២០២០ ដល់ថ្ងៃទី០៣ ខែកុម្ភៈ ឆ្នាំ២០២១ មានពលរដ្ឋខ្មែរសរុបចំនួន១០,៥៥៦នាក់ ក្នុងនោះ ស្រី៤,៣៨២នាក់ ដែលបានវិលត្រឡប់ពីប្រទេសថៃមកកម្ពុជាវិញ។ នេះបើតាមលោក កែវ វណ្ណថន អគ្គនាយករងអន្តោប្រវេសន៍ ដែលបានបញ្ជាក់ប្រាប់អ្នកសារព័ត៌មានថ្មីៗតាមតេឡេក្រាមថា ពលរដ្ឋខ្មែរទាំងនោះបានធ្វើដំណើរតាមច្រកអូរស្មាច់ ប៉ោយប៉ែត ដូង ភ្នំដី ចាំយាម និងព្រំ។

កម្ពុជាមានករណីឆ្លងកូវីដ-១៩ សរុប៤៦៧នាក់ ក្នុងនោះ មាន៤៥១នាក់ បានជាសះស្បើយ។ អ្នកជំងឺ១៦នាក់ទៀត កំពុងសម្រាកព្យាបាលជំងឺនៅតាមមន្ទីរពេទ្យក្នុងរាជធានីភ្នំពេញ ប៉ៃលិន និងបន្ទាយមានជ័យ៕