ជាតិ
អ្នកនាំពាក្យមហាផ្ទៃ៖ កំណែទម្រង់នគរបាល មន្ត្រីរដ្ឋបាល និង មន្រី្តពន្ធនាគារ ដើម្បីរៀបចំរចនាសម្ព័ន្ធនិងឋានន្ករសក្តិឡើងវិញ សម្តេច ស ខេង រដ្ឋមន្រ្តីក្រសួងមហាផ្ទៃ
× ភ្នំពេញ៖ លោកឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ អះអាងថា ការធ្វើកំណែទម្រង់មន្រី្តនគរបាល មន្ត្រីរដ្ឋបាលស៊ីវិល និង មន្រី្តពន្ធនាគារ ដែលស្ថិតក្នុងក្របខ័ណ្ឌក្រសួងមហាផ្ទៃ គឺដើម្បីរៀបចំរចនាសម្ព័ន្ធ កំណត់មុខងារ និង ឋានន្ករសក្តិរបស់មន្រី្តទាំងនោះឡើងវិញ។
ក្នុងកិច្ចសម្ភាសន៍ជាមួយសារព័ត៌មានថ្មីៗតាមទូរស័ព្ទនៅព្រឹកថ្ងៃទី៥កុម្ភៈ ឆ្នាំ២០២១ លោក ខៀវ សុភ័គ បានបញ្ជាក់ថា ការរៀបចំកំណែទម្រង់នេះ គឺដើម្បីពិនិត្យនិងកែរចនាសម្ព័ន្ធ ក៏ដូចជាឋានន្ករសក្តិរបស់មន្រី្តទាំងប្រភេទនេះឡើងវិញ។ លោក បន្តថា ការធ្វើបែបនេះ គឺឲ្យមន្រី្តបំពេញការងារកាន់តែប្រសើរឡើងហើយស្របនឹងស្ថានការណ៍។
លោក ពន្យល់ថា៖«យើងកែរបៀបរបបចាស់ទៅថ្មី ដូច្នេះ អ្វីៗនឹងកែថ្មីឲ្យស្របទៅនឹងសភាពការណ៍ថ្មី។ ឧទាហរណ៍ ឥឡូវពលនគរបាលតិច ជាងមេនគរបាល, ថ្នាក់ក្រោមចេះតែតិចទៅ ដូចពីរ៉ាមីតផ្អាប់អ៊ីចឹង។ ទី២ នៅតាមការិយាល័យនីមួយៗ មានប្រធានការិយាល័យនិងអនុប្រធានជាង៥០០នាក់ ឬ១០នាក់អ៊ីចឹងទៅ ហើយបុគ្គលិកក៏ស្មើហ្នឹងដែរ, អ៊ីចឹងយើងត្រូវកែទម្រង់ ដាក់ឲ្យចូលនិវត្តន៍ហើយរើសថ្មីបន្ថែម...កន្លែងខ្លះមានមន្រី្តច្រើន តែការងារតិច ហើយកន្លែងខ្លះមន្រី្តតិច ការងារច្រើន គឺយើងពិនិត្យកែទម្រង់ឡើងវិញ»។
នៅថ្ងៃទី៣ ខែកុម្ភៈ ឆ្នាំ២០២១ សម្ដេច ស ខេង រដ្ឋមន្ត្រីក្រសួងមហាផ្ទៃបានសម្រេចបង្កើតគណៈកម្មការកំណែទម្រង់មន្រី្តរដ្ឋបាលស៊ីវិល និងមន្រី្តពន្ធនាគារនៃក្រសួងមហាផ្ទៃ ដោយមានសមាសភាព២៦រូប ដោយក្នុងនោះ សម្ដេច ធ្វើជាប្រធានខ្លួនឯងតែម្តង ហើយលោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃជាអនុប្រធាន។ គណៈកម្មការនេះ មានភារកិច្ចស្រាវជ្រាវគោលនយោបាយ ច្បាប់ សម្រាប់វិភាគមុខងាររចនាសម្ព័ន្ធ និងកំណត់ក្របខ័ណ្ឌ ឋានន្ករសក្តិ។ លើសពីនេះ គឺមានតួនាទីពិនិត្យនិងសិក្សាលើលិខិតបទដ្ឋានគតិយុត្តចាស់ៗ ដើម្បីធ្វើវិសោធនកម្ម ឬរៀបចំច្បាប់លិខិតបទដ្ឋានគតិយុត្តថ្មីៗបន្ថែមទៀត។
ជាមួយគ្នាដែរ កាលពីថ្ងៃទី១២មករា សម្ដេច ស ខេង ក៏បង្កើតគណៈកម្មការថ្មីមួយ គឺគណៈកម្មការកំណែទម្រង់នគរបាលជាតិកម្ពុជាផងដែរ។ ជុំវិញការធ្វើកំណែទម្រង់នេះ សម្ដេច អះអាងថា មិនមែនធ្វើតែនគរបាលទេ គឺធ្វើឡើងនៅគ្រប់កន្លែងក្នុងរដ្ឋាភិបាល ហើយធ្វើដើម្បីជាតិនិងពលរដ្ឋ។
ក្នុងពិធីផ្សព្វផ្សាយរបាយការណ៍ចុងក្រោយនៃជំរឿនប្រជាជនឆ្នាំ២០១៩ កាលពីថ្ងៃទី២៦មករា សម្តេចរដ្ឋមន្ត្រី ថ្លែងថា៖«កំណែទម្រង់មិនមែនតែនគរបាលនោះទេ កំណែទម្រង់គ្រប់វិស័យរាជរដ្ឋាភិបាលយើងបានប្រកាន់យកគោលការណ៍នេះ ចាប់ពីអាណត្តមុន រហូតមកដល់អាណត្តិនេះ អ៊ីចឹងនគរបាលក៏ជាផ្នែកមួយនៃការធ្វើកំណែទម្រង់...! ពីមុនយើងក៏ធ្វើដែរ កំណែទម្រង់អត់មានទីបញ្ចប់ទេ អត់ទីបញ្ចប់...យើងធ្វើកំណែទម្រង់ដើម្បីប្រទេសជាតិ សម្រាប់ប្រជាពលរដ្ឋ យើងអត់ធ្វើសម្រាប់បុគ្គលណាទេ»៕
Tag:
កំណែទម្រង់
មន្ត្រីរដ្ឋបាលស៊ីវិល
មន្រី្តពន្ធនាគារ
© រក្សាសិទ្ធិដោយ thmeythmey.com