កីឡាអន្តរជាតិ
អន្តរជាតិ
UCL៖ ជំនួបជើងទី១រវាង Leipzig ទល់ Liverpool ត្រូវលេងនៅហុងគ្រី
× ជំនួបរវាង RasenBallsport Leipzig ទល់នឹង Liverpool ពានរង្វាន់ Champions League វគ្គ១៦ក្រុមចុងក្រោយជើងទី១ ត្រូវលេងនៅទឹកដីកណ្តាលក្នុងក្រុងប៊ុយដាប៉ែស ប្រទេសហុងគ្រីវិញ។ ការប្តូរទៅលេងនៅទឹកដីកណ្តាល ក៏ព្រោះហង្សក្រហមិនត្រូវបានអនុញ្ញាតឱ្យធ្វើដំណើរចូលទឹកដីអាល្លឺម៉ង់ ដ្បិតប្រទេសនេះបានដាក់រឹតត្បិតដើម្បីបង្ការជំងឺ COVID-19។
អាល្លឺម៉ង់បានហាមឃាត់អ្នកធ្វើដំណើរពីបណ្តាប្រទេសនានារួមទាំងអង់គ្លេសផងដើម្បីបង្ការការឆ្លង COVID-19។ ដោយសារមូលហេតុនេះ ក្លិប Leipzig ក្នុងក្របខណ្ឌ Bundesliga ក៏មិនត្រូវបានអនុញ្ញាតឱ្យទទួលស្វាគមន៍ក្រុមហង្សក្រហមសម្រាប់ក្របខណ្ឌអឺរ៉ុបពេលនេះផងដែរ។
ដោយសារមិនអាចរៀបចំនៅទឹកដីខ្លួន Leipzig បានសម្រេចយកកីឡដ្ឋាន Puskas Arena ក្នុងក្រុងប៊ុយដាប៉ែស ប្រទេសហុងគ្រីដើម្បីប្រើជាទឹកដីកណ្តាលសម្រាប់ជំនួបជើងទី១វគ្គ១៦ក្រុមនេះវិញ ដែលនឹងធ្វើឡើងនៅរាត្រីថ្ងៃទី១៦ ខែកុម្ភៈ។
ការសម្រេចប្រើទឹកដីកណ្តាលនេះ ធ្វើឡើងក្រោយសហព័ន្ធកីឡាបាល់ទាត់អឺរ៉ុប (UEFA) បានធ្វើបច្ចុប្បន្នភាពបទប្បញ្ញត្តិរបស់ខ្លួនសម្រាប់ការប្រកួតវគ្គខ្វែង Champions League និង Europa League ចំពេលមានការរីករាលដាលកាន់តែខ្លាំងនៃការឆ្លងជំងឺ COVID-19។ ច្បាប់ថ្មីរបស់ UEFA សរសេរថា ប្រសិនបើការរឹតបន្តឹងដែលបានដាក់ក្នុងប្រទេសមួយអាចបណ្តាលឱ្យប៉ះពាល់ដល់ការប្រកួត នោះក្លិបម្ចាស់ផ្ទះត្រូវតែស្នើសុំកន្លែងជំនួសថ្មីដែលសមរម្យហើយនៅក្នុងប្រទេសអព្យាក្រឹត។
យ៉ាងណាក៏ដោយ ប្រសិនបើក្លិបម្ចាស់ផ្ទះទាំងឡាយណាខកខានមិនបានធ្វើតាមការលើកឡើងខាងលើនេះទេនោះ ស្ថាប័នគ្រប់គ្រងកីឡាបាល់ទាត់ទ្វីបអឺរ៉ុបនឹងគិតថាការប្រកួតនេះត្រូវឱ្យក្រុមម្ចាស់ផ្ទះចាញ់ ៣-០ ដោយស្វ័យប្រវត្តិ។
UEFA អំណរគុណដល់ក្លិបទាំងពីរដែលបានសហការ និងស្វែងរកដំណោះស្រាយក៏ដូចជាសហព័ន្ធកីឡាបាល់ទាត់ហុងគ្រី (HFF) ដែលបានយល់ព្រមផ្តល់ទីលានសម្រាប់ការប្រកួតនេះ៕
© រក្សាសិទ្ធិដោយ thmeythmey.com