ជាតិ
សេដ្ឋកិច្ច
សមាគមវារីវប្បករកម្ពុជា ទាមទារឱ្យក្រសួងកសិកម្មពិនិត្យឱ្យបានខ្ពស់លើគុណភាពត្រី នាំចូលពីវៀតណាម
រូបពីក្រសួងកសិកម្ម រុក្ខាប្រមាញ់ និងនេសាទ
×![]()
ភ្នំពេញ៖ សមាគមវារីវប្បករកម្ពុជា ទាមទារឱ្យក្រសួងកសិកម្ម និងមន្ត្រីជំនាញដែលពាក់ព័ន្ធទាំងអស់ ត្រួតពិនិត្យឱ្យបានខ្ពស់លើគុណភាពប្រភេទត្រីនីមួយៗ ដែលនាំចូលពីវៀតណាម។ ការទាមទាររបស់សមាគមវារីវប្បករកម្ពុជា ក្រោយពីក្រសួងកសិកម្ម រុក្ខាប្រមាញ់ និងនេសាទ អនុញ្ញាតឱ្យមានការនាំចូលនូវត្រីប្រា ត្រីពោ ត្រីអណ្តែង និងត្រីឆ្តោ ពីប្រភេទវៀតណាមវិញ។
អត្ថបទទាក់ទង
សូមស្តាប់សំឡេងរបស់លោក លោក សុខ រ៉ាដែន ប្រធានសមាគមវារីវប្បករកម្ពុជា ក្នុងបទសម្ភាសជាមួយកញ្ញា អ៊ូ សុខមាន នៃសារព័ត៌មានថ្មីៗខាងតទៅ៖
លោក សុខ រ៉ាដែន ប្រធានសមាគមវារីវប្បករកម្ពុជា មិនជំទាស់នឹងក្រសួងកសិកម្ម ដែលអនុញ្ញាតឱ្យមានការនាំចូលត្រីទាំង៤ប្រភេទពីវៀតណាមឡើយ។ ប៉ុន្តែ លោកសោកស្តាយ ចំពោះការអនុញ្ញាតឱ្យនាំចូលត្រីទាំងនេះ ខណៈការចិញ្ចឹមត្រីប្រា ត្រីពោ ត្រីអណ្តែង និងត្រីឆ្តោ របស់វារីវប្បករនានានៅក្នុងស្រុកមានការកើនឡើង ដែលត្រីទាំងនេះ កំពុងនៅពេញស្រះ។
លោកសុខ រ៉ាដែន បានស្នើឱ្យក្រសួងកសិកម្ម ឬមន្ត្រីជំនាញ ត្រូវរឹតត្បិតនូវបរិមាណនៃការនាំចូលត្រីពីវៀតណាម និងត្រួតពិនិត្យឱ្យបានខ្ពស់បំផុតលើគុណភាពប្រភេទត្រីនីមួយៗ ដើម្បីចង់ដឹងថា មានសារធាតុគីមីហាមឃាត់ណាមួយដែលប៉ះពាល់ដល់សុខភាពអ្នកបរិភោគឬទេ?
ក្នុងបទសម្ភាសជាមួយសារព័ត៌មានThmeyThmey.Com នារសៀលថ្ងៃទី៨កុម្ភៈ ប្រធានសមាគមន៍វារីវប្បករកម្ពុជារូបនេះនិយាយដូច្នេះ៖« ឱ្យមានការនាំចូលត្រីចុះ ប៉ុន្តែត្រូវមានការត្រួតពិនិត្យលើគុណភាព!ទីមួយ. ថាតើត្រី[ដែលនាំចូលពីវៀតណាមនេះ]មានដាក់ថ្នាំអង់ទីប៊ីយូទីកកម្រិតណា? [...] ទីពីរ. ត្រីដែលនាំចូលពីវៀតណាម គឺមានសារធាតុអ្វីដែលធ្វើឱ្យប៉ះពាល់ដល់អ្នកទទួលទាន»។
លើសពីនេះ លោក សុខ រ៉ាដែន ទាមទារឱ្យក្រសួងកសិកម្ម ណែនាំឱ្យឈ្មួញដែលនាំចូលត្រីពីវៀតណាមទាំងអស់ ងាកមកប្រមូលទិញត្រី ពីវារីវប្បករក្នុងស្រុកឱ្យអស់សិន ចាំបន្តនាំចូលពីវៀតណាមទៀត។
ក្រសួងកសិកម្ម រុក្ខាប្រមាញ់ និងនេសាទ សម្រេចអនុញ្ញាតឱ្យនាំចូលត្រីប្រា ត្រីពោ ត្រីអណ្ដែង និងត្រីឆ្តោ ពីប្រទេសវៀតណាមវិញ ក្រោយមានការផ្អាកនាំចូលត្រីទាំងបួនប្រភេទនេះ អស់រយៈពេលជិតមួយខែកន្លងមក។ ការអនុញ្ញាតឱ្យឈ្មួញនាំចូលពីត្រីទាំងនេះពីវៀតណាមវិញ គឺធ្វើឡើងបន្ទាប់ពីភាគីវៀតណាមសម្តែងការមិនពេញចិត្តជាខ្លាំងមកកម្ពុជា ដោយបានលើកឡើងថា កម្ពុជាគឺធ្វើផ្ទុយពីស្មារតីសេរីភាពភាវូបនីយកម្មពាណិជ្ជកម្មរបស់អង្គការពាណិជ្ជកម្មពិភពលោក(WTO) និងសហគមន៍សេដ្ឋកិច្ចអាស៊ាន។
ក្រសួងកសិកម្មបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួននាព្រឹកថ្ងៃទី៨កុម្ភៈថា ឈ្មួញដែលនាំចូលត្រីទាំង៤ប្រភេទពីវៀតណាមវិញនេះ ត្រូវធ្វើឡើងស្របតាមតម្រូវការជាក់ស្តែងនៅក្នុងស្រុក ដោយអនុលោមតាមច្បាប់ និងលិខិតបទដ្ឋានគតិយុត្តជាធរមាន។ ទន្ទឹមនឹងនេះ ក្រសួងនឹងបន្តពិគ្រោះយោបល់ ជាមួយសមាគមវារីវប្បករកម្ពុជា អាជីវករនាំចេញ-នាំចូលផលិតផលជលផល និងអាជ្ញាធរមានសមត្ថកិច្ចពាក់ព័ន្ធដែលជាដៃគូពាណិជ្ជកម្មរបស់កម្ពុជា ដើម្បីកសាងនិងទទួលស្គាល់លិខិតបទដ្ឋានបច្ចេកទេស។
តាមរយៈយន្តការគណៈកម្មការជំរុញវារីវប្បកកម្មកម្ពុជា ក្រសួងកសិកម្ម សហការជាមួយក្រសួងពាក់ព័ន្ធនឹងបន្តដោះស្រោយបញ្ហាប្រឈមរបស់វារីវប្បករ ដើម្បីអភិវឌ្ឍវិស័យវារីវប្បកម្ម និងពង្រឹង សមត្ថភាពប្រកួតប្រជែងរបស់វារីវប្បករ ស្របតាមគោលការណ៍ពាណិជ្ជកម្មសេរី ព្រមទាំងធានាដល់ការការពារសុខភាព មនុស្ស សត្វ បរិស្ថាន និងជំរុញកំណើនពាណិជ្ជកម្ម។ នេះបើតាមសេចក្តីប្រកាសព័ត៌មានដដែលខាងលើ៕
Tag:
កសិកម្ម
ត្រី
© រក្សាសិទ្ធិដោយ thmeythmey.com
