កីឡាអន្តរជាតិ
អន្តរជាតិ
ទាំង Man Utd និង Arsenal ត្រូវលេង Europa League នៅទឹកដីអ៊ីតាលីវិញ
× ទាំង Manchester United និង Arsenal នឹងត្រូវប្រកួតពានរង្វាន់ Europa League វគ្គ៣២ក្រុមចុងក្រោយនៅទឹកដីកណ្តាលក្នុងប្រទេសអ៊ីតាលី ដោយសារការរឹតត្បិតជំវិញការបង្ការជំងឺ COVID-19។ Man Utd និង Arsenal ជាក្រុមក្នុងក្របខណ្ឌ Premier League ទី៤ បន្ទាប់ពី Manchester City និង Liverpool ដែលត្រូវលេងនៅទឹកដីកណ្តាល។
ជំនួបរវាង Man Utd ទល់នឹងក្រុមអេស្ប៉ាញ Real Sociedad នឹងត្រូវប្រកួតនៅកីឡដ្ឋាន Allianz របស់ក្លិប Juventus ក្នុងក្រុង Turin ប្រទេសអ៊ីតាលី ខណៈការជួបគ្នារបស់ Arsenal ជាមួយ Benfica នឹងត្រូវធ្វើឡើងនៅកីឡដ្ឋាន Stadio Olimpico ក្នុងក្រុងរ៉ូម។ ជំនួបទាំងពីរគូនេះ នឹងធ្វើនៅរាត្រីថ្ងៃទី១៨ ខែកុម្ភៈ។
ការសម្រេចឱ្យមានការប្រកួតនៅទឹកដីកណ្តាលបែបនេះ ដោយសារអេស្ប៉ាញបានដាក់កម្រិតលើអ្នកដំណើរពីចក្រភពអង់គ្លេសដើម្បីការពារការឆ្លង COVID-19 ខណៈដែលអង់គ្លេសអនុវត្តច្បាប់ដូចគ្នានេះលើការធ្វើដំណើពីព័រទុយហ្គាល់។
ដូច្នេះមានន័យថា ការប្រកួតជើងទី២ របស់បិសាចក្រហមដែលនឹងត្រូវធ្វើនៅ Old Trafford នៅរាត្រីថ្ងៃទី២៥ ខែកុម្ភៈនេះនឹងដំណើរការធម្មតា។ ប៉ុន្តែសម្រាប់ការប្រកួតក្នុងដីរបស់កាំភ្លើងធំទល់ Benfica នៅពេលដូចគ្នានេះមិនទាន់បានបញ្ជាក់នៅឡើយទេ។
នេះមិនមែនជាករណីដំបូងនោះទេសម្រាប់ក្រុមដែលប្តូរទីលានប្រកួតទៅក្រៅប្រទេសដោយសារវិបត្តិ COVID-19។ Liverpool និង Manchester City ដែលត្រូវជួបក្រុមពី Bundesliga សុទ្ធតែត្រូវលេងនៅទឹកដីកណ្តាលក្នុងក្រុងប៊ុយដាប៉ែស ប្រទេសហុងគ្រីក្នុងការប្រកួត Champions League វគ្គ១៦ក្រុមចុងក្រោយជើងទី១ ដោយសារអាល្លឺម៉ង់បានហាមឃាត់រាល់អ្នកធ្វើដំណើរពីបណ្តាប្រទេសនានារួមទាំងអង់គ្លេសដូចគ្នា។
កីឡដ្ឋាន Puskas Arena ដែលស្ថិតក្នុងក្រុងប៊ុយដាប៉ែស ប្រទេសហុងគ្រីត្រូវបានផ្តល់ឱ្យសម្រាប់ការប្រកួតទាំងពីរគូរវាង Borussia Monchengladbach និង Man City និង Leipzig ទល់ Liverpool៕
Tag:
COVID-19
Europa League
© រក្សាសិទ្ធិដោយ thmeythmey.com