ជាតិ
សេដ្ឋកិច្ច
ជប៉ុនផ្ដល់ជំនួយជាង៧៥ម៉ឺនដុល្លារ សម្រាប់ជួយវគ្គសិក្សាកីឡានិងកសិកម្មស្វាយចន្ទីសរីរាង្គនៅកម្ពុជា លោកស្រី ម៉ាត់ស៊ូរ៉ា អាយូមិ នាយិកានៃ IVY (ខាងឆ្វេង) និងលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា ក្នុងពិធីចុះហត្ថលេខាផ្ដល់ជំនួយឥតសំណងថ្ងៃទី១២កុម្ភៈ ឆ្នាំ២០២០។ រូបដោយ៖ ឡាយ សុភាវតី
× ភ្នំពេញ៖ រដ្ឋាភិបាលជប៉ុនសម្រេចផ្ដល់ជំនួយឥតសំណងជាង៧៥ម៉ឺនដុល្លារ ដល់អង្គការ Heart of Gold និងក្រុមអ្នកស្ម័គ្រចិត្តអន្តរជាតិយ៉ាម៉ាហ្គាតា(IVY)។ ជំនួយដែលផ្ដល់ឲ្យអង្គភាពទាំងពីរនេះ គឺសម្រាប់ជួយវគ្គសិក្សាអប់រំកាយខាងផ្នែកកីឡាដល់សិស្សសាកលវិទ្យាល័យ និងកសិករដាំស្វាយចន្ទីសរីរាង្គ។
ក្នុងពិធីចុះហត្ថលេខាលើកិច្ចសន្យាផ្ដល់ជំនួននាព្រឹកថ្ងៃទី១២កុម្ភៈ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា បានថ្លែងថា ជំនួយជាង៣៧ម៉ឺនដុល្លារ នឹងផ្ដល់ឲ្យអង្គការ Heart of Gold សម្រាប់បណ្ដុះបណ្ដាលគ្រូ និងដំឡើងឧបករណ៍ សម្រាប់រៀនផ្នែកកីឡានៅថ្នាក់សាកលវិទ្យាល័យ។ លោកបានបញ្ជាក់ថា ទឹកប្រាក់ជាង៣៨ម៉ឺន នឹងផ្ដល់ឲ្យ IVY សម្រាប់ជួយជំរុញការដាំនិងការលក់រួមគ្នា ដល់សហករណ៍កសិករដាំស្វាយចន្ទី។
ចំពោះគម្រោងវគ្គសិក្សាអប់រំកាយឬកីឡាថ្នាក់សាកលវិទ្យាល័យរយៈពេល៤ឆ្នាំ នៅវិទ្យាស្ថានជាតិអប់រំកាយ និងកីឡា នឹងបណ្ដុះគ្រូឲ្យទទួលបានបរិញ្ញាបត្រក្នុងឆ្នាំដំបូង។ បន្ទាប់មក នៅឆ្នាំទី២គម្រោងនេះ នឹងដាក់ចេញនូវធនធានមនុស្សនិងដំឡើងឧបករណ៍ ដើម្បីបញ្ចូលក្នុងកម្មវិធីសិក្សានៅបរិញ្ញាបត្រ។ នេះបើតាមលោក តេហ្សូកា កូជិ តំណាងឲ្យអង្គការក្រៅរដ្ឋាភិបាល Heart of Gold ដែលរំពឹងថា នឹងមាននិស្សិតជាង៩៣ម៉ឺននាក់ ទទួលបានការអប់រំកាយនិងកីឡាប្រកបដោយប្រសិទ្ធភាព។
ចំណែក លោកស្រី ម៉ាតិស៊ូរ៉ា អាយូមិ នាយិកានៃអង្គការ IVY ប្រចាំកម្ពុជា ក៏បានបញ្ជាក់ដែរថា ជំនួយដែលទទួលពីជប៉ុននេះ នឹងបន្តជួយគាំទ្រឲ្យបណ្ដាញកសិករបង្កើតជាសហគមន៍បន្ថែម៣ទៀត នៅព្រះវិហារ ដើម្បីទទួលបានវិញ្ញាបនប័ត្រស្វាយចន្ទីសរីរាង្គ។ លោកថា រយៈពេលពីឆ្នាំកន្លងមក បណ្ដាញកសិករមានសហគមន៍១០ ដែលមានវិបញ្ញាបនប័ត្រកសិករស្វាយចន្ទីសរីរាង្គ។ ពួកគេទទួលបានតម្លៃគ្រាប់ស្វាយចន្ទីខ្ពស់ជាងតម្លៃទីផ្សារធម្មតា១៥ភាគរយ។
នាយិកានៃអង្គការ IVY ប្រចាំកម្ពុជាបានលើកឡើងថា៖ «នៅពេលចាប់ផ្ដើមគម្រោងនេះដំបូង មិនទាន់មានគម្រោងច្រើនដែលគាំទ្រលើគ្រប់ស្វាយចន្ទីនោះទេ ប៉ុន្តែឥឡូវមានការប្រកួតប្រជែង ដើម្បីទទួលជំនួយពីលោកខាងលិចសម្រាប់គាំទ្រលើគ្រាប់ស្វាយចន្ទី។ លើសពីនេះ មានរោងចក្រកែច្នៃដែលមានឧបករណ៍ខ្នាតធំកំពុងសាងសង់ជាបន្តបន្ទាប់ផងដែរ»។
ទោះបីស្ថិតក្នុងបរិបទនៃវិបត្តិកូវីដ-១៩យ៉ាងណាក៏ដោយ ឯកអគ្គរាជទូតជប៉ុនប្រចាំកម្ពុជា បានអះអាងថា ជប៉ុននៅតែបន្តជួយដោះស្រាយបញ្ហាប្រឈមនានានៅកម្ពុជា។ លោក មិកាមិ ម៉ាសាហ៊ីរ៉ូ ថ្លែងយ៉ាងដូច្នេះថា៖ «ខ្ញុំសង្កេតឃើញថានាពេលថ្មីៗនេះ កម្ពុជាកំពុងអភិវឌ្ឍយ៉ាងឆាប់រហ័ស ប៉ុន្តែនៅតែជាបញ្ហាប្រឈមមួយចំនួនដែលត្រូវដោះស្រាយ ដើម្បីកែលម្អគុណភាពជីវភាពរស់នៅប្រជាជន ដូចជាកាត់បន្ថយភាពក្រីក្រនិងការអភិវឌ្ឍសង្គម ដែលរួមមានវិស័យសុខាភិបាលនិងបរិស្ថានអប់រំ។ ទោះបីជាការរីករាលដាលកូវីដ-១៩ កំពុងក្លាយជាបញ្ហាដ៏ធ្ងន់ធ្ងរលើពិភពលោកយ៉ាងណាក៏ដោយ ប្រទេសជប៉ុននឹងបន្តសហការជាមួយអង្គការក្រៅរដ្ឋាភិបាលដើម្បីដោះស្រាយបញ្ហាប្រឈមនានា»។
សូមជម្រាបថា ចាប់តាំងពីឆ្នាំ២០០២មក ជប៉ុនបានផ្ដល់ជំនួយឥតសំណងជាង១៣០គម្រោង ដើម្បីជួយដល់គម្រោងអភិវឌ្ឍន៍សេដ្ឋកិច្ច និងសង្គម៕
Tag:
ជំនួយ
ជប៉ុន
អប់រំ
កសិកម្ម
© រក្សាសិទ្ធិដោយ thmeythmey.com