អាជ្ញាធរជាតិអប្សរា ហាមមិនឲ្យជិះម៉ូតូលើកំពែងក្រុងអង្គរធំ ដើម្បីកុំឲ្យខូចរចនាសម្ព័ន្ធបុរាណ

ជាតិ

អាជ្ញាធរជាតិអប្សរា ហាមមិនឲ្យជិះម៉ូតូលើកំពែងក្រុងអង្គរធំ ដើម្បីកុំឲ្យខូចរចនាសម្ព័ន្ធបុរាណ

16, Feb 2021 , 9:59 pm

រូបភាព

ដោយ: ឡាយ សុភាវតី

ភ្នំពេញ៖ អាជ្ញាធរជាតិអប្សរា ហាមមិនឲ្យពលរដ្ឋជិះម៉ូតូ ឡើងលើកំពែងក្រុងអង្គរធំឡើយ ដើម្បីជៀសវាងបង្កផលប៉ះពាល់ជាយថាហេតុណាមួយដល់រចនាសម្ព័ន្ធបុរាណ។

លោក ឡុង កុសល អ្នកនាំពាក្យអាជ្ញាធរជាតិអប្សរាបញ្ជាក់ប្រាប់សារព័ត៌មានថ្មីៗតាមទូរស័ព្ទថា ការជិះម៉ូតូឡើងលើលំពែងធ្វើឲ្យខូចសណ្ឋានដី និងបង្កការប៉ះពាល់ដល់កំពែង ទើបសម្រេចដាក់បំរាមហាមឃាត់បែបនេះ។ លោកថ្លែងយ៉ាងដូច្នេះថា៖ «ការហាមមិនឲ្យជិះម៉ូតូនេះ គឺយើងហាមរហូត ចាប់ពីថ្ងៃទី១៧កុម្ភៈនេះទៅ។ ហើយកំពែងក្រុងអង្គរនេះ អនុញ្ញាតឲ្យភ្ញៀវទេសចរដើរឬជិះកង់តែប៉ុណ្ណោះ ដើម្បីជាការពារមិនឲ្យខូតខាតទៅថ្ងៃមុខ»។

អ្នកនាំពាក្យរូបនេះ ក៏បានបញ្ជាក់ដែរថា ផ្លូវដែលម៉ូតូធ្លាប់ជិះឡើងលើកំពែងក្រុងអង្គរធំកាលពីមុន អាជ្ញាធរនឹងដាក់របាំង និងដាំដើមឈើ ដើម្បីជាវិធានការទប់ស្ដាត់មិនឲ្យមានម៉ូតូជិះឡើងលើកំពែងបន្តទៀត៕