Mbappe ឱ្យអាវដែលខ្លួនពាក់ស៊ុតបាន hat-trick ទៅស្តេចប្រដាល់ក្នុងទ្រុង Khabib

កីឡាអន្តរជាតិ

អន្តរជាតិ

Mbappe ឱ្យអាវដែលខ្លួនពាក់ស៊ុតបាន hat-trick ទៅស្តេចប្រដាល់ក្នុងទ្រុង Khabib

17, Feb 2021 , 3:25 pm

រូបភាព

ដោយ: ទេព ពិទូរ្យ

Kylian Mbappe បានផ្តល់អាវដែលរូបគេពាក់ស៊ុតបាន៣គ្រាប់ក្នុងការប្រកួតដែល Paris Saint-Germain ឈ្នះ Barcelona ៤-១ ទៅឱ្យកីឡាករវាយក្នុងទ្រុង (UFC) Khabib Nurmagomedov។

Mbappe បានក្លាយជាវីរបុរសរបស់ PSG តាមរយៈការរកបាន hat-trick ទល់នឹងក្រុមយក្សអេស្ប៉ាញក្នុងការប្រកួតជើងទី១ វគ្គ១៦ក្រុមចុងក្រោយពានរង្វាន់ Champions League នៅរាត្រីថ្ងៃទី១៦ ខែកុម្ភៈ។ ទម្រង់លេងដ៏គួរឱ្យចាប់អារម្មណ៍នេះ អាចជាផ្លូវក្នុងការនាំខ្សែប្រយុទ្ធវ័យក្មេងសញ្ជាតិបារាំងកាន់តែភ្លឺស្វាងក្នុងអាជីពបាល់ទាត់របស់គេ។

អ្វីដែលគួរចាប់អារម្មណ៍ខ្លាំងទៅទៀតនោះ Mbappe បានប្រគល់អាវដែលរូបគេពាក់ដើម្បីបង្កើតកំណត់ត្រារបស់ខ្លួន ដែលអាចលក់បានដល់រាប់លានដុល្លារទៅឱ្យកីឡាករវាយក្នុងទ្រុង Khabib។ តាមរយៈការបង្ហោះរបស់ UFC លើបណ្តាញសង្គម Twitter ថា Khabib កំពូលកីឡាករ UFC សញ្ជាតិរុស្ស៊ី ដែលស្រឡាញ់ចូលចិត្តកីឡាបាល់ទាត់ និងមានវត្តមានក្នុងជំនួប Barca ទល់ PSG ដែរនោះ បានទទួលអាវរបស់ Mbappe ហើយ។

អាវដែលសមាជិកជម្រើសជាតិបារាំង វ័យ២២ឆ្នាំ ពាក់ស៊ុតបំបាក់មុខ Barca នេះ ត្រូវបានគេជឿជាក់ថាអាចដាក់ដេញថ្លៃលក់បានក្នុងតម្លៃរាប់លានដុល្លារឯណោះ។

Khabib was in attendance for Barca vs PSG in the Champions League and he got Kylian Mbappé's jerseypic.twitter.com/5phcfNdujC
— UFC on BT Sport (@btsportufc) February 17, 2021

Khabib វ័យ៣២ឆ្នាំ ថ្មីៗនេះបានចូលនិវត្តន៍ពីកីឡា UFC ដោយបង្ហាញបំណងប្តូរអាជីពទៅជាកីឡាករបាល់ទាត់វិញ។ រូបគេបានពិភាក្សាជាមួយប្រធានសហព័ន្ធបាល់ទាត់អឺរ៉ុប (UEFA) លោក Aleksander Ceferin និងកំពូលតារាឆ្នើម Cristiano Ronaldo ជារឿយៗជុំវិញអាជីពបាល់ទាត់នេះ។

Khabib ធ្លាប់បានប្រាប់ទូរទស្សន៍ Match TV ថា ការលេងបាល់ទាត់នៅកម្រិតអាជីពគឺជាក្តីសុបិនរបស់ខ្លួនតាំងពីកុមារភាព។ កំពូលអ្នកវាយក្នុងទ្រុងមិនស្គាល់ចាញ់រូបនេះ ថែមទាំងហ៊ានអះអាងថាកីឡាបាល់ទាត់គឺជាស្តេចកីឡាទាំងអស់លើលោក៕