ជាតិ
សង្គមជាតិ
អភិបាលរាជធានី នឹងរៀបចំ«ស្រឡាង»ឆ្លងពីច្បារអំពៅទៅកោះពេជ្រ ដើម្បីរំដោះការកកស្ទះ រយៈពេល២ឆ្នាំ
លោក ឃួង ស្រេង អភិបាលរាជធានីភ្នំពេញ ពាក់ម៉ាស់ពណ៌ខៀវ ដោយដៃកំពុងកាន់ផែនទីនៅផ្នែកខាងចុង នាពេលចុះពិនិត្យទីតាំងដាក់ស្រឡាងឆ្លងពីតំបន់ច្បារអំពៅទៅមកកោះពេជ្រ នាព្រឹកថ្ងៃទី១៧កុម្ភៈ។ រូបថត៖ រដ្ឋបាលរាជធានីភ្នំពេញ
×![]()
ភ្នំពេញ៖ រដ្ឋបាលរាជធានីភ្នំពេញនឹងដាក់«ស្រឡាង»សម្រាប់ចម្លងពលរដ្ឋពីតំបន់ច្បារអំពៅទៅកាន់កោះពេជ្រនាពេលឆាប់ៗនេះ ដើម្បីដោះស្រាយបញ្ហាកកស្ទះចរាចរណ៍សព្វថ្ងៃ នៅត្រង់ចំណុចស្ពានព្រះមុនីវង្ស ពិសេសនៅតាមបណ្តោយផ្លូវជាតិលេខ១។ បើតាមលោក ឃួង ស្រេង អភិបាលរាជធានីភ្នំពេញ គម្រោងដាក់ឱ្យដំណើរការស្រឡាងនេះ មានរយៈពេល២ឆ្នាំ។ 
ដើម្បីជ្រាបច្បាស់សូមស្តាប់ប្រសាសន៍ របស់លោកឃួង ស្រេង អភិបាលរាជធានីភ្នំពេញ ខាងក្រោម ដូចខាងតទៅ៖
«យើងដាក់ស្រឡាងឱ្យប្រើប្រាស់ ក្នុងរយៈពេល២ឆ្នាំហ្នឹងទេ ដើម្បីដោះស្រោយបញ្ហាកកស្ទះចរាចរណ៍ចំពោះមុខ នាពេលបច្ចុប្បន្ន»។ នេះជាការលើកឡើងរបស់លោក ឃួង ស្រេង ដោយរៀបរាប់ប្រាប់សារព័ត៌មានថ្មីៗតាមទូរសព្ទ នារសៀលថ្ងៃទី១៧កុម្ភៈ ថា នៅពេលដែលស្ពានឆ្លងពីកោះនរា ស្ថិតក្នុងខណ្ឌច្បារអំពៅ ទៅកោះពេជ្រ នៅក្នុងខណ្ឌចំការមន របស់ក្រុមហ៊ុនOCIC ធ្វើរួចហើយ នឹងដាក់ឱ្យដំណើរជាផ្លូវការនោះ រដ្ឋបាលរាជធានីភ្នំពេញ នឹងដកស្រឡាង លែងឱ្យប្រើប្រាស់វិញ។
ចំពោះស្រឡាងដែលនឹងដំណើរការតំបន់ច្បារអំពៅខាងមុខនេះ គឺមាន២ទៅ៤គ្រឿង ឬលើសពីនេះ ដោយអាស្រ័យទៅលើចំនួនអ្នកប្រើប្រាស់សេវាកម្មនេះ។ បើតាមលោក ឃួង ស្រេង ស្រឡាងទាំងនេះ គឺយកចេញពីស្រឡាងអរិយក្សត្រ ដោយតម្រូវឱ្យពលរដ្ឋត្រូវបង់ថ្លៃទាបណាមួយ ក្នុងការធ្វើដំណើរ។
អភិបាលរាជធានីភ្នំពេញរូបនេះ មានប្រសាសន៍ដូច្នេះថា៖« ស្រឡាងនេះ គឺយើង Share (ចែករំលែក) ជាមួយវិស័យឯកជន...ឱ្យគាត់[ឯកជន]យកថ្លៃចុះ! មិនមែនឆ្លងស្រឡាងឥតគិតថ្លៃទេ! គេយកថ្លៃអាចថោកជាង ស្រឡាងនៅអរិយក្សត្រ»។
ជាមួយគ្នានេះ រដ្ឋបាលរាជធានីភ្នំពេញ ក៏គ្រោងនឹងស្ថាបនាស្ពានបេតុងមួយខ្សែបន្ថែម ដោយឆ្លងកាត់ទន្លេបាសាក់ ដើម្បីធ្វើឱ្យលំហូរចរាចរណ៍លើផ្លូវជាតិលេខ១ នៅក្នុងតំបន់អភិវឌ្ឍនេះ ឱ្យកាន់តែល្អប្រសើរ៕
Tag:
ចរាចរណ៍
ស្រឡាង
លោក ឃួង ស្រេង
© រក្សាសិទ្ធិដោយ thmeythmey.com
