អន្តរជាតិ
បារាំងនិងអាល្លឺម៉ង់ និយាយគ្នាមិនទាន់ត្រូវលើការអភិវឌ្ឍយន្តហោះចម្បាំងជំនាន់ថ្មី
×![]()
បារាំង និងអាល្លឺម៉ង់ចាប់ផ្តើមពិភាក្សាគ្នាជាថ្មីដើម្បីដោះស្រាយបញ្ហាជាប់គាំងក្នុងគម្រោងអភិវឌ្ឍយន្តហោះចម្បាំងរួមគ្នា។ គម្រោងរួមគ្នានេះ ជាការចំណាយលើវិស័យការពារជាតិក្នុងតម្លៃដ៏ច្រើនបំផុត ហើយក៏ជាប្រភពនៃភាពតានតឹងរវាងប៉ារីស និងបែរឡាំងលើវិស័យសន្តិសុខ និងឧស្សាហកម្មសព្វាវុធ។
គម្រោងដែលមានតម្លៃជាង១២០ពាន់លានដុល្លារ ដែលមានឈ្មោះប្រព័ន្ធប្រយុទ្ធផ្លូវអាកាសនាពេលអនាគត (FCAS) ជាគម្រោងរួមដែលផ្តួចផ្តើមដោយបារាំង និងអាល្លឺម៉ង់ ដោយបន្ទាប់មកចូលរួមដោយអេស្ប៉ាញ។ គម្រោងនេះត្រូវបានបង្កើតឡើងដើម្បីអភិវឌ្ឍយន្តហោះថ្មីជំនួសយន្តហោះចម្បាំង Rafale របស់បារាំង និង Eurofighter របស់អាល្លឺម៉ង់និងអេស្ប៉ាញនៅឆ្នាំ២០៤០។
ទោះចាប់ផ្តើមជាផ្លូវការនៅឆ្នាំ២០១៧ បន្ទាប់ពីទទួលបានការយល់ព្រមពីសភានៃប្រទេសបារាំង និងអាល្លឺម៉ង់ ប្រទេសទាំងពីរនៅមិនទាន់អាចដោះស្រាយលើការចំណាយ ការមិនទុកចិត្តគ្នា ក៏ដូចជាទំនួលខុសត្រូវការងារ។ ជាក់ស្តែងកាលពីខែដើមខែកុម្ភៈកន្លងទៅ ប្រធានាធិបតីបារាំង និងអធិការបតីអាល្លឺម៉ង់ពុំអាចដោះស្រាយបញ្ហាទាំងអស់នេះឡើយ ដោយនាំឱ្យទឹកប្រាក់ជាង៦ពាន់លានដុល្លារមិនអាចយកទៅប្រើប្រាស់កម្រោងនេះបាន។
នៅថ្ងៃទី១៧ ខែកុម្ភៈ មន្ត្រីការពារជាតិបារាំង អាល្លឺម៉ង់ និងអេស្ប៉ាញ ក៏ដូចជាតំណាងក្រុមហ៊ុនDassault, Airbus និង Indra ជួបពិភាក្សានៅរដ្ឋធានីប៉ារីសដើម្បីដោះស្រាយឧបសគ្គទាំងនោះ។ កម្មសិទ្ធិបញ្ញាក៏ជាចំណយចចចម្បងមួយដែលភាគីទាំងឡាយនិយាយគ្នាមិនត្រូវផងដែរ។
ក្រុមហ៊ុន Dassault បារម្ភចំពោះការទាមទាររបស់អាល្លឺម៉ង់ដែលចង់បានចំណេះដឹងស្តីពីការបច្ចេកវិទ្យានុយក្លេអ៊ែរ ចំណែកក្រុមហ៊ុន Airbus វិញ ចង់បានចំណែកស្មើគ្នាក្នុងកិច្ចការអភិវឌ្ឍប្រព័ន្ធយន្តហោះចម្បាំងថ្មីនេះ។ វត្តមានរបស់អេស្ប៉ាញក្នុងឆ្នាំ ២០១៩ កាន់តែធ្វើឱ្យការងារនេះកាន់តែស្មុគស្មាញបន្ថែមទៀតលើការបែងចែកការងារគ្នា។ អាល្លឺម៉ង់ទាមទារឱ្យបារាំងអនុញ្ញាតឱ្យខ្លួនប្រើប្រាស់បច្ចេកវិទ្យាដែលប្រទេសទាំងពីរនឹងអភិវឌ្ឍរួមគ្នា ទៅប្រើប្រាស់ក្នុងគម្រោងដទៃទៀតនាពេលអនាគត។
ការស្វែងរកចំណុចរួមមិនឃើញរវាងបារាំងនិងអាល្លឺម៉ង់នេះហើយ ក៏នាំឱ្យគំនិតពីរដែលក្នុងការសាងសង់គំរូយន្តហោះ។ បើដូចនេះមែន គម្រោងទាំងពីរនោះនឹងបង្ហាញពីគំនិតផ្សេងគ្នានៃកម្មវិធី FCAS ដែរ។
ទីភ្នាក់ងារព័ត៌មាន Reuters ផ្សាយថា តំណាងរាស្ត្របារាំងមួយរូបលើកឡើងពីភាពមិនទុកចិត្តលើស្ថិរភាពនៃគម្រោងនេះ។ តំណាងរាស្ត្រមិនបញ្ចេញឈ្មោះរូបនេះជឿថា បារាំង ប្រហែលជាងាយធ្វើការជាងបើសិនជាដៃគូក្នុងគម្រោងនេះជាអង់គ្លេស ព្រោះប្រទេសទាំងពីរមានទស្សននៃការធ្វើសង្គ្រាមដូចគ្នា។ បារាំង និងអង់គ្លេសធ្លាប់ចាប់ដៃគ្នាអភិវឌ្ឍយន្តហោះដឹកអ្នកដំណើរលឿនជាងសំឡេង Concorde នៅអំឡុងទសវត្សរ៍៧០ ដែលយន្តហោះនោះបន្តប្រតិបត្តិការដល់ឆ្នាំ២០០៣។
សូមបញ្ជាក់ថា បារាំងមានបំណងធ្វើទំនើបកម្មវិស័យយោធារបស់ខ្លួន ជាពិសេសវិស័យទ័ពអាកាស ចំណែកអាល្លឺម៉ងវិញពុំទាន់ចង់ធ្វើទំនើបកម្មអ្វីឡើយ ដោយទ័ពអាកាសរបស់ខ្លួនប្រើប្រាស់ផលិតផលក្រុមហ៊ុន Airbus ដែលមានតម្លៃថោកក្នុងការថែទាំ និងរៀបចំ។ រដ្ឋមន្ត្រីការពារជាតិបារាំង និងអាល្លឺម៉ង់ នឹងជួបគ្នានៅថ្ងៃទី១៨ ខែកុម្ភៈដើម្បីដោះស្រាយបញ្ហាទាំងនេះ៕
Tag:
បារាំង
អាល្លឺម៉ង់
© រក្សាសិទ្ធិដោយ thmeythmey.com
