កីឡាជាតិ
ជាតិ
×![]()
ដោយ: រួបរួម
ក្រុមជម្រើសជាតិកម្ពុជានៅតែបន្តឈរលេខរៀងទី១៧៣នៃតារាងចំណាត់ថ្នាក់ FIFA World Ranking ដែលបានចេញផ្សាយកាលពីថ្ងៃទី១៨ ខែកុម្ភៈ។ វិបត្តិកូវីដ-១៩ នាំឲ្យមានការកាត់បន្ថយការប្រកួតអន្តរជាតិជាច្រើន ដោយបែលហ្ស៊ិក រក្សាតំណែងលេខមួយ ខណៈបណ្តាប្រទេសអាហ្វ្រិកមានការប្រែប្រួលខ្លះ។
ចំណាត់ថ្នាក់ដំបូងសម្រាប់ឆ្នាំ២០២១នេះ ផ្អែកលើលទ្ធផលប្រកួត៤៣លើកចុងក្រោយ (ក្នុងនោះ១ប្រកួតប្រព្រឹត្តទៅកាលពីខែធ្នូ ឆ្នាំ២០២០)។ ជំនួប៣២ប្រកួតត្រូវបានរៀបចំឡើងក្រោមក្របខណ្ឌនៃពានរង្វាន់ African Nations Championship (CHAN)។
ក្រុមដែលមានការប្រកួតច្រើនជាងគេ គឺកាមេរូន ហ្គីណេ ម៉ាលី និងម៉ារ៉ុក ដែលមាន៦ប្រកួតរៀងៗខ្លួន។ ម៉ារ៉ុកជាប្រទេសដែលមានពិន្ទុឡើងខ្ពស់ជាងគេ (+៧ពិន្ទុ) ខណៈម៉ាលី មានចំណាត់ថ្នាក់ឡើង៣លំដាប់។ អ៊ូហ្គង់ដា ធ្លាក់ចុះ៦ពិន្ទុ ហើយក្រុមជម្រើសជាតិមួយនេះ រួមជាមួយស៊ីមបាវ៉េ ធ្លាក់ចុះ៤ចំណាត់ថ្នាក់។ កោះ Cook Islands ដែលខកខានប្រកួតជាង១ឆ្នាំកន្លះ មិនត្រូវបានដាក់ក្នុងចំណាត់ថ្នាក់នោះឡើយ។
ប្រទេសចំនួន៣២ដែលស្ថិតនៅលើកំពូលតារាង (Top 32) ក្នុងចំណាត់ថ្នាក់ចុងក្រោយ រក្សាទីតាំងរបស់ខ្លួនដដែល ដោយបែលហ្ស៊ិកឈរចំណាត់ថ្នាក់លេខ១ បន្ទាប់មក បារាំង ប្រេស៊ីល អង់គ្លេស ព័រទុយហ្គាល់ អេស្ប៉ាញ អាហ្សង់ទីន អ៊ុយរូហ្គាយ ម៉ិកស៊ិក និងអ៊ីតាលី។
ការប្រកួតអន្តរជាតិចុងក្រោយរបស់កម្ពុជា គឺកាលពីថ្ងៃទី១៩ ខែវិច្ឆិកា ឆ្នាំ២០១៩ នៅវគ្គជម្រុះ FIFA World Cup 2022 ដោយកម្ពុជាបានចាញ់ហុងកុង ២-០ នៅកីឡដ្ឋានរបស់ហុងកុង។ កម្ពុជារក្សាលេខរៀងទី១៧៣ក្នុងចំណោម២១០ប្រទេសម្រាប់តារាង FIFA World Ranking។
នៅតំបន់អាស៊ី ជប៉ុនបន្តឈរលើគេ (២៧) បន្ទាប់មក អ៊ីរ៉ង់ (២៩), កូរ៉េខាងត្បូង (៣៨), អូស្ត្រាលី (៤១), កាតា (៥៨), អារ៉ាប៊ីសាអូឌីត (៦៧), អ៊ីរ៉ាក់ (៦៩), អេមីរ៉ាតអារ៉ាប់រួម (៧៤), ចិន (៧៥) និងស៊ីរី (៧៦)។
វៀតណាមរក្សាចំណាត់ថ្នាក់ខ្ពស់ជាងគេនៅតំបន់អាស៊ីអាគ្នេយ៍ ដោយនៅលេខរៀងទី៩៣។ ថៃគឺជាក្រុមតែមួយក្នុងតំបន់ដែលកើន១ពិន្ទុ (១១០) បន្ទាប់មក ហ្វីលីពីន (១២៤), មីយ៉ាន់ម៉ា (១៣៧), ម៉ាឡេស៊ី (១៥៣), សិង្ហបុរី (១៥៨), ឥណ្ឌូណេស៊ី (១៧៣), កម្ពុជា (១៧៣), ឡាវ (១៨៨), ព្រុយណេ (១៩១) និងទីម័រខាងកើត (១៩៧)៕
Tag:
FIFA World Ranking
© រក្សាសិទ្ធិដោយ thmeythmey.com
