ច្បាប់ / សិទិ្ធមនុស្ស / តុលាការ
ជាតិ
មន្ត្រីច្បាប់រដ្ឋាភិបាល៖ អ្នកចែករំលែកព័ត៌មានមិនពិត ក៏ស្ថិតក្នុងការស្រាវជ្រាវរបស់សមត្ថកិច្ចដែរ លោក គឹម សន្តិភាព ចូលរួមកិច្ចប្រជុំមួយជាមួយមន្រ្តីក្រសួងមហាផ្ទៃ កាលពីថ្ងៃទី៨ ខែកុម្ភៈ ឆ្នាំ២០២១ (រូបពីក្រសួងយុត្តិធម៌)
× មិនមែនតែអ្នកបង្កើតព័ត៌មានក្លែងក្លាយទេ អ្នកដែលចូលរួមចែករំលែកបន្ត ក៏អាចត្រូវសមត្ថកិច្ច ស្រាវជ្រាវនិងហៅទៅសួរនាំដែរ។ នេះជាការបកស្រាយរបស់មន្ត្រីច្បាប់នៃក្រសួងយុត្តិធម៌។
ករណីអ្នកគ្រូម្នាក់ ទទួលមរណភាពដោយសារជំងឺរលាកស្រោមខួរកម្រិតធ្ងន់ តែត្រូវអ្នកប្រើប្រាស់បណ្តាញសង្គមមួយចំនួន នាំគ្នាអះអាងថា ទទួលមរណភាពដោយសារចាក់វ៉ាក់សាំងការពារជំងឺកូវីដ-១៩ឈ្មោះស៊ីណូហ្វាមរបស់ចិន បានក្លាយជាប្រធានបទមួយ ក្នុងសន្និសីទសារព័ត៌មានពាក់ព័ន្ធនឹងការកែសម្រួលអនុក្រឹត្យដាក់ពិន័យលើអ្នកបំពានវិធានការចត្តាឡីស័ក នៅព្រឹកថ្ងៃទី១៩ ខែកុម្ភៈ ឆ្នាំ២០២១ ក្រោមវត្តមានរបស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាល អ្នកស្រី ឱ វណ្ណឌីន រដ្ឋលេខាធិការក្រសួងសុខាភិបាល និង លោក គឹម សន្តិភាព រដ្ឋលេខាធិការក្រសួងយុត្តិធម៌។
អ្នកស្រី ឱ វណ្ណឌីន បំភ្លឺជាថ្មីថា អ្នកគ្រូរូបនោះ គឺទទួលមរណភាពដោយសារជំងឺរលាកស្រោមខួរកម្រិតធ្ងន់ មិនមែនដោយសារចាក់វ៉ាក់សាំងការពារជំងឺកូវី-១៩របស់ចិនឡើយ។ លោក គឹម សន្តិភាព យល់ថា អ្នកបង្កើតព័ត៌មានមិនពិតនេះ គឺមានគោលបំណងច្បាស់លាស់ ក្នុងការបង្កឲ្យមានភាពវឹកវរក្នុងសង្គម និងធ្វើឲ្យប្រជាពលរដ្ឋ បាត់ទំនុកចិត្តទៅលើវ៉ាក់សាំងរបស់ចិន។
លោក បកស្រាយថា អ្នកបង្កើតព័ត៌មានក្លែងក្លាយ ត្រូវប្រឈមនឹងបទល្មើសតាមមាត្រា៤៩៥ នៃក្រមព្រហ្មទណ្ឌ។ មាត្រា៤៩៥ នៃក្រមព្រហ្មទណ្ឌ គឺចែងពីបទញុះញង់បង្កឲ្យមានភាពវឹកវរដល់សន្តិសុខសង្គម ដោយអ្នកប្រព្រឹត្ត ត្រូវប្រឈមនឹងការជាប់ពន្ធនាគារពី៦ខែទៅ២ឆ្នាំ និងត្រូវពិន័យប្រាក់ពី១លានរៀលទៅ៤លានរៀល។
បើតាមមន្ត្រីជាន់ខ្ពស់របស់ក្រសួងយុត្តិធម៌រូបនេះ មិនមែនតែអ្នកបង្កើតព័ត៌មានក្លែងក្លាយទេ អ្នកចែករំលែកបន្ត ក៏ត្រូវទទួលខុសត្រូវចំពោះច្បាប់និងស្ថិតក្រោមការស្រាវជ្រាវរបស់សមត្ថកិច្ចដែរ។ លោក បញ្ជាក់ថា៖«ចង់មិនចង់អ្នក ដែលចែកចាយព័ត៌មានមិនពិត សមត្ថកិច្ច មានកាតព្វកិច្ចក្នុងការសួរនាំ អ៊ីចឹងត្រូវខាតទាំងពេលវេលា ត្រូវជាប់ជំពាក់ជាមួយទោសទណ្ឌទៀត បើគ្មានទឡ្ហីករណ៍ច្បាស់លាស់ ក្នុងការដោះបន្ទុកឲ្យរួចផុតពីការចោទប្រកាន់»។
ជាមួយគ្នានេះ លោក អំពាវនាវឲ្យប្រជាពលរដ្ឋ ពិនិត្យមើលប្រភពព័ត៌មានឲ្យបានច្បាស់ជាមុនសិន ថាពិតឬមិនពិត មុននឹងចែករំលែកបន្ត ដើម្បីចៀសផុតពីការទទួលខុសត្រូវផ្នែកព្រហ្មទណ្ឌ។
អ្នកស្រី ឱ វណ្ណឌីន ចាត់ទុកជាឧក្រិដ្ឋជន ចំពោះអ្នកបង្កើតព័ត៌មានមិនពិត ដែលថាមានអ្នកស្លាប់ ដោយសារការចាក់វ៉ាក់សាំងរបស់ចិន។ បន្ថែមពីនេះ អ្នកស្រី ហៅការបង្កើតព័ត៌មានមិនពិតនេះ ថាជាការបំពុលសង្គម និងធ្វើឲ្យប៉ះពាល់ដល់វិធានការសុខាភិបាល ក្នុងការទប់ស្កាត់ជំងឺកូវីដ-១៩ និងធ្វើឲ្យការយល់ដឹងរបស់ប្រជាពលរដ្ឋអំពីវ៉ាក់សាំងនិងការទប់ស្តាក់ជំងឺកូវីដ-១៩ មានភាពច្របូកច្របល់។ អ្នកស្រី បានអំពាវនាវឲ្យសមត្ថកិច្ច ចាត់វិធានការតាមច្បាប់ ទៅលើអ្នកបង្កើតព័ត៌មានមិនពិតទាំងនេះ៕
Tag:
COVID-19
គឹម សន្តិភាព
ព័ត៌មានក្លែងក្លាយ
© រក្សាសិទ្ធិដោយ thmeythmey.com