អន្តរជាតិ
×![]()
មន្ត្រីជាន់ខ្ពស់ចិនទទួលបន្ទុកិច្ចការហុងកុង នៅថ្ងៃទី២២ ខែកុម្ភៈ បានដាក់ចេញផែនការដើម្បីធានាថា មានតែអ្នកស្នេហាជាតិប៉ុណ្ណោះ អាចបម្រើការងារនៅហុងកុងបាន។ ការដាក់ផែនការនេះ ត្រូវមើលឃើញថា ជាវិធីសាស្ត្ររបស់ប៉េកាំងក្នុងការបំបាត់សំឡេងប្រឆាំង និងប្រជាធិបតេយ្យនិយមនៅទីក្រុងពាក់កណ្តាលស្វ័យភាពមួយនេះ ហើយបើកផ្លូវឱ្យរដ្ឋាភិបាលកណ្តាលកាន់តែអាចគ្រប់គ្រងតំបន់នេះដោយផ្ទាល់។
ការលើកឡើងដ៏គួរឱ្យកត់សម្គាល់របស់លោក Xia Baolong ប្រធានការិយាល័យកិច្ចការហុងកុង និងម៉ាកាវ ធ្វើឡើងរយៈពេល២សប្តាហ៍មុនកិច្ចប្រជុំរបស់សភាចិន។ ការលើកឡើងរបស់លោក Xia នេះ នាំឱ្យមានការទស្សទាយពីជំហានបន្ទាប់ដែលរដ្ឋាភិបាលចិននឹងធ្វើ ក្រោយអនុម័តច្បាប់សន្តិសុខដ៏ចម្រូងចម្រាស់ក្នុងឆ្នាំ២០២០ ។
«កិច្ចការដែលសំខាន់ និងប្រញាប់បំផុតគឺការអនុវត្តច្បាប់ដោយអ្នកស្នេហាជាតិ ដើម្បីធ្វើឱ្យប្រសើរឡើងប្រព័ន្ធគ្រប់គ្រង ជាពិសេសប្រព័ន្ធបោះឆ្នោត»។ នេះជាសម្តីរបស់លោក Xia ដែលចេញផ្សាយដោយការិយាល័យរបស់លោក។ លោកថា ការស្នេហាជាតិមានន័យថា ការស្មោះស្ម័គ្រទៅនឹងសាធារណរដ្ឋប្រជាមានិតចិន រដ្ឋធម្មនុញ្ញ និងបក្សកុម្មុយនីស្តចិន។ បន្ថែមពីនេះ សមាជិកនៃស្ថាប័នយុត្តិធម៌ហុងកុងក៏ត្រូវតែជាអ្នកស្នេហាជាតិផងដែរ។
រដ្ឋាភិបាលចិន ចាប់ផ្តើមបង្ក្រាបក្រុមអ្នកប្រឆាំង និងអ្នកប្រជាធិបតេយ្យនិយម ក្រោយក្រុមនេះឈ្នះការបោះឆ្នោតសង្កាត់ក្នុងឆ្នាំ២០១៩។ ពលរដ្ឋហុងកុង ក៏ចាប់ផ្តើមបាតុកម្មប្រឆាំងអាជ្ញាធរហុងកុង ក៏ដូចជារដ្ឋាភិបាលចិនក្នុងឆ្នាំ២០១៩ ក្រោយពេលហុងកុងមានគម្រោងធ្វើច្បាប់បត្យាប័នដែលបើកផ្លូវឱ្យបញ្ជូនជនជាប់ចោទទៅកាត់ទោសនៅចិន។ ចាប់ពីពេលនោះមកហុងកុងមានបាតុកម្មជាញឹកញាប់ ក៏ដូចជាអំពើហិង្សាផងដែរ។
ការលើកឡើងរបស់លោកXia អាចមានន័យថា ទីក្រុងប៉េកាំង អាចធ្វើយ៉ាងណាមិនឱ្យបេក្ខជនប្រឆាំងអាចឈរឈ្មោះក្នុងការបោះឆ្នោតសភាហុងកុងបាន។ កាសែតរដ្ឋចិន ក៏ធ្លាប់បានលើកឡើងពីការហាមមិនឱ្យបេក្ខជនប្រឆាំងឈរឈ្មោះក្នុងការបោះឆ្នោតផងដែរ។
ប្រធានការិយាល័យកិច្ចការហុងកុងរូបនេះអះអាងថា អាជ្ញាធរត្រូវបន្តឹងចន្លោះប្រហោងផ្លូវច្បាប់ ដែលបើកផ្លូវឱ្យអ្នកប្រឆាំងអាចចូលរួមក្នុងឆាកនយោបាយហុងកុងបាន។ លោក Xia បញ្ជាក់ថា ការធ្វើឱ្យប្រសើរឡើងប្រព័ន្ធបោះឆ្នោតហុងកុង ត្រូវតែដឹកនាំដោយរដ្ឋាភិបាលកណ្តាលចិន។ នេះបើតាមទីភ្នាក់ងារព័ត៌មាន AFP ។
កាលពីខែវិច្ឆិកា ឆ្នាំ២០២០ សភាហុងកុងបានបណ្តេញតំណាងរាស្ត្រចំនួន៤រូប ដោយលើកឡើងថាជាការគំរាមដល់សន្តិសុខហុងកុង។ ក្រោយការបណ្តេញចេញពីតំណែងនោះ តំណាងរាស្ត្របក្សប្រឆាំង១៥រូបផ្សេងទៀតក៏បានលាលែងចេញពីតំណែងផងដែរ។ ការលាលែនេះ ធ្វើឱ្យសភាហុងកុងដែលមានអាសនៈ៧០ មានតែសមាជិកសភាដែលគាំទ្ររដ្ឋាភិបាលចិន។ តំណាងរាស្ត្រពាក់កណ្តាល ជ្រើសរើសតាមការបោះឆ្នោត ឯពាក់កណ្តាលផ្សេងទៀតតំណាងឱ្យវិស័យធំៗនៃទីក្រុងពាណិជ្ជកម្មមួយនេះ។
ក្រោយការផ្ទេរហុងកុងមកឱ្យចិនកាន់កាប់ក្នុងឆ្នាំ១៩៩៧ ពលរដ្ឋហុងកុងពុំមានសិទ្ធិក្នុងការជ្រើសរើសនាយកប្រតិបត្តិតំបន់នេះឡើយ។ ពលរដ្ឋហុងកុងមានត្រឹមតែសិទ្ធិក្នុងការបោះឆ្នោតសង្កាត់តែប៉ុណ្ណោះ។ រដ្ឋាភិបាលចិន អាចនឹងរឹតបន្តឹងការបោះឆ្នោតសង្កាត់ហុងកុងបន្ថែមទៀតនៅពេលខាងមុខ៕
Tag:
ចិន
ហុងកុង
© រក្សាសិទ្ធិដោយ thmeythmey.com
