អត្ថបទពាណិជ្ជកម្ម
Visa សហការជាមួយ ក្រុមហ៊ុន តូតាល់ និងផ្សារបាយ័ន ដើម្បីពង្រីកការទូទាត់តាមរយៈបច្ចេកវិទ្យា Contactless
×![]()
ដោយ: សារព័ត៌មានថ្មីៗ
ភ្នំពេញ៖ កាលពីថ្ងៃទី២២ ខែកុម្ភៈ ឆ្នាំ២០២១ កន្លងទៅនេះ ក្រុមហ៊ុន Visa ដែលជាក្រុមហ៊ុនបច្ចេកវិទ្យាទូទាត់សាច់ប្រាក់ តាមប្រព័ន្ធឌីជីផលឈានមុខគេនៅក្នុងពិភពលោក បានចាប់ផ្តើមដាក់ឲ្យមានការទូទាត់ តាមរយៈបច្ចេកវិទ្យា Contactless នៅបណ្តាស្ថានីយ៍ចាក់ប្រេងឥន្ធនៈ របស់តូតាល់ និងនៅបណ្តាសាខាផ្សារទំនើបបាយ័ន នៅទូទាំងប្រទេស។ ភាពជាដៃគូនេះ បានកើតឡើង ស្របពេលដែលតម្រូវការនៃការទូទាត់ តាមរយៈបច្ចេកវិទ្យា contactless មានការកើនឡើងឥតឈប់ឈរ នៅក្នុងប្រទេស ដែលជំរុញដោយការអនុម័តយន្តការ ការអនុវត្តអនាម័យដែលល្អបំផុត ក្នុងការទប់ស្កាត់ការរាតត្បាតជំងឺ Covid-19 នាពេលបច្ចុប្បន្ន។
ការផ្លាស់ប្តូរយ៉ាងឆាប់រហ័ស នៃទិដ្ឋភាពការទូទាត់នៅក្នុងប្រទេសកម្ពុជា គឺឆ្លុះបញ្ចាំងពីនិន្នាការសកល នៃទំនោរចិត្តរបស់អតិថិជន។ បើយោងតាមការសិក្សាស្ទង់មតិ លើប្រធានបទ ការបោះជំហានទៅរកអាជីវកម្ម របស់ក្រុមហ៊ុន Visa (Visa’s Back to Business) ៧៨ ភាគរយនៃអតិថិជននៅទូទាំងសកលលោក បានកែសម្រួលមធ្យោបាយទូទាត់ថ្លៃទំនិញរបស់ពួកគេ ដោយសារតែមានការព្រួយបារម្ភពីសុវត្ថិភាព ហើយប្រមាណជិតពាក់កណ្តាល (៤៨ ភាគរយ) ជ្រើសរើសមិនទិញទំនិញ នៅហាងដែលប្រើប្រាស់វិធីសាស្ត្រទូទាត់ប្រាក់ ដែលតម្រូវឲ្យមានការប្រាស្រ័យទាក់ទងដោយផ្ទាល់ ជាមួយអ្នកគិតប្រាក់ ឬម៉ាស៊ីនដែលត្រូវប្រើរួមគ្នា ដូចជាម៉ាស៊ីនឆូតកាតជាដើម។ ការទូទាត់ដោយប្រើបច្ចេកវិទ្យា Contactless អនុញ្ញាតឱ្យម្ចាស់កាតអាចទូទាត់ដោយគ្រាន់តែ "ប៉ះដើម្បីបង់ប្រាក់" តាមរយៈការប្រើប្រាស់ Visa កាតឥណពន្ធ កាតឥណទាន និងកាតបង់ប្រាក់ជាមុន ដោយអតិថិជន អាចកាន់កាតជាប់នឹងដៃជានិច្ច ក្នុងពេលប្រតិបត្តិការ។ លើសពីនេះទៀត ពួកគាត់មិនចាំបាច់ចុះហត្ថលេខា ឬវាយលេខកូដសម្ងាត់ (Pin) ចំពោះប្រតិបត្តិការ ដែលមានចំនួនទឹកប្រាក់តិចជាង ៥០ដុល្លានោះទេ។
អ្នកស្រី ជុំ ម៉ូនីកា នាយិកាគ្រប់គ្រងក្រុមហ៊ុន Visa ប្រចាំប្រទេសកម្ពុជា បានមានប្រសាសន៍ថា៖ «អតិថិជនជាច្រើន បានបង្ហាញពីទំនោរក្នុងការប្រើប្រាស់ការទូទាត់ ដោយប្រើបច្ចេកវិទ្យា contactless យ៉ាងខ្លាំង។ របាយការណ៍ដដែលនេះ បានបង្ហាញថា ៥៧ ភាគរយ នៃប្រតិបត្តិការរបស់ Visa កាត ត្រូវបានធ្វើឡើងដោយការប៉ះដើម្បីបង់ប្រាក់»។ អ្នកស្រីបន្តទៀតថា៖ «កាលពីឆ្នាំមុនៗ កត្តាជំរុញនៅពីក្រោយនេះគឺ បទពិសោធន៍ក្នុងការទិញទំនិញដ៏រលូន ដែលផ្តល់ទាំងភាពងាយស្រួលដល់អតិថិជន និងសេវាកម្មដែលប្រកបដោយភាពប្រកួតប្រជែងសម្រាប់អាជីវកម្ម។ ប៉ុន្តែអ្វីទាំងអស់នោះ បានផ្លាស់ប្តូរកាលពីឆ្នាំ២០២០។ អ្វីដែលយើងកត់សម្គាល់ឃើញ ពាក់ព័ន្ធនឹងកំណើននៃចំណាប់អារម្មណ៍របស់អ្នកប្រើប្រាស់នៅពេលនេះ គឺដោយសារតែពួកគាត់ កំពុងតែអនុវត្ត និងគិតគូរអំពីបញ្ហាសុវត្ថិភាព និងសុខុមាលភាព»។
អ្នកស្រី កឹម សុភ័ក្រ អនុប្រធានផ្នែកទីផ្សារ និងប្រេងរំអិល របស់ក្រុមហ៊ុនតូតាល់កាំបូត បានមានប្រសាសន៍ថា៖« បេសកកម្មរបស់យើង គឺធ្វើយ៉ាងណាអាចឱ្យអ្នកបើកបរយានយន្ត ចូលមកចាក់ប្រេងឥន្ធនៈ នៅស្ថានីយ៍តូតាល់ ដោយសុវត្ថិភាព ហើយបន្តដំណើរទៅទៀត បានយ៉ាងឆាប់រហ័ស។ ការទូទាត់ដោយប្រើប្រាស់បច្ចេកវិទ្យា tap to pay របស់ Visa ធ្វើឱ្យមានការចំណេញច្រើន នៅក្នុងចំណុចទាំងពីរនេះ ដោយសារតែអតិថិជន អាចទូទាត់ត្រឹមតែប៉ុន្មានវិនាទីប៉ុណ្ណោះ។ ហើយប្រតិបត្តិការ អាចដំណើរការដោយគ្មានហានិភ័យ ដែលពាក់ព័ន្ធនឹងការប៉ះពាល់ដោយផ្ទាល់ជាមួយបុគ្គល ជាអ្វីដែលយើងគ្រប់គ្នាត្រូវប្រយ័ត្នប្រយែង អំឡុងពេលមានជំងឺរាតត្បាតនេះ»។
មតិស្រដៀងគ្នានេះផងដែរ ក៏ត្រូវបានចែករំលែកដោយ លោក ឈាង ម៉េង អ្នកចាត់ចែងទូទៅនៃផ្សារទំនើបបាយ័ន។ «យើងពិតជារំភើបរីករាយណាស់ ដែលអាចផ្តល់ជូននូវជម្រើស នៃការទូទាត់ប្រាក់បែបទំនើប ដល់អតិថិជនរបស់យើង។ ការទទួលយកការទូទាត់ តាមបែបបច្ចេកវិទ្យា contactless នឹងអនុញ្ញាតឱ្យអតិថិជនរបស់យើង ចំណាយពេលតម្រង់ជួរចាំតិចជាងមុន ផ្តល់ភាពងាយស្រួលសម្រាប់អតិថិជន ក៏ដូចជានិយោជិក ព្រមទាំងបង្កើនប្រសិទ្ធភាព នៃប្រតិបត្តិការទូទៅរបស់យើងផងដែរ»។
ទោះបីសេដ្ឋកិច្ចកម្ពុជា ពឹងផ្អែកយ៉ាងខ្លាំងលើសាច់ប្រាក់ក៏ដោយ វិធីសាស្ត្រថ្មីក្នុងការទូទាត់ប្រាក់ តាមរយៈប្រព័ន្ធអេឡិចត្រូនិក ក៏កំពុងទទួលបានការចាប់អារម្មណ៍ ពីអ្នកប្រើប្រាស់ផងដែរ។ ការសិក្សាចុងក្រោយ របស់ Visa អំពីឥរិយាបថ ក្នុងការទូទាត់ប្រាក់របស់អតិថិជនឆ្នាំ ២០២០ បានបង្ហាញថា ផ្សារទំនើប និងស្ថានីយ៍ឥន្ធនៈ គឺជាប្រភេទចំណាយដែលស្ថិតក្នុងចំណាត់ថ្នាក់លេខ២ និងលេខ៤ ក្នុងបញ្ជីនៃប្រភេទចំណាយសំខាន់របស់អតិថិជន ហើយប្រភេទចំណាយទាំងពីរនេះ គឺមានភាគរយខ្ពស់ជាងគេ ដែលអាចដឹកនាំទៅរកការផ្លាស់ប្តូររបស់សង្គម ទៅជាសង្គមមួយដែលមិនប្រើប្រាស់សាច់ប្រាក់សុទ្ធ។ ទន្ទឹមនឹងនេះដែរ មួយភាគបី នៃប្រជាជនកម្ពុជា (ស្មើនឹង ៣១ភាគរយ) ដែលជាអ្នកឆ្លើយតបទៅការស្ទង់មតិនេះ បានបង្កើនការប្រើប្រាស់ការទូទាត់តាមរយៈកាតបច្ចេកវិទ្យា contactless ហើយជិតពាក់កណ្តាល (ស្មើនឹង ៤៥ ភាគរយ) នៃអ្នកឆ្លើយចាប់អារម្មណ៍ ក្នុងការទូទាត់ដោយប្រើបច្ចេកវិទ្យា contactless ៕
3 VisaNet data December 2020.
4 The Visa Consumer Payment Attitudes Study was prepared by CLEAR in December 2020, surveyed amongst 7,526 consumers in Singapore, Philippines, Thailand, Indonesia, Vietnam, Malaysia, Myanmar and Cambodia.
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
