អន្តរជាតិ
អាមេរិក បង្ហាញបំណងក្លាយជាសមាជិកក្រុមប្រឹក្សាសិទ្ធិមនុស្ស UN ក្រោយចូលរួមឡើងវិញ
×![]()
រដ្ឋមន្ត្រីការបរទេសអាមេរិក អាន់តូនី ប្ល៊ីងខិន ប្រកាសបំណងអាមេរិកក្នុងការប្រកួតប្រជែងតំណែងជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិសម្រាប់ឆ្នាំ២០២២-២០២៤។ ការប្រកាសរបស់ប្រមុខការបរទេសអាមេរិកធ្វើឡើងក្នុងកិច្ចប្រជុំទី៤៦នៃក្រុមប្រឹក្សានេះ នាថ្ងៃទី២៤ ខែកុម្ភៈ។ 
មិនបានប៉ុន្មានក្រោយចូលរួមជាថ្មីក្នុងស្ថាប័នសិទ្ធិមនុស្សអង្គការសហប្រជាជាតិ អាមេរិកក៏ប្រកាសគោលដៅមួយទៀត គឺការក្លាយជាសមាជិកប្រឹក្សាសិទ្ធិមនុស្សតែម្ដង។ រដ្ឋមន្ត្រីការបរទេសអាមេរិក អាន់តូនី ប្ល៊ីងខិន ជាអ្នកប្រកាសបំណងនេះដោយផ្ទាល់។
«ខ្ញុំមានកិត្តិយសប្រកាសថា អាមេរិកនឹងឈរឈ្មោះក្នុងការបោះឆ្នោតជ្រើសរើសសមាជិកក្រុមប្រឹក្សាសិទ្ធិមនុស្សសម្រាប់អាណត្តិឆ្នាំ២០២២-២៤»។ លោក ប្ល៊ីងខិន ថ្លែងបែបនេះក្នុងវីដេអូផ្សាយក្នុងកិច្ចប្រជុំ ហើយក៏ស្នើសុំឱ្យរដ្ឋជាសមាជិកគាំទ្រវត្តមានអាមេរិកក្នុងការត្រឡប់មកកាន់ស្ថាប័ននេះវិញ ក្នុងការបោះឆ្នោតនៅមហាសន្និបាត នាខែតុលាខាងមុខ។ លោកធ្លាប់ព្រមានថា គ្មានអាមេរិក នាំឱ្យគ្មានអ្នកដឹកនាំស្ថាប័នេះ ហើយប្រទេសខ្លះនឹងមានឱកាសលើករបៀបវារៈដែលពុំគោរពសិទ្ធិមនុស្ស។
ការប្រកាសរបស់រដ្ឋមន្ត្រីការបរទេសអាមេរិក បង្ហាញពីការចូលរួមរបស់មហាអំណាចមួយនេះក្នុងស្ថាប័នអន្តរជាតិ ស្មើនឹងការច្រានចោលគោលនយោបាយការបរទេសបែបឯកោនិយមរបស់លោក ដូណាល់ ត្រាំ ។ លោក ត្រាំ ដកអាមេរិកចេញពីក្រុមប្រឹក្សានេះក្នុងឆ្នាំ២០១៨ ដោយអះអាងថា ស្ថាប័នមួយនេះមិនព្រមធ្វើកំណែទម្រង់ ទទួលយកប្រទេសដែលមានកំណត់ត្រាសិទ្ធិមនុស្សអាក្រក់ជាសមាជិក និងប្រឆាំងអ៊ីស្រាអែលដែលជាសម្ពន្ធមិត្ត។
រដ្ឋមន្ត្រីការបរទេសអាមេរិក និយាយថា មហាអំណាចមួយនេះនឹងយកសិទ្ធិមនុស្ស និងលទ្ធិប្រជាធិបតេយ្យជាចំនុចកណ្តាលនៃគោលនយោបាយការបរទេសរបស់ខ្លួនដោយសារតែវាមានសារសំខាន់ដល់សន្តិភាព និងស្ថិរភាព។
ចិន រុស្ស៊ី វ៉េណេស៊ុយអេឡា គុយបា អេរីត្រេ សាធារណរដ្ឋប្រជាធិបតេយ្យកុងហ្គោ អារ៉ាប៊ីសាអូឌីត និងអ៊ូសបេគីស្ថាន ដែលមានកំណត់ត្រាសិទ្ធិមនុស្សមិនល្អ សុទ្ធសឹងជាសមាជិកប្រឹក្សានេះ។ លោក ប្ល៊ីងខិន រិះគន់នីតិវិធីក្នុងការជ្រើសរើសសមាជិក ព្រោះប្រទេសដែលមានកំណត់ត្រាសិទ្ធិមនុស្សអាក្រក់បំផុតមិនគួរក្លាយជាសមាជិកឡើយ។ លោកទាមទារឱ្យរដ្ឋទាំងអស់ធ្វើការរួមគ្នាក្នុងការធ្វើឱ្យប្រសើរឡើងសមាជិកភាពរបស់ក្រុមប្រឹក្សានេះ ដើម្បីឱ្យស្ថាប័នអាចធ្វើការច្រើនជាងមុនលើបញ្ហាសិទ្ធិមនុស្សនៅជុំវិញពិភពលោក។
ក្រុមប្រឹក្សាសិទ្ធិមនុស្សអង្គការសហប្រជាជាតិ ត្រូវបានបង្កើតឡើងក្នុងឆ្នាំ២០០៦ និងដែលជាស្ថាប័នចំណុះឲ្យអង្គមហាសន្និបាត។ ស្ថាប័ននេះ មានរដ្ឋជាសមាជិកចំនួន៤៧ ជ្រើសរើសតាមរយៈការបោះឆ្នោតជាសម្ងាត់ និងមានអាណត្តិ៣ឆ្នាំ។ ក្រុមប្រឹក្សានេះទទួលខុសត្រូវក្នុងការលើកកម្ពស់ និងការពារសិទ្ធិមនុស្ស។ សមាជិកទាំង៤៧ ត្រូវបានបែងចែកតាមតំបន់ ដោយអាស៊ី-ប៉ាស៊ីហ្វិក និងអាហ្វ្រិកមាន១៣រដ្ឋដូចគ្នា អឺរ៉ុបខាងកើត៦រដ្ឋ អាមេរិកឡាទីននិងការ៉ាអ៊ីប៨រដ្ឋ និងអឺរ៉ុបខាងលិច និងតំបន់ផ្សេងៗទៀត៧រដ្ឋ៕
Tag:
អាមេរិក
UN
© រក្សាសិទ្ធិដោយ thmeythmey.com
