នាវា USS Pueblo ត្រូវយោធាជើងទឹកកូរ៉េខាងជើងចាប់ឃាត់នៅខែមករា ឆ្នាំ១៩៦៨ នៅពេលនាវានេះកំពុងបំពេញបេសកកម្មក្រោមឈ្មោះជានាវាអង្កេតបរិស្ថាន។ កូរ៉េខាងជើង អះអាងថា នាវានេះចូលដែនទឹករបស់ខ្លួន តែអាមេរិកបដិសេធ។ នាវិក៨៣នាក់ ត្រូវបានឃាត់ទុក ហើយអាមេរិកអះអាងថា ពួកគេរងទារុណកម្ម មុនត្រូវដោះលែងនៅខែធ្នូ ឆ្នាំដដែល។

 

សំណុំរឿងនេះ ទើបឡើងដល់តុលាការនៅឆ្នាំ២០១៨ ប៉ុណ្ណោះ ក្រោយក្រសួងយុត្តិធម៌អាមេរិកចេញការបកស្រាយពាក់ព័ន្ធអភ័យឯកសិទ្ធិរដ្ឋាភិបាលបរទេសក្នុងតុលាការអាមេរិក។ ដោយកូរ៉េខាងជើងត្រូវបញ្ចូលក្នុងបញ្ជីរដ្ឋគាំទ្រភេរវកម្មនៅឆ្នាំ២០១៧ តុលាការអាមេរិកក៏អាចកាត់ក្ដីលើសំណុំរឿងទារសំណងនេះបាន។

 

នៅថ្ងៃទី២៥ ខែកុម្ភៈ តុលាការសហព័ន្ធនៃរដ្ឋធានីវ៉ាស៊ីនតោន ក៏បានបញ្ជាឱ្យកូរ៉េខាងជើងផ្តល់សំណងដល់នាវិករងគ្រោះដែលរស់រានមានជីវិត និងគ្រួសារនាវិកដែលបានស្លាប់។ បើតាមការសម្រេចរបស់តុលាការ ជនរងគ្រោះត្រូវទទួលបានប្រាក់សំណងសំណងចំនួន១,១៥ ពាន់លានដុល្លារអាមេរិក តែចំនួននេះត្រូវគុណនឹងពីរដើម្បីជាការដាក់ទណ្ឌកម្មលើក្រុងព្យុងយ៉ាង។ ដូចនេះ កូរ៉េខាងជើងត្រូវបង់សំណងឡើងដល់២,៣ពាន់លានដុល្លារឯណោះ។

 

បើតាមទីភ្នាក់ងារព័ត៌មាន AFP តុលាការបញ្ជាផ្តល់សំណងពី២២លានដុល្លារទៅ ៤៨លានដុល្លារអាមេរិក ដល់សមាជិកនាវិកទាំង ៤៩នាក់ដែលនៅរស់រានមានជីវិត ចំណែកសមាជិកគ្រួសារនាវិកដែលស្លាប់ប្រហែល១០០នាក់ ទទួលបានតិចជាងនេះ។ យ៉ាងណាមិញ កូរ៉េខាងជើង មិនបានចូលរួមក្នុងសំណុំរឿងនេះឡើយ ហើយគេក៏មិនច្បាស់ថា ជនរងគ្រោះអាចរំពឹងថានឹងទទួលបានសំណងខូចខាតយ៉ាងដូចម្តេចដែរ។