ស.ស.យ.ក និងក្រុមហ៊ុនឯកជនមួយ ចុះអនុស្សរណៈបណ្តុះបណ្តាលជំនាញ និងផ្តល់ឱកាសការងារដល់យុវជនកម្ពុជា

ជាតិ

ស.ស.យ.ក និងក្រុមហ៊ុនឯកជនមួយ ចុះអនុស្សរណៈបណ្តុះបណ្តាលជំនាញ និងផ្តល់ឱកាសការងារដល់យុវជនកម្ពុជា

04, Mar 2021 , 10:29 pm

រូបភាព

រូបភាពពីសហភាពសហព័ន្ធយុវជនកម្ពុជា1

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ សហភាពសហព័ន្ធយុវជនកម្ពុជា និងក្រុមហ៊ុនវើលប្រ៊ីដគ្រុប បានចុះហត្ថលេខាលើអនុស្សរណៈយោគយល់ស្តីពីកិច្ចសហប្រតិបត្តិការលើការបណ្តុះបណ្តាលយុវជន និងការផ្តល់ឱកាសការងារ។ ពិធីចុះហត្ថលេខាលើអនុស្សរណៈយោគយល់ ដែលរៀបចំនៅថ្ងៃទី៤ មីនានេះ ប្រព្រឹត្តឡើងក្នុងគោលបំណងអនុញ្ញាតឱ្យស្ថាប័នទាំងពីរសហការគ្នា ដើម្បីផ្តល់ឱកាសការងារ និងការបណ្តុះបណ្តាលជំនាញនានាដល់យុវជនឆ្ពោះទៅកាន់អាជីពការងារជាក់លាក់មួយ។

តាមសង្កេតយល់ឃើញពីតួនាទី និងការចូលរួមដ៏សំខាន់របស់យុវជនក្នុងការជំរុញការអភិវឌ្ឍសង្គមជាតិ ការចុះអនុស្សរណៈយោគយល់ខាងលើនេះ នឹងផ្ដល់ជាវេទិកាចែករំលែកបទពិសោធន៍ ចំណេះដឹងល្អៗ ដើម្បីបំផុសគំនិតដល់យុវជនអភិវឌ្ឍខ្លួន និងជាជំនួយស្មារតីសម្រាប់ការត្រៀមខ្លួនក្នុងការអនុវត្តការងារជាក់ស្ដែង។

រូបភាពពីសហភាពសហព័ន្ធយុវជនកម្ពុជា

ដោយឈរលើទស្សនៈថា «យុវជន គឺជាទំពាំងស្នងឬស្សី និងជាធនធានសម្រាប់ការអភិវឌ្ឍកម្ពុជានាពេលនេះ និងទៅអនាគត» ស.ស.យ.ក អះអាងថា កំពុងបំពេញការងារយ៉ាងសកម្មលើកិច្ចការលើកកម្ពស់សមត្ថភាពយុវជន និងអភិវឌ្ឍធនធានមនុស្ស។ បើតាម ស.ស.យ.ក ការងារដែលសម្រេចបាននាពេលកន្លងមក ជាការផ្តល់ឱកាសឱ្យយុវជនចូលរួមក្នុងសកម្មភាពសង្គម និងការបង្កើតជាវេទិកា និងកម្មវិធីបណ្តុះបណ្តាលផ្សេងៗ ដែលផ្ដល់ជាប្រយោជន៍ដល់យុវជន ដើម្បីអភិវឌ្ឍសមត្ថភាព។

រូបភាពពីសហភាពសហព័ន្ធយុវជនកម្ពុជា

ជាមួយគ្នានេះ ស.ស.យ.ក បានរៀបចំវគ្គបំប៉នសម្រាប់សិស្សថ្នាក់ទី១២ និងការចូលរួមជាមួយរដ្ឋាភិបាលក្នុងកំណែទម្រង់ប្រព័ន្ធអប់រំ ដោយផ្តោតលើការងារសង្កេតការណ៍ប្រឡងមធ្យមសិក្សាទុតិយភូមិ។ ពាក់ព័ន្ធនឹងការបណ្តុះបណ្តាលយុវជន និងការផ្តល់ឱកាសការងារ ស.ស.យ.ក. បានយកចិត្តទុកដាក់ក្នុងការគៀរគរ និងស្វែងរកកម្មវិធីអាហារូបករណ៍ទាំងក្នុង និងក្រៅប្រទេស សម្រាប់ផ្តល់ជូនដល់យុវជនជាសិស្សានុសិស្ស និងនិស្សិត ជាបន្តបន្ទាប់រៀងរាល់ឆ្នាំ។

តាមរយៈកិច្ចសហការរវាង ស.ស.យ.ក និងក្រុមហ៊ុនវើលប្រ៊ីដគ្រុបនេះ មិនត្រឹមតែបានផ្ដល់ឱកាសដល់យុវជនកម្ពុជាក្នុងការស្វែងរកបទពិសោធន៍ការងារផ្សេងៗនោះទេ ប៉ុន្តែក៏នឹងជំរុញដល់ការទំនាក់ទំនងរវាងស្ថាប័នទាំងពីរឱ្យកាន់តែមានភាពស្អិតរមួត និងរឹងមាំផងដែរ។ នេះបើតាមសេចក្ដីប្រកាសព័ត៌មានរបស់ស.ស.យ.ក៕