អ្នកជំងឺ​កូ​វីដ ៣៤​ករណី​ទៀត ខណ​:​អ្នកជា​សះស្បើយ​១៩​នាក់ ដែល​ពាក់ព័ន្ធ​ព្រឹត្តិការណ៍​២០ កុម្ភ​:
COVID-19
ជាតិ
អ្នកជំងឺ​កូ​វីដ ៣៤​ករណី​ទៀត ខណ​:​អ្នកជា​សះស្បើយ​១៩​នាក់ ដែល​ពាក់ព័ន្ធ​ព្រឹត្តិការណ៍​២០ កុម្ភ​:
07, Mar 2021 , 8:53 am        
រូបភាព
​ភ្នំពេញ​៖ ក្រសួងសុខាភិបាល​នា​ថ្ងៃទី​៧ ខែមីនា បានប្រកាស​រកឃើញ​អ្នក​ឆ្លង​ជំងឺ​កូ​វីដ​-១៩ ចំនួន​៣៤​នាក់​ទៀត ដោយ​៣១​នាក់​ពាក់ព័ន្ធ​នឹង​ព្រឹត្តិការណ៍​សហគមន៍​២០​កុម្ភៈ និង​៣​នាក់​ទៀត​ជា​ករណី​នាំចូល​។



​ក្រសួងសុខាភិបាល​បាន​បញ្ជាក់ថា អ្នក​ឆ្លង​ជំងឺ​កូ​វីដ​-១៩​នៅថ្ងៃនេះ មាន​ជនជាតិ​ចិន​ចំនួន​២១​នាក់ ដោយ​៧​នាក់​នៅ​រាជធានី​ភ្នំពេញ និង​១៤​នាក់​ទៀត​នៅ​ខេត្ត​ព្រះសីហនុ​។ ជនជាតិខ្មែរ​មាន​ចំនួន​៧​នាក់​នៅ​រាជធានី​ភ្នំពេញ​ កំពង់ធំ និងព្រៃវែង។ ជនជាតិ​វៀតណាម​ចំនួន​១​នាក់នៅព្រះសីហនុ​។ 
 
​ចំពោះ​អ្នកជំងឺ​កូ​វីដ​-១៩​ដែលជា​ករណី​នាំចូល ជា​បុរស​ជនជាតិខ្មែរ​អាយុ ៤០,៥៦ និង​៥២​ឆ្នាំ ពួកគេ​ទាំង​៣​នាក់​នោះ​ជា​អ្នក​បម្រើការ​នៅ​អង្គការសហប្រជាជាតិ ជា​អ្នកធ្វើដំណើរ​មកពី​ប្រទេស​អា​ហ្វ្រី​ក ហើយ​មកដល់​កម្ពុជា​នៅ​ថ្ងៃទី​២១ ខែកុម្ភៈ​។ 
 
​បច្ចុប្បន្ន​ពួកគេ​ទាំងនោះ​ត្រូវបាន​សម្រាក​ព្យាបាល​នៅ​មន្ទីរពេទ្យបង្អែក​ខេត្ត​ព្រះសីហនុ មណ្ឌល​ច​ត្តា​ឡី​ស័ក​រាជធានី​ភ្នំពេញ និង​សាលា​រក្សា​សន្តិភាព​ពហុ​សាស្ត្រ​កំពង់ស្ពឺ​។ 
​នៅថ្ងៃនេះ​ក្រសួងសុខាភិបាល​ក៏បាន​ប្រកាស​ករណី​ជាសះស្បើយ​ចំនួន​១៩​នាក់ ដែលជា​អ្នកពាក់ព័ន្ធ​នឹង​ព្រឹត្តិការណ៍​សហគមន៍​២០​កុម្ភៈ​។​
 
​នៅ​កម្ពុជា​ទាំងមូល​មាន​អ្នក​ឆ្លង​សរុប​ចំនួន​៩៨៧​នាក់​ហើយ ក្នុងនោះ​ករណី​សះស្បើយ មាន​៥១០​នាក់ រីឯ​អ្នកជំងឺ​ក្នុង​សហគមន៍​២០​កុម្ភៈ ឡើងដល់​៤៧៧​នាក់​ហើយ​៕​

Tag:
 ​កូ​វីដ​-១៩
© រក្សាសិទ្ធិដោយ thmeythmey.com