ក្រសួងសុខាភិបាល បញ្ជាក់ថា អ្នកពាក់ព័ន្ធនឹងទីតាំងម៉ាស្សា ៣កន្លែងនៅ ក្នុងខណ្ឌចំនួន២ នៃរាជធានីភ្នំពេញ ចាំបាច់ការធ្វើតេស្ត ដើម្បីទប់ស្កាត់ការចម្លងទ្រង់ទ្រាយធំនៅក្នុងប្រទេសកម្ពុជា។ ទីតាំងទាំង៣នោះ រួមមាន Let's Relax Spa (ផ្លូវម៉ៅសេទុង) Let's Relax Spa (ចំការមន) និងLet's Relax Spa (ផ្លូវនរោត្ដម)។

 

 ក្រសួង បញ្ជាក់ថា នៅថ្ងៃទី០៥ ខែមីនា ឆ្នាំ២០២១ លទ្ធផលវិភាគមន្ទីរពិសោធន៍បានបង្ហាញថា មានករណីវិជ្ជមាន វីរុសកូវីដ-១៩ លើបុគ្គលិកហាងម៉ាស្សា ចំនួន ០៣នាក់។ ក្រសួងបន្ថែមថា អតិថិជនណា ដែលបានប្រើប្រាស់សេវានៅទីតាំងទាំង៣កន្លែងខាងលើ ត្រូវធ្វើចត្តាឡីស័កចំនួន ១៤ថ្ងៃ ដើម្បីចូលរួមចំណែកក្នុងការកាត់ផ្តាច់បាននូវការចម្លងវីរុសកូវីដ- ១៩ នៅក្នុងសហគមន៍យើងបានទាន់ពេលវេលា បញ្ចៀសបាននូវគ្រោះថ្នាក់នៃការរាតត្បាតលក្ខណៈធំធេងនៅរាជធានីភ្នំពេញ និង នៅតាមបណ្ដាខេត្តនានានៅក្នុងប្រទេសកម្ពុជា៕