បញ្ហាអារម្មណ៍ផ្ទាល់ខ្លួន ធ្វើឱ្យកីឡាករPaddy Barrett ចាកចេញពីក្លិបព្រះខ័នរាជស្វាយរៀង
កីឡាជាតិ
ជាតិ
បញ្ហាអារម្មណ៍ផ្ទាល់ខ្លួន ធ្វើឱ្យកីឡាករPaddy Barrett ចាកចេញពីក្លិបព្រះខ័នរាជស្វាយរៀង
22, Mar 2021 , 10:46 am        
រូបភាព
ភ្នំពេញ៖ កីឡាករសញ្ជាតិអៀរឡង់ Paddy Barrett បានចែកផ្លូវគ្នាជាមួយក្លិបព្រះខ័នរាជស្វាយរៀង ជាង១ខែមកហើយ ទាំងមិនទាន់បានបង្ហាញទម្រង់លេង។ ប៉ុន្តែការចែកផ្លូវគ្នានេះ អាចបណ្ដាលមកពី«បញ្ហាអារម្មណ៍ផ្ទាល់ខ្លួន» ទើបធ្វើឱ្យកីឡាកររូបនេះ សម្រេចចាកចេញពីកម្ពុជា។


ព្រះខ័នរាជស្វាយរៀង បានប្រកាសជាផ្លូវការមួយ កាលពីចុងខែកុម្ភៈថា« កីឡាករខ្សែការពារ Paddy Barrett បានចាកចេញពីក្លិបហើយត្រលប់ទៅអៀកឡង់វិញ ដោយសារហេតុផលផ្ទាល់ខ្លួន» ។ ហេតុផលផ្ទាល់ខ្លួននេះ គឺមកពីបញ្ហាអារម្មណ៍របស់កីឡាកររូបនេះ ដែលមិនទាន់ទម្លាប់រស់នៅទឹកដីកម្ពុជា។
 
Paddy Barrett បានប្រាប់សារព័ត៌មានអៀរឡង់ កាលពីសប្ដាហ៍មុនថា «ប្រទេសកម្ពុជា គឺជាអ្វីដែលខ្ញុំពិតជាពេញចិត្ត ប៉ុន្តែខ្ញុំមិនស្រលាញ់ទេ។ គ្រប់យ៉ាងនៅទីនេះ មិនមែនសម្រាប់ខ្ញុំនោះទេ» ។
 
មិនតែប៉ុណ្ណោះ បញ្ហាភាសា និងរូបភាពក្រីក្រនៅកម្ពុជា ក៏ជាផ្នែកមួយ នៅក្នុងអារម្មណ៍កីឡាកររូបនេះ ផងដែរ។
 
«ខ្ញុំបានមើលឃើញភាពក្រីក្រជាច្រើន។ វាពិតជាសោកសៅខ្លាំងណាស់ ដែលឃើញក្មេងអាយុ៣ និង៤ឆ្នាំ ដើរដោយគ្មានសម្លៀកបំពាក់ និងស្បែកជើង។ អ្នកឃើញវានៅលើកញ្ចក់ទូរទស្សន៍ប៉ុន្តែនៅពេលអ្នកឃើញវាផ្ទាល់វាកាន់តែបង្ហាញឱ្យច្បាស់ថែមទៀត។ ហើយនៅខាងបាល់ទាត់វាមានការលំបាកជាមួយនឹងឧបសគ្គភាសា»។ នេះជាការលើកឡើងរបស់ខ្សែការពារវ័យ២៧ឆ្នាំ សញ្ជាតិអៀរឡង់ ដែលធ្លាប់អះអាងថា ខ្លួននឹងយកបទពិសោធន៍មកជួយពង្រឹងតំបន់ការពាររបស់ក្លិបព្រះខ័នរាជស្វាយរៀង ក៏ដូចជាចែករំលែកដល់កីឡាករវ័យក្មេងនៅក្នុងក្រុម។
 
Paddy Barrett បានចុះកិច្ចសន្យាជាមួយក្លិបព្រះខ័នរាជស្វាយរៀង តាមរយៈអ្នកចាត់ការទូទៅសញ្ជាតិអៀរឡង់ Conor Nestor កាលពីដើមខែមករា ឆ្នាំ២០២១។ ប៉ុន្តែការរស់នៅកម្ពុជា បានត្រឹមរយៈពេលជាង១ខែ ទាំងមិនទាន់បង្ហាញទម្រង់លេងផងនោះ ស្រាប់តែកីឡាកររូបនេះ សម្រេចចែកផ្លូវគ្នាជាមួយក្លិបព្រះខ័នរាជស្វាយរៀងវិញ។
 
កីឡាករ លោកBarrett Paddy Barrett បានចាប់អាជីពបាល់ទាត់ដំបូងជាមួយក្លិបយុវជន Aberdeen F.C នៅអំឡុងឆ្នាំ២០១០។ ក្រោយមករូបគេផ្ទេរទៅចូលរួមជាមួយក្លិប Dundee United ក្នុងកម្រិតយុវជនដូចគ្នា ហើយត្រូវបានដំឡើងឲ្យមកលេងក្នុងឈុតធំចន្លោះពីឆ្នាំ២០១៣-២០១៤។ 
 
ក្នុងអំឡុងពេលរួមរស់ជាមួយ Dundee United រូបគេបានចូលរួមជាមួយក្លិប Waterford ក្រោមលក្ខខណ្ឌខ្ចីជើងបាន១រដូវកាល មុនផ្ទេរទៅ Galway United នៅពាក់កណ្តាលរដូវកាលឆ្នាំ២០១៤។ នៅឆ្នាំ២០១៥ រូបគេផ្ទេរទៅកាន់ក្លិប Dundalk នៅអៀរឡង់ រហូតដល់ឆ្នាំ២០១៧។ នៅពាក់កណ្តាលរដូវកាលឆ្នាំ២០១៧ រូបគេ បានផ្ទេរទៅចូលរួមជាមួយ Waterford ជាថ្មីក្រោមលក្ខខណ្ឌខ្ចីជើង។
 
ក្រោយមកនៅឆ្នាំ២០១៨ Paddy បានផ្លាស់ទៅចូលរួមជាមួយក្លិប Cincintani FC បន្ទាប់មកផ្ទេរទៅក្លិប Indy Eleven នៅឆ្នាំ២០១៩ រហូតដល់ដំណាច់រដូវកាលឆ្នាំ២០២០៕  
 

Tag:
 Paddy Barrett
  បាល់ទាត់
© រក្សាសិទ្ធិដោយ thmeythmey.com