COVID-19
ជាតិ
វេជ្ជបណ្ឌិត ស្ដើង ជា ស្លាប់ដោយសារកូវីដ-១៩ ជាករណីទី៤នៅកម្ពុជា លោកវេជ្ជបណ្ឌិត ស្ដើង ជា
× ភ្នំពេញ៖ វេជ្ជបណ្ឌិត ស្ដើង ជា វ័យ៧៥ឆ្នាំ ស្លាប់ដោយសារកូវីដ-១៩ នៅព្រឹកថ្ងៃទី២២ មីនានេះ។ ការស្លាប់របស់វេជ្ជបណ្ឌិតរូបនេះ ធ្វើឱ្យកម្ពុជា មានអ្នកស្លាប់ដោយសារជំងឺកាចសាហាវនេះ ចំនួន៤ករណីហើយ។ នេះបើតាមសេចក្តីប្រកាសរបស់ក្រសួងសុខាភិបាល។
យោងតាមក្រសួងសុខាភិបាល លោក ស្តើង ជា វេជ្ជបណ្ឌិតចូលនិវត្តន៍ និងជាប្រធានគណកម្មការវេជ្ជសាស្ត្រ និងវិទ្យាសាស្ត្រកីឡានៃគណៈកម្មាធិការជាតិអូឡាំពិកកម្ពុជា បានទទួលមរណភាពវេលាម៉ោង៨ព្រឹកនៅមន្ទីរពេទ្យខ្មែរសូវៀត នាថ្ងៃទី២២ ខែមីនា នេះ ពោលគឺក្រោយមួយថ្ងៃ ពេលរកឃើញលោកវិជ្ជមានកូវីដ-១៩។
ភ្លាមៗក្រោយពេលចូលដល់មន្ទីរពេទ្យ ក្រុមគ្រូពេទ្យពិនិត្យឃើញថា គាត់មានអាការហត់ខ្លាំង និងពិបាកដកដង្ហើម ព្រមទាំងមានការវិវត្តយ៉ាងរហ័សទៅរកសភាពធ្ងន់ធ្ងរខ្លាំងក្នុងរយៈពេល៣-៤ថ្ងៃមុនចូលមន្ទីរពេទ្យ ហើយគាត់មានជំងឺប្រចាំកាយលើសឈាមផងដែរ។
តាមការសន្និដ្ឋាន លោកបានស្លាប់ដោយសារខ្សោយសួតធ្ងន់ធ្ងរខ្លាំង និងរលាកសួតសងខាងធ្ងន់ធ្ងរខ្លាំង ក្រោយកូវីដ-១៩ វាយលុក។ លោកស្តើង ជា មានអាសយដ្ឋាននៅភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានសម្តែងការសោកស្តាយចំពោះការបាត់បង់បុគ្គលមួយរូបដែលចូលរួមយ៉ាងសកម្មក្នុងចលនាអូឡាំពិកនៅកម្ពុជា នារយៈពេលជិត២០ឆ្នាំកន្លងមកនេះ។ «កម្រិតនៃការសោកស្តាយគឺខ្ពស់មែនទែន ដោយសារតែគាត់កំពុងតែសកម្មក្នុងការងារអូឡាំពិក លោកមានគុណូបការៈយ៉ាងខ្លាំងចំពោះចលនាអូឡាំពិកខ្មែរ ហើយកាន់តែតំណែងជាប្រធានគណៈកម្មការវេជ្ជសាស្ត្រយូរណាស់មកហើយ លោកក៏ជាប្រធានគណៈកម្មការវេជ្ជសាស្ត្រស៊ីហ្គេមផងដែរ»។
ករណីស្លាប់៣នាក់កន្លងមក មាន បុរសអាយុ៥០ឆ្នាំ កាលពីថ្ងៃទី១១ ខែមីនា, ស្ត្រីអាយុ៦២ឆ្នាំ និងបុរសអាយុ៤៦ឆ្នាំ កាលពីថ្ងៃទី១៩ ខែមីនា៕
© រក្សាសិទ្ធិដោយ thmeythmey.com