នាយករដ្ឋមន្ត្រីសិង្ហបុរីលោក លី សៀនឡុង ជាមេដឹកនាំអាស៊ានដំបូងបំផុតដែលចាក់វ៉ាក់សាំងកូវីដ-១៩។ លោកលី ចាក់វ៉ាក់សាំងក្រុមហ៊ុន Pfizer/BioNTech កាលពីថ្ងៃទី៨ ខែមករា។ គិតត្រឹមថ្ងៃទី២២ ខែមីនា សិង្ហបុរី បានចាក់ វ៉ាក់សាំងចំនួន១,០៧១,៩០៨នាក់ ដោយ៧៧១,២៩៧ដូសសម្រាប់អ្នកចាក់លើកទី១ និង៣០០,៦១១ ដូស សម្រាប់អ្នកចាក់លើកទី២។ សិង្ហបុរីចាប់ផ្តើមចាក់វ៉ាក់សាំងនៅចុងខែធ្នូឆ្នាំ២០២០ ដោយគ្រោងនឹងបញ្ចប់នៅចុង ឆ្នាំ២០២១។
 

ប្រធានាធិបតីឥណ្ឌូណេស៊ី ចូកូ វីដូដូ ចាក់វ៉ាក់សាំងរបស់ក្រុមហ៊ុនចិន Sinovac Biotech នៅថ្ងៃទី១៣ ខែមករា។ ក្នុងកម្មវិធីចាក់វ៉ាក់សាំង ឥណ្ឌូណេស៊ីបានកក់វ៉ាក់សាំងចំនួន៥ប្រភេទដែលមានដូចជា Pfizer ,AstraZeneca,  Sinovac និង Novavax ជាដើមដែលមានចំនួនសរុប៣៣០លានដូស។ ឥណ្ឌូណេស៊ី ដាក់គោលដៅចាក់វ៉ាក់សាំង ឱ្យប្រជាជនជាង១៨០លាននាក់ ក្នុងប្រទេសដែលមានប្រជាជនជាង២៦០លាននាក់។ 
 

កាលពីថ្ងៃទី២៤ ខែកុម្ភៈ នាយករដ្ឋមន្ត្រីម៉ាឡេស៊ី មូហ៊ីឌីន យ៉ាស៊ីន ចាក់វ៉ាក់សាំងរបស់ក្រុមហ៊ុន Pfizer/BioNTech ។ យុទ្ធនាការវ៉ាក់សាំងប្រទេសនេះ ចាប់ផ្តើមនៅចុងខែកុម្ភៈ ឆ្នាំ២០២១ នឹងបន្តរហូតដល់ខែកុម្ភៈឆ្នាំ២០២២ ដោយសង្ឃឹមថា នឹងបង្កើតភាពស៊ាំសហគមន៍ពេលប្រជាជនចំនួន៨០ភាគរយទទួលបានវ៉ាក់សាំង។ ម៉ាឡេស៊ីនឹង ប្រើប្រាស់វ៉ាក់សាំង Pfizer ចំនួន២៥លានដូស, AstraZeneca ៦,៤លានដូស, SputnikV ចំនួន៦,៤លានដូស និង Sinovac ចំនួន១២លានដូស។
 

សម្តេច ហ៊ុន សែន នាយករដ្ឋមន្ត្រីកម្ពុជាចាក់វ៉ាក់សាំង Covishiled របស់ក្រុមហ៊ុន AstraZeneca នៅថ្ងៃទី៤ ខែមីនា បន្ទាប់ពីទទួលបានវ៉ាក់សាំងនេះតាមរយៈយន្តការCOVAXចំនួន៣២៤,០០០ដូស។ កម្ពុជាចាប់ផ្តើមចាក់ វ៉ាក់សាំងនៅថ្ងៃទី១០ ខែកុម្ភៈ បន្ទាប់ពីបានទទួលវ៉ាក់សាំងSinopharm ចំនួន៦សែនដូសពីចិននៅថ្ងៃ៧ ខែកុម្ភៈ។ នៅថ្ងៃទី២៦ ខែមីនា កម្ពុជាទទួលបានវ៉ាក់សាំង Sinovac ចំនួន១,៥លានដូសពីចិន។ កម្ពុជារំពឹងថា នឹងផ្តល់ វ៉ាក់សាំងដល់ពលរដ្ឋខ្លួនឱ្យបានចំនួន៥សែននាក់ត្រឹមខែមេសា ឆ្នាំ២០២១។

 

លោកនាយករដ្ឋមន្ត្រីថៃ ប្រាយុទ្ធ ចន្ទអូចា បានចាក់វ៉ាក់សាំងក្រុមហ៊ុន AstraZeneca នៅថ្ងៃទី១៦ ខែមីនា។ ថៃ ចាប់ផ្តើមយុទ្ធនាការចាក់វ៉ាក់សាំងនៅថ្ងៃទី១ ខែមីនា ដោយប្រើប្រាស់វ៉ាក់សាំង AstraZeneca ផលិតដោយរោងចក្រ កូរ៉េខាងត្បូង និងវ៉ាក់សាំងរបស់ក្រុមហ៊ុន Sinovac។ ថៃគ្រោងចាក់វ៉ាក់សាំង ដល់ប្រជាជន ឱ្យបាន៣១លាននាក់ ត្រឹមចុងឆ្នាំ២០២១ នៃចំនួនប្រជាជន៦៦លាននាក់។ 
 

វៀតណាម ចាប់ផ្តើមចាក់វ៉ាក់សាំងនាដើមខែមីនា ដោយប្រើប្រាស់វ៉ាក់សាំងចំនួន៦០លានដូស និងវ៉ាក់សាំងតាម យន្តការ COVAX ។ ក្នុងដំណាក់កាលទី១ មន្ត្រីសុខាភិបាល និងអ្នកប្រយុទ្ធនឹង ជំងឺកូវីដ-១៩ ជាង៦សែននាក់ នឹងទទួលបានវ៉ាក់សាំង។ ចាប់ពីខែមិថុនា វៀតណាមដាក់ផែនការចាក់វ៉ាក់សាំងដល់មនុស្សចំនួន១,៨លាននាក់ ដែលមានមន្ត្រីគយ អ្នកការទូត ប៉ូលិស ទាហាន និងគ្រូបង្រៀន។ ប្រទេសដែលមានប្រជាជន៩៨លាននាក់នេះ ក៏គ្រោងចាក់វ៉ាក់សាំងដល់មនុស្សចំនួន១៦លាននាក់ផ្សេងទៀតត្រឹមបំណាច់ខែកញ្ញា។ 
 

ចំណែកមីយ៉ាន់ម៉ា ចាប់ផ្តើមការចាក់វ៉ាក់សាំងនាថ្ងៃទី២៧ ខែមករា។ នាពាក់កណ្តាលខែមករា មីយ៉ាន់ម៉ាទទួលបានវ៉ាក់សាំង Covisheild ចំនួន១,៥លានដូសពីឥណ្ឌា។ រដ្ឋប្រហារដោយក្រុមយោធា នាថ្ងៃទី១ ខែកុម្ភៈ និងបាតុកម្មរបស់មន្ត្រីរដ្ឋការ ក៏ដូចជាគ្រូពេទ្យធ្វើឱ្យដំណើរការចាក់វ៉ាក់សាំងក្នុងប្រទសនេះនៅនឹងថ្កល់។
 

ហ្វីលីពីន ចាប់ផ្តើមការចាក់វ៉ាក់សាំងជាផ្លូវការនៅថ្ងៃទី១ ខែមីនាដោយប្រើប្រាស់វ៉ាក់សាំងរបស់ក្រុមហ៊ុន Sinovac។ រដ្ឋាភិបាលប្រទេសនេះគ្រោងផ្តល់វ៉ាក់សាំងចំនួនពី៥០ ទៅ៧០ភាគរយនៃចំនួនប្រជាជនគិតត្រឹមឆ្នាំ២០២១។ ហ្វីលីពីនបានកក់វ៉ាក់សាំងចំនួន១៤៨លានដូស មកពីក្រុមហ៊ុនចំនួន៧គឺ Pfizer, AstraZeneca, Moderna, Novavax, Sinovac, Gamaleya និង Johnson &Johnson។
 

ឡាវបានចាប់ផ្តើមការចាក់វ៉ាក់សាំងទ្រង់ទ្រាយតូចទៅក្រុមគ្រូពេទ្យក្នុងខែមករា និងចាប់ផ្តើមការចាក់វ៉ាក់សាំង ទូទាំងប្រទេសនាពាក់កណ្តាលឆ្នាំ២០២១។ ប្រទេសនេះទើប ទទួលបានវ៉ាក់សាំងCovishield ចំនួន ១៣២,០០០ ដូសពីយន្តការCOVAX ដោយក្រុមងាយរងគ្រោះដូចជាគ្រូពេទ្យព្យាបាលអ្នកជំងឺកូវីដ-១៩ នឹងទទួលបានការ ចាក់ វ៉ាក់សាំងមុនគេ។ ឡាវក៏ទទួលបានវ៉ាក់សាំង Sinopharm ចំនួន៣សែនដូសពីចិន និងគ្រោងទទួលវ៉ាក់សាំង SputnikV ចំនួន២លានដូសពីរុស្ស៊ី។
 

ព្រុយណេដែលមានប្រជាជនចំនួន៥សែននាក់ នឹងចាប់ផ្តើមចាក់វ៉ាក់សាំង នៅពេលទទួលបាន វ៉ាក់សាំង AstraZeneca នាចុងខែមីនា។ ការចាក់ដំណាក់កាលពី១ ផ្តោតទៅលើបុគ្គលិកសុខាភិបាល មនុស្សចាស់អាយុចាប់ពី៦០ឆ្នាំឡើងទៅ និងនិស្សិតមកពីក្រៅប្រទេស។ ដំណាក់កាលទីពីរ គឺការចាក់វ៉ាក់សាំងដល់គ្រូបង្រៀន អ្នកមើលថែកុមារ និងមនុស្សពេញវ័យដែលងាយឆ្លងជំងឺ។ ដំណាក់កាលពីបី គឺការចាក់វ៉ាកសាំងដល់ប្រជាជនដែលមានអាយុចាប់ពី១៨ឆ្នាំឡើងទៅ៕