ជប៉ុន គឺជាម្ចាស់ជំនួយដ៏ធំ និងជាម្ចាស់វិនិយោគលំដាប់ទី៥ នៅមីយ៉ាន់ម៉ា។ ក្រសួងការបរទេសជប៉ុន បានអះអាងថា ជប៉ុន បានផ្តល់ជំនួយរហូតដល់ទំហំ ១,៧ពាន់លានដុល្លារទៅមីយ៉ាន់ម៉ា នៅក្នុងឆ្នាំ២០១៩។ ចំនួននេះ គឺធំជាងចិនទៅទៀត។ ជប៉ុនដែលមិនសូវមាត់កអ្វីនឹងរឿង ក៏មិនពេញចិត្តអំពើព្រៃផ្សៃរបស់ក្រុមយោធា ហើយសម្រេចចិត្តផ្អាកជំនួយទៀតផង 

 

ថ្លែងនៅក្នុងកិច្ចប្រជុំសភា ប្រមុខការទូតជប៉ុន លោកToshimitsu Motegi បានលើកឡើងយ៉ាងដូច្នេះថា៖ « វាគ្មានជំនួយថ្មីទៅមីយ៉ាន់ម៉ាទេ។ យើងកំពុងបង្ហាញជំហរយ៉ាងច្បាស់លាស់»។ ប៉ុន្តែរដ្ឋមន្រ្តីការបរទេសជប៉ុន បដិសេធដាក់ទណ្ឌកម្មលើមេដឹកនាំយោធាមីយ៉ាន់ម់ាផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

បើតាមលោក Motegi ការផ្អាកជំនួយអភិវឌ្ឍន៍ផ្លូវការ (ODA) អាចដាក់សម្ពាធលើក្រុមយោធាជាងការដាក់ទណ្ឌកម្មទៅទៀត។ «បើសិនបើអ្នកគិតថាវិធានការណាមួយមានប្រសិទ្ធិភាពខ្លាំង ខ្ញុំគិតថាវិធានការនេះគឺច្បាស់ជាង»។ ប្រមុខការទូតជប៉ុនបានលើកឡើងបែបនេះ។   

 

តាមការចុះផ្សាយរបស់សារព័ត៌មានក្នុងស្រុកជប៉ុន ការផ្អាកនេះ អនុវត្តលើតែជំនួយថ្មីៗប៉ុណ្ណោះ មិនមែនជំនួយដែលមានជាយូរមកហើយជាមួយមីយ៉ាន់ម៉ាឡើយ។ យ៉ាងណាមិញ ការផ្អាកជំនួយអភិវឌ្ឍន៍របស់ជប៉ុននេះ ត្រូវបានមនុស្សមួយចំនួនមើលឃើញថា នឹងមិនអាចដាក់សម្ពាធលើក្រុមយោធាមីយ៉ាន់ម៉ាបានខ្លាំងឡើយ។ 

 

ចាប់តាំងពីរដ្ឋប្រហារយោធាមក ប៉ូលិសមីយ៉ាន់ម៉ា បានបាញ់សម្លាប់មនុស្សច្រើនជាង៥០០នាក់ ខណៈក្រុមបាតុករ នៅតែបន្តតវ៉ាឱ្យរបបសឹកទម្លាក់ចោលអំណាចរបស់ខ្លួន និងបង្កើតរដ្ឋាភិបាលស៊ីវិលឡើងវិញ រួមទាំងដោះលែងអ្នកជាប់ឃុំផ្សេងទៀត។ 

 

សូមបញ្ជាក់ថា ទោះរងទណ្ឌកម្ម និងសម្ពាធពីសហគមន៍អន្តរជាតិជាច្រើនមកហើយក្តី ប៉ុន្តែរបបសឹក មិនបានភ័យបារម្ភ ឬបន្ធូរបន្ថយសកម្មភាពរបស់ខ្លួនឡើយ។ អាមេរិក សហភាពអឺរ៉ុប កាណាដា អង់គ្លេស សុទ្ធតែដាក់ទណ្ឌកម្មមេដឹកនាំយោធា តាមរយៈការបង្កកទ្រព្យសម្បត្តិ និងហាមប្រជាជនខ្លួនរកស៊ីជាមួយ៕