បន្ថែមពីនេះលោក ឃួង ស្រេង បានប្រាប់សារព័ត៌មានថ្មីៗថា វិធានការរបស់អាជ្ញាធរនេះ គឺអនុវត្តទៅលើអ្នកដែលគ្មានភារកិច្ចចាំបាច់ ហើយចេញក្រៅពាសវាលពាសកាល ឬជួបជុំគ្នានៅតាមផ្លូវសាធារណៈ នៅចន្លោះពីម៉ោង៨យប់ ទៅ៥ទៀបភ្លឺប៉ុណ្ណោះ។ 
 

សម្រាប់អ្នកដែលបំពេញការងាររហូតដល់ពេលយប់ ឬធ្វើការវេនយប់ ក៏ដូចជាមានភារកិច្ចចាំបាច់ពេលយប់ តាមសេចក្តីសម្រេចស្តីពីការអនុវត្តវិធានការរដ្ឋបាលបណ្តោះអាសន្ន ដើម្បីទប់ស្កាត់ការរីករាលដាលជំងឺកូវីដ-១៩ របស់រដ្ឋបាលរាជធានីភ្នំពេញនោះ គឺអាជ្ញាធរមិនចាត់វិធានការខាងលើឡើយ ពោលគឺពលរដ្ឋទាំងនោះ ត្រូវមានប័ណ្ណសម្គាល់ការងារពីក្រុមហ៊ុន ឬសុំលិខិតបញ្ជាក់អនុញ្ញាតពីអាជ្ញាធរ នៅពេលធ្វើដំណើរពេលយប់ នៃបម្រាមគោចរនេះ។ 
 

អភិបាលរាជធានីភ្នំពេញរូបនេះ បានពន្យល់ដូច្នេះថា៖«អ្នកធ្វើការ(ពេលយប់ឬដល់យប់ជ្រៅ) គឺគេអត់ថាអីទេ តែអ្នកដើរលេង(ទើបត្រូវអាជ្ញាធរឃាត់ និងរក្សាទុកមធ្យោបាយធ្វើដំណើរ រួមទាំងតម្រូវឱ្យធ្វើចត្តាឡីស័ក) ឱ្យតែហួសម៉ោងទៅគេអនុវត្តហើយ។ ចំពោះអ្នកធ្វើការ អង្គភាពគាត់ ស្ថាប័នគាត់ ត្រូវស្នើសុំលិខិតអនុញ្ញាតជាពិសេសពីអាជ្ញាធររាជធានី នៅទីតាំងដែលគាត់ធ្វើការ ។ ឧបមារ គាត់ត្រូវធ្វើការដល់ម៉ោង១២យប់ បានគាត់ចេញពីកន្លែងធ្វើការ ដូចជាសណ្ឋាគារខ្លះ ត្រូវធ្វើការដល់ម៉ោងហ្នឹង អ៊ីចឹងដល់ម៉ោងគាត់ទៅផ្ទះ គាត់ត្រូវសុំលិខិតជាពិសេសរបស់រាជធានី(ដាក់តាមខ្លួន) ដើម្បីជាបណ្ណសម្គាល់ ដែលអាចឱ្យគាត់ធ្វើដំណើរបាននៅពេលយប់ »។

  

 

ប្រការ៣ ត្រូវបានផ្អាកការប្រមូលផ្តុំ ឬការជួបជុំគ្នាទទួលទានអាហារ លើកលែងតែចំពោះករណីជួបជុំក្នុងចំណោមគ្រួសារ ការរៀបចំពិធីបុណ្យសព ការជួបជុំរបស់បុគ្គលិកសុខាភិបាលដើម្បីយកសំណាក ការជួបជុំរបស់អាជ្ញាធរមានសមត្ថកិច្ច និងការជួបជុំចាំបាច់សម្រាប់បម្រើប្រយោជន៍សាធារណៈ ឬក្នុងគោលបំណងផ្សេងៗ ក្រោមការកំណត់របស់អាជ្ញាធរមានសមត្ថកិច្ច។
 

ដូចគ្នាផងដែរ ប្រការ៤ លើកឡើងពីការផ្អាកបណ្តោះអាសន្ននូវការធ្វើចរាចរណ៍ក្នុងភូមិសាស្ត្ររាជធានីភ្នំពេញ នៅចន្លោះម៉ោង៨យប់ដល់ម៉ោង៥ភ្លឺ ដោយលើកលែងចំពោះករណី ការធ្វើដំណើរដោយមូលហេតុសុខភាពបន្ទាន់ ភាពចាំបាច់ក្នុងគ្រួសារ ដែលមានការបញ្ជាក់ពីអាជ្ញាធរ ការបំពេញបេសកកម្មជូនស្ថាប័ន-អង្គភាព ការធ្វើចរាចរណ៍រថយន្តកុងតឺនឺ រថយន្តដឹកទំនិញ រថយន្តបាញ់បេតុង រថយន្តសម្រាប់បម្រើឲ្យការដឹកជញ្ជូនទំនិញ ការផ្គត់ផ្គង់ការដ្ឋានសំណង់ រថយន្តដឹកសំរាម និងសំណល់វេជ្ជសាស្ត្រ ការដឹកជញ្ជូនម្ហូបអាហារ ការធ្វើដំណើររបស់បុគ្គលិក និងកម្មករ-កម្មការិនី និងការធ្វើដំណើរចាំបាច់ផ្សេងៗទៀត។
 

លោកអភិបាលរាជធានីភ្នំពេញ តម្រូវឲ្យនាយករដ្ឋបាលសាលារាជធានី ស្នងការ បញ្ជាការដ្ឋានកងរាជអាវុធហត្ថ រដ្ឋបាលខណ្ឌទាំង១៤ មន្ទីរជំនាញ ទទួលបន្ទុកអនុវត្តសេចក្តីសម្រេចនេះ ឲ្យមានប្រសិទ្ធភាពចាប់ពីថ្ងៃចុះហត្ថលេខា៕