បើតាមលោក ឆេង គីមឡុង ព្រឹត្តិការណ៍២០កុម្ភៈនាពេលបច្ចុប្បន្ន កំពុងជះឥទ្ធិពលអវិជ្ជមានទៅលើបណ្តាក្រុមហ៊ុន ឬសហគ្រាស ក្នុងវិស័យអចលនទ្រព្យមួយចំនួន ដែលបានខ្ចីលុយពីវិស័យធានាគារ ហើយត្រូវបង្វិលទុនទាំងប្រាក់កម្ចី និងការប្រាក់ទៅឱ្យស្ថាប័នហិរញ្ញវត្ថុទាំងនោះវិញ។ អ្នកជំនាញសេដ្ឋកិច្ចរូបនេះ បានរៀបរាប់ប្រាប់សារព័ត៌មានThmeythmey.com នារសៀលថ្ងៃទី៣១មីនា ឆ្នាំ២០២១ដូច្នេះ ៖ «ពេលនេះ ប្រហែលជាមានអ្នកខ្លះ[អ្នកអភិវឌ្ឍក្នុងវិស័យអចលនទ្រព្យ] កំពុងតែទទួលផលប៉ះពាល់ពី[ព្រឹត្តិការណ៍២០កុម្ភៈ] គ្រាន់តែយើងមិនឃើញមានចេញជាវិបត្តិជារួម ប៉ុន្តែគឺបានប៉ះពាល់ដល់មនុស្សខ្លះហើយ[ក្នុងវិស័យអចលនទ្រព្យ] »។ 
 

 

គិតមកដល់ពេលនេះ កម្ពុជាមានអ្នកកើតកូវីដ-១៩ សរុប២,៤៧៧នាក់ ក្នុងនោះមាន១,៩៤៩នាក់ពាក់ព័ន្ធនឹងករណីសហគមន៍២០កុម្ភៈ។ អ្នកជាសះស្បើយសរុបមាន១,២៤០នាក់ រីឯអ្នកស្លាប់មាន១៦នាក់។ ក្រៅពីនេះ មនុស្ស៤នាក់បានស្លាប់ដោយសារជំងឺផ្សេងនាអំឡុងពេលព្យាបាលជំងឺកូវីដ-១៩។ មនុស្ស ចំនួន៥៦៥នាក់កំពុងបន្តសម្រាកព្យាបាល។

 

ករណីសហគមន៍២០កុម្ភៈ រាលដាលនៅរាជធានីភ្នំពេញ និង១៣ខេត្តទៀត រួមមាន កណ្តាល ព្រះសីហនុ សៀមរាប ព្រៃវែង ស្វាយរៀង កោះកុង កំពង់ចាម កំពង់ធំ ត្បូងឃ្មុំ កែប តាកែវ កំពត និងបាត់ដំបង៕