Lockdown៖ អាជ្ញាធររឹតបន្តឹងការធ្វើដំណើរ ក្នុងភូមិសាស្រ្តរាជធានីភ្នំពេញជាប់ព្រំប្រទល់ក្រុងតាខ្មៅ ខេត្តកណ្ដាល

ភ្នំពេញ៖ បណ្ដាផ្លូវនានា ក្នុងភូមិសាស្ត្ររាជធានីភ្នំពេញ ជាប់ព្រំប្រទល់ក្រុងតាខ្មៅ ខេត្តកណ្ដាល នៅថ្ងៃទី១៥ មេសានេះ ត្រូវបានរឹតបន្តឹង ក្រោមរូបភាពអាជ្ញាធរ ត្រួតពិនិត្យការធ្វើដំណើររបស់ប្រជាពលរដ្ឋ តាមវិធានការបិទខ្ទប់ (Lockdown) របស់ប្រមុខរដ្ឋាភិបាល ដែលដាក់ចេញកាលពីថ្ងៃទី១៤ មេសា។

អាជ្ញាធរ បានហាមពលរដ្ឋដែលគ្មានភារកិច្ចចាំបាច់ មិនឱ្យធ្វើដំណើរឆ្លងកាត់នោះទេ។ សម្រាប់ពលរដ្ឋ ឬអ្នកដឹកជញ្ជូនទំនិញ ដែលអាចឆ្លងកាត់ផ្លូវទាំងនោះ លុះត្រាមានឯកសារ ឬលិខិតបញ្ជាក់បេសកកម្មការងារ ពីថ្នាក់ដឹកនាំក្រសួង ស្ថាប័នរដ្ឋ និងឯកជន ទើបអាជ្ញាធរអនុគ្រោះឱ្យធ្វើដំណើរ។ ចំណែកអាជីវករ ឬអ្នករកស៊ី ,អ្នកមានបញ្ហាសុខភាព និងអ្នកត្រូវចាក់វ៉ាក់សាំងបង្ការជំងឺកូវីដ-១៩ នោះ ក៏ត្រូវបានអាជ្ញាធរអនុញ្ញាតឱ្យធ្វើដំណើរដែរ។

ប្រមុខរដ្ឋភិបាល សម្តេច ហ៊ុន សែន បានចេញសេចក្តីសម្រេចមួយ នៅម៉ោងជិត១១យប់ ថ្ងៃទី១៤ ខែមេសា ឆ្នាំ២០២១នេះ ស្តីពីការបិទខ្ទប់ (Lockdown) ភូមិសាស្ត្ររាជធានីភ្នំពេញទាំងមូល និងភូមិសាស្ត្រក្រុងតាខ្មៅនៃខេត្តកណ្តាល។

ក្នុងការបិទខ្ទប់នេះ រដ្ឋាភិបាល មិនអនុញ្ញាតឲ្យប្រជាពលរដ្ឋក្នុងភូមិសាស្ត្ររាជធានីភ្នំពេញនិងប្រជាពលរដ្ឋក្នុងភូមិសាស្ត្រក្រុងតាខ្មៅ ចេញពីផ្ទះឬកន្លែងរស់នៅបច្ចុប្បន្នឡើយ។ រដ្ឋាភិបាល មិនហាមឃាត់ដាច់ណាត់ មិនឲ្យប្រជាពលរដ្ឋ ចេញពីផ្ទះនោះទេ ដោយមានករណីលើកលែងមួយចំនួន ដូចជាពលរដ្ឋត្រូវបំពេញការងារ អាជីកម្ម សេវាកម្មដឹកជញ្ជូន និងមានបញ្ហាសុខភាពជាដើម។