COVID-19
ជាតិ
ជំងឺកូវីដ-១៩ សម្លាប់ពលរដ្ឋខ្មែរ២នាក់ទៀត
× ភ្នំពេញ៖ ជំងឺកូវីដ-១៩ បានសម្លាប់ពលរដ្ឋខ្មែរ២នាក់ទៀត កាលពីថ្ងៃទី១៥ មេសា ដែលធ្វើឱ្យចំនួនអ្នកស្លាប់សរុបនៅកម្ពុជាកើនដល់៣៨នាក់។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី១៦មេសានេះ។
បើតាម ក្រសួងសុខាភិបាល ក្នុងចំណោមអ្នកស្លាប់ទាំង២នាក់ គឺមាន លោក ម៉ៅ អាយុទ្ធ ជាអ្នកនិពន្ធ និងជារដ្ឋលេខាធិការក្រសួងព័ត៌មាន និងម្នាក់ទៀតជាបុរសអាយុ ៦៥ រស់នៅស្រុកសំរោងទង ខេត្តកំពង់ស្ពឺ។
ករណីបុរសអាយុ៦៥ឆ្នាំ ត្រូវបានរកឃើញវិជ្ជមានកូវីដ-១៩ និងចូលព្យាបាលនៅមន្ទីរពេទ្យ នៅម៉ោង១១ព្រឹក ថ្ងៃទី១៥ មេសា ដោយមានអាការហត់ដង្ហក់ខ្លាំង។ ដោយស្ថានភាពកាន់តែធ្ងន់ធ្ងរ ក្រុមគ្រូពេទ្យបានជួយសង្គ្រោះតាមលក្ខណៈបច្ចេកទេស និងប្រើប្រាស់ម៉ាស៊ីនជំនួយដង្ហើម នៅតែមិនអាចព្យាបាលបាន។ អ្នកជំងឺបានបាត់បង់ជីវិត នៅវេលាម៉ោង ៣រសៀល ថ្ងៃទី១៥មេសា។ តាមក្រសួងសុខាភិបាល ក្រុមគ្រូពេទ្យសន្និដ្ឋានថា អ្នកជំងឺស្លាប់ដោយសារវិបត្តិផ្លូវដង្ហើមស្រួចស្រាវធ្ងន់ធ្ងរ និងរលាកសួតទាំងសងខាងធ្ងន់ធ្ងរ ដោយសារកូវីដ-១៩។
ចំណែកឯអ្នកជំងឺម្នាក់ទៀត គឺជាលោក ម៉ៅ អាយុទ្ធ ដែលមានវ័យ៧៧ឆ្នាំ រស់នៅក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។ គាត់បានចូលសម្រាកព្យាបាលនៅមន្ទីរពេទ្យខ្មែរ-សូវៀត នៅថ្ងៃទី៥ មេសា ដោយមានស្ថានភាពដង្ហក់ខ្លាំង ហើយក៏មានប្រវត្តិជំងឺទឹកនោមផ្អែមប្រចាំកាយផង។ អាការអ្នកជំងឺរូបនេះ កាន់តែធ្ងន់ធ្ងរទៅៗពីមួយថ្ងៃទៅមួយថ្ងៃ ហើយក្រុមគ្រូពេទ្យ មិនអាចព្យាបាលបាន។ លោក ម៉ៅ អាយុទ្ធ បានបាត់បង់ជីវិត នៅម៉ោង ៦ និង៥០នាទី ថ្ងៃទី១៥ មេសា។ ក្រុមគ្រូពេទ្យសន្និដ្ឋានថា អ្នកជំងឺស្លាប់ដោយសារវិបត្តិផ្លូវដង្ហើមស្រួចស្រាវ និងរលាកសួតទាងសងខាងធ្ងន់ធ្ងរ ដោយសារកូវីដ-១៩ លើអ្នកជំងឺទឹកនោមផ្អែមប្រចាំកាយ។
គិតត្រឹមព្រឹកថ្ងៃទី១៦ ខែមេសា ឆ្នាំ២០២១ កម្ពុជាមានអ្នកស្លាប់ដោយសារកូវីដ-១៩ ចំនួន៣៨នាក់ហើយ៕
© រក្សាសិទ្ធិដោយ thmeythmey.com