រយៈពេលចុងក្រោយនេះ ករណីឆ្លងកូវីដ-១៩ នៅថៃ នៅតែបន្តហក់ឡើងដដែល។ នៅថ្ងៃទី១៨ ខែមេសា មជ្ឈមណ្ឌលគ្រប់គ្រងជំងឺ COVID-19 ថៃ (CCSA) បានរាយការណ៍ថា ករណីឆ្លងមានចំនួន ១៧៦៧ ករណី និងអ្នកស្លាប់មានចំនួន ២នាក់។ តំបន់ដែលមានករណីឆ្លងច្រើនជាងគេ គឺនៅទីក្រុងបាងកក ខេត្តឈុនបុរី ខេត្តឈៀងម៉ៃ និងបណ្តាខេត្តផ្សេងទៀត។ 

 

ដោយសារតែករណីឆ្លងនៅតែបន្តហក់ឡើងបែបនេះ តំបន់ខ្លះ ដូចជានៅខេត្តឈៀងម៉ៃជាដើម កំពុងប្រឈមខ្វះគ្រែសម្រាប់ដាក់អ្នកជំងឺកូវីដ-១៩។ បញ្ហានេះ អ្នកជំងឺកូវីដ-១៩ មួយចំនួន ត្រូវផ្ទេរទៅក្រុងបាងកក ឬខេត្តផ្សេង ដើម្បីព្យាបាល។ នេះបើតាមការចុះផ្សាយរបស់កាសែតបាងកកប៉ុស្តិ៍។

 

មកទល់ពេលនេះ កូវីដ-១៩ របស់ថៃ បានរីកសាយដល់ខេត្តរបស់ថៃទាំងអស់ ដែលមានចំនួន ៧៧ខេត្ត។ ក្នុងចំណោមនោះ ខេត្តចំនួន ៤៤ បានដាក់ចេញវិធានការរឹតត្បិតលើអ្នកដែលចូលមកក្នុងខេត្តទាំងនោះ។ 

 

លើសពីនេះ ថៃបានហាមឃាត់ការជួបជុំទ្រង់ទ្រាយធំ បិទបារ តៀមស្រា ភោជនីយដ្ឋានជាដើម និងកន្លែងកម្សាន្តផ្សេងទៀត ដោយចាប់ផ្តើមពីថ្ងៃទី១៨ ខែមេសា តទៅ រយៈពេល ២សប្តាហ៍។ 

 

សូមបញ្ជាក់ថា គិតត្រឹមពេលនេះ ថៃមានករណីឆ្លងកូវីដ-១៩ សរុបចំនួន ៤២៣៥២ករណី និងអ្នកស្លាប់មានចំនួន ១០១នាក់។ អ្នកជាសះស្បើយមានចំនួន ២៨៧៥០នាក់។ ស្របគ្នានេះ ថៃក៏បានចាក់វ៉ាក់សាំងឱ្យប្រជាជនខ្លួន បានចំនួនជាង ៦០ម៉ឺនដូសផងដែរ៕