ទំនាក់ទំនងនូវែលសេឡង់ជាមួយចិន ទុកឱ្យនូវែលសេឡង់ជាអ្នកចាត់ចែង។ រដ្ឋមន្រ្តីការបរទេសនូវែលសេឡង់ បញ្ជាក់បែបនេះនៅថ្ងៃទី១៩ ខែមេសា ដែលវាបានបង្ហាញពីការដកខ្លួនកាន់តែឆ្ងាយរបស់នូវែលសេឡង់ពីក្រុមប្រទេសទាំង៥ (Five Eyes Alliance) ដែលដឹកនាំដោយអាមេរិក។ នូវែលសេឡង់ មានទំនាក់ទំនងល្អប្រសើរជាមួយចិន ដែលខុសពីអូស្ត្រាលីដែលចេញមុខប្រឆាំងតាមអាមេរិករហូតត្រូវចិនដាក់ការរឹតត្បិតទំនិញរាប់មុខ។

 

សម្ពន្ធភាពប្រទេស៥មានសមាជិកដូចជាអាមេរិក អង់គ្លេស កាណាដា នូវែលសេឡង់ និងអូស្ត្រាលី។ កន្លងមក ប្រទេសទាំង៥នេះ ចេញមុខរិះគន់ចិនខ្លាំងៗមិនបញ្ហាសិទ្ធិមនុស្សនៅស៊ីនជាំង ហុងកុង ឬតៃវ៉ាន់ឡើយ។ ប៉ុន្តែខុសពីអូស្ត្រាលីក្បែរខាង នូវែលសេឡង់ ហាក់ប្រកាន់ជំហរទន់ភ្លន់ជាងគេក្នុងទំនាក់ទំនងជាមួយចិន។ 

 

ចិន ជាដៃគូពាណិជ្ជកម្មធំជាងគេរបស់នូវែលសេឡង់ ហើយប្រទេសទាំងពីរទើបដំឡើងកម្រិតកិច្ចព្រមព្រៀងពាណិជ្ជកម្មទ្វេភាគីនៅពេលថ្មីៗនេះផង។

 

កន្លងទៅ ទីក្រុងវែលីងតុន មិនធ្លាប់បញ្ជាក់ជំហររបស់ខ្លួនឱ្យច្បាស់ពីបញ្ហានេះឡើយ ប៉ុន្តែលោកស្រី Mahuta អះអាងថា នូវែលសេឡង់ ចង់មានគោលនយោបាយផ្ទាល់ខ្លួនសម្រាប់ទំនាក់ទំនងជាមួយចិន។ ថ្លែងក្នុងកិច្ចប្រជុំក្រុមប្រឹក្សានូវែលសេឡង់-ចិននៅថ្ងៃទី១៩ ខែមេសា លោកស្រី Mahuta និយាយមិនលាក់លៀមទៀតថា នូវែលសេឡង់មិនចង់ឱ្យសម្ពន្ធភាពនេះ ទៅហួសពីការចែករំលែកព័ត៌មានទៅវិញទៅមកឡើយ ហើយនូវែលសេឡង់បានប្រាប់រឿងនេះទៅកាន់ប្រទេស៤ទៀតរួចហើយដែរ។

 

លោកស្រី Mahuta ដែលជាជនជាតិដើម Maori ក្លាយជារដ្ឋមន្រ្តីការបរទេសក្នុងរដ្ឋាភិបាលលោកស្រីនាយករដ្ឋមន្រ្តី ចាស៊ីនដា អាឌើន ក្រោយការបោះឆ្នោតឆ្នាំ២០២០ ។ ការអធិប្បាយខាងលើនេះ បង្ហាញពីការដើរផ្លូវខុសគ្នារវាងនូវែលសេឡង់និងសម្ពន្ធមិត្តជិតស្និទ្ធអូស្ត្រាលីជុំវិញបញ្ហាចិនផងដែរ។ លោកស្រី Mahuta ក៏នឹងជួបជាមួយសមភាគីអូស្ត្រាលី ម៉ារីស ផេន នៅប៉ុន្មានថ្ងៃទៀតដែរ៕